Tsy olona iray fotsiny na fitambaran’olona na fikambanana no atao hoe antikristy satria milaza ny Baiboly fa “misy antikristy maro.” (1 Jaona 2:18) Avy amin’ny teny grika midika hoe “manohitra an’i Kristy na maka ny toerany” ny hoe “antikristy”, ary manondro ny olona manao an’ireto:

•   Mandà hoe tsy i Jesosy no Kristy (na Mesia) ary mandà hoe tsy Zanak’Andriamanitra izy.​—1 Jaona 2:22.

•   Manohitra an’i Kristy, ilay Voahosotr’Andriamanitra.​—Salamo 2:1, 2; Lioka 11:23.

•   Manao ny tenany ho Kristy.​—Matio 24:24.

•   Manenjika ny mpanara-dia an’i Kristy, satria amin’i Jesosy dia toy ny hoe atao aminy izay atao amin’ny mpanara-dia azy.​—Asan’ny Apostoly 9:5.

•   Milaza ny tenany ho Kristianina nefa tsy mpankatò lalàna na mpamitaka.​—Matio 7:22, 23; 2 Korintianina 11:13.

 Izay olona manao an’ireo no atao hoe antikristy, ao amin’ny Baiboly. Antsoina hoe ‘ilay antikristy’ koa anefa izy rehetra mitambatra. (2 Jaona 7) Tamin’ny andron’ny apostoly no nisy antikristy voalohany ary mbola misy foana izy ireo hatramin’izao. Efa nilaza an’izany mialoha ny Baiboly.—1 Jaona 4:3.

•   Mampianatra hevi-diso momba an’i Jesosy izy ireo. (Matio 24:9, 11) Manohitra ny fampianaran’i Jesosy, ohatra, izay mampianatra momba ny Andriamanitra telo izay iray, na izay mampianatra hoe i Jesosy no Andriamanitra Mahery Indrindra. Nilaza mantsy i Jesosy hoe: “Ny Ray dia lehibe noho izaho.”—Jaona 14:28.

•   Tsy eken’ny antikristy ny zavatra nolazain’i Jesosy momba ny fomba fiasan’ny Fanjakan’Andriamanitra. Misy mpitondra fivavahana milaza, ohatra, hoe miara-miasa amin’ny fanjakan’olombelona i Kristy. Mifanohitra amin’ity fampianaran’i Jesosy ity anefa izany: “Tsy anisan’ity tontolo ity ny fanjakako.”—Jaona 18:36.

•   Lazain’izy ireo fa Tompony i Jesosy nefa tsy ankatoavin’izy ireo ny didiny, anisan’izany ilay hoe tokony hitory ny vaovao tsaran’ilay Fanjakana.​—Matio 28:19, 20; Lioka 6:46; Asan’ny Apostoly 10:42.