TUNDL 9
I bu tien nle i pamann ń gii be i ŋaag n ninŋ i?
1. Bɛ po i k l mɔn k yin gad Yikodanm buol g kuan lieb g fid gii be pamann n ninŋ i?
Laabamann nba be Biibl n ninŋ nyiɛ Jeofa buol i. Wano n tie pamann Yendu. U bua ŋaadi kul ń gii be pamann n ninŋ i. (1 Timote 1:11, MN). Wano n cind g taan jua yen puo. I gii mɔg puobiɛnn kadaaɔg, l bu fid g baal yen pamann ŋaag n ninŋ g dugn l bu fid g te jua yen puo yam ń gii dua g biɛ gii tie guunn bid mɔ yaa po. L bual g kristo-yab kul ń gii cɔln b doug n yikodanm n yed k ban gii tie puobiɛnn nand nba i.—Lii Luk 2:1, 4, 5.
Jeofa mali bɛ i puobiɛnn po i? U bua jua yen puo gii kuan lieb, ban gii be yen b lieb saa yen b kuum i. U g bua sua n lind u lua puol po. (Ebro-nba 13:4) Jeofa “g bua jua yen puo n yad lieb.” (Malasi 2:16, MN) G nyaan u maad g Kristo-yab bu fid g yad lieb g guan g taan yen nifan l gii sua k b ninŋ yend tien cunconm.—Lii Matieog 19:3-6, 9.
2. Jua yen puo baa be yen lieb nle i?
Jeofa tag jua yen puo g bua b gii kuan lieb ban gii tod b lieb i. (Cilg 2:18) Jua n tie ŋaag canbaa, l bual g wano i ń gaal liig g kub u ŋaag n yab, g biɛ tod’b ban bann Yendu. L bual k wan gii bua u ŋaapuo nyan wan bua u kua nand nyan i. L bual g jua yen u puo ń gii bua b lieb g biɛ gii cɔln b lieb i. Jua yen puo kul mɔg pɔdm g dugn b g ŋan g gbenn, l po n te k l bual k ban gii di sugl b lieb po g fid gii be pamann n ninŋ.—Lii Efɛs Kristo-yab 4:31, 32; 5:22-25, 33; 1 Piɛr 3:7.
3. Jua yen puo gii g gbiɛ lieb maam, l tie k ban yad lieb yaa?
L gii sua g maba be i ŋaag n ninŋ, l bual k yin yabl gii kub lieb yen buam i. (1 Korɛnt Kristo-yab 13:4, 5) Biibl g maad g maam gii be jua yen puo siign n ninŋ, ban paad lieb kaa g fid g ŋanm l maam.—Lii 1 Korɛnt Kristo-yab 7:10-13.
4. Bid, Yendu bua yin gii be nle i?
Jeofa bua yin gii be pamann n ninŋ i. U tien’i cegli nba bu fid g te i binbem ń gii ŋan. I danm mɔg yanfuom yen banm, l po n te g Jeofa bua yin gii cenŋ b cegli k lan fid g tod’i. (Kolɔs Kristo-yab 3:20) Jeofa biɛ bua yin gii suun wano yen u Bija tuona g fid g la pamann.—Lii Eklesiast 11:9–12:1, MN; Matieog 19:13-15; 21:15, 16.
5. Bidanm, i bu tien nle i i bid ń gii be pamann n ninŋ i?
L mɔn k yin yabl gii tien i bid jied, tiɛd yen dunduanbuol. (1 Timote 5:8) Ama i gii bua i bid ń gii be pamann n ninŋ, l biɛ mɔn k yin tund’b k ban gii bua Jeofa g biɛ gii cenŋ u maam. (Deteronɔnm 6:4-7, MN). Yinm mɔno gii gaal liig g ŋɔn k i bua Yendu, l bu fid g tod i bid ban ŋmaa i taabuod n ninŋ. I cegli gii nya Biibl n ninŋ, l bu fid g te i bid ń gii mɔg maalŋanm.—Lii Efɛs Kristo-yab 6:4; Makpanjam 22:6, MN.
Bidanm, i gii paand i bid pala g biɛ tie’b nuupuoug b tuonŋana po, l bu te k ban yal b kua. Ama l biɛ mɔn k yin gii ŋmagd’b g biɛ gii cegi’b. Lann n bu guul’b ban daa tɔgn sɔnu nba bu kuan’m pabɔnn n ninŋ. (Makpanjam 22:15, MN) Ama l g bual k yin gii cegi’b yen mutuol lann i kaa yen tonu.—Lii Kolɔs Kristo-yab 3:21.
Jeofa Sieda-nba nyan kadaad k lan tod bidanm yen b bid. Cegli nba be l Kadaad n ninŋ nyiɛ Biibl n ninŋ i.—Lii 2 Timote 3:16.
