TUNDL 2
Ŋmaa n tie Yendu i?
1. Bɛ po i k l bual k tin gii dond Yendu i?
Yua nba tie Yendu yen mɔni n tag bona kul. U g mɔg cilg, u biɛ g mɔg juog. (1 Timote 1:17) Laabamann nba be Biibl n ninŋ nyiɛ u buol i. (1 Timote 1:11) Yendu n tie’ti miɛl, l po n te k l bual k tin gii dond wano kukua.—Lii Dɔgdu 4:11.
2. Yendu tie nle i?
Sua g ban g la Yendu g dugn u g mɔg nifuog gbannand kaa, u be polu po i. Yab be polu po mɔg paalu yen banm g cie yab be tinŋ po. (San 1:18; 4:24) Ama t bu fid g bann Yendu n tie daan nba l gii tie k t diid wan tag yal. Tiluanbuoli-buoli nba be yen tiidi puug ŋɔnŋ g Jeofa bua’ti g biɛ mɔg yanfuom. Ŋanduna yabnd ŋɔnŋ k u mɔg paalu bonciɛnn.—Lii Rom Kristo-yab 1:20.
T biɛ bu fid g ŋanm g bann Yendu n tie daan nba l gii tie k t lii Biibl. Biibl ŋɔnŋ’ti Yendu n bua yal yen wan g bua yal, wan be yen niib nand yen u pal n tu tie nand youg nba g niib tien yal ŋan lann i kaa k b tien yal g ŋan.—Lii 1 San 1:9.
3. Yendu mɔg sann ii?
Yiesu bo maad: “T Baa nba be polu po, a sann ń do.” (Matieog 6:9) Yendu mɔg donda bonciɛnn, ama u mɔg sanyenn kua i. Mabuolu kul mɔg wan yi l sann nand i. Muaba n ninŋ, Yendu sann tie “Jeofa” i. Ama lieb mɔ tu yed g “Yaawe.”—Lii Biɛyani 83:18, MN; Cilg 22:15, diid Cilg Kadaaɔg n faaɔg 152 po.
Biiba bonciɛnn n ninŋ, niib piin Yendu sanpienn g ji diɛn Yonmdaan lann i kaa Yendu i. Ama ban bo diɛn Biibl yaa youg nba, Yendu sann bo be l n ninŋ k l cie tuda ŋanlile (7 000). Yiesu bo tod niib k b bann mamɔni Yendu po g biɛ ŋɔn’m u sann.—Lii San 17:26.
4. Jeofa pal kɔn t po oo?
Nyan bibaa ne n bua u big nand nyan, Yendu mɔ kpaan t wonn po ŋanm i
Cicagm n yabd ŋanduna n ninŋ nand nba ne ŋɔnŋ g Jeofa pal g kɔn t po yaa? Siɛb tua g Yendu n kuand’ti fala n ninŋ g bua wan bign’ti, ama l g tie mɔni kaa.—Lii Saak 1:13.
Yendu tag tinm g tie’ti yam k tin fid g lugd tin bua yal. L g tie pamann kaa t po k tinm mɔno n lugd k t bu dond Yendu uu? (Sosuwe 24:15) Ama niib bonciɛnn lugd k banm baa tie lieb bonbiil i, l po n te g cicagm mand g yabd. L tuonbiid yiɛl Jeofa bonciɛnn.—Lii Cilg 6:5, 6.
Jeofa pal kɔn t po. U bua tin yal t kua i. L ji kan wai u bu nyan cicagm kul ŋanduna n ninŋ g biɛ biɛn danm nba baad yen cicagm lieb po. Ama l mɔg yal po te k u daa ŋaa g cicagm be ŋanduna ninŋ i. Tundl 8 bu ŋɔn’ti yal po te k u daa ŋaa k l tie nnyan.—Lii 2 Piɛr 2:9; 3:7, 13.
5. T bu tien nle i g fid g nagn Yendu i?
Jeofa yed k tin gii nagd’o. T gii jaand’o, l bu tod’ti tin suol dɔnnu yen’o. U pal siɛd yua kul po. (1 San 5:14) U di sugl t biid po. U ban tin tie nyignn nba g kpaan k tin tien u buam baa l gii sua k t tu mɔg pɔdm siɛnyoug. Yen tin l mɔg pɔdm kul, t bu fid g suol dɔnnu yen Yendu.—Lii 1 San 5:9; Saak 4:8.
T baa bua Jeofa i g cie bonn kul, g dugn wano n tie’ti miɛl. (Mark 12:30) A gii bua ŋan ŋɔn k a bua Yendu, l bual k ŋan gii kpaan k ŋan ŋanm g bann’o i g biɛ gii tie wan bua yal. Nnyan i k a bu fid g nagn’o.—Lii 1 Timote 2:4; 1 San 5:3.
