Yendu Diem tie gobna i g be polu po. L gobna tan bu biɛn gobna-nba nba be ŋanduna n ninŋ kul g gaal b yiɛl g nyaan te Yendu buam n tien polu po yen tinŋ n ninŋ. Yendu Diem laabaal mɔ tie laabamann i. L ji kan wai yen Yendu Diem n baal. L Diem n bu baal g te niib buam n tii.—Lii 1 Korɛnt Kristo-yab 15:24; Matieog 6:9, 10; 24:14.

Diem kul tu mɔg bad i. Yendu lugd u Bija Yiesu Kristo i k wan gii tie u Diem bad.—Lii Dɔgdu 11:15.

Yendu Bija n dagd yen wan gii tie Yendu Diem bad g dugn u mɔg pasiɛdug g biɛ bua mamɔni. (Matieog 11:28-30) Yiesu mɔg paalu bonciɛnn g bu fid g tod niib g dugn u tan baa be polu yo g ŋmagd tinŋ. U yiedu puol po, u bo duo polu po g nyaan kal Jeofa nuujendu po g guu youg nba g Yendu bu din’o bal u Diem n ninŋ. (Ebro-nba 10:12, 13) Youg nba g Yendu bo sen n ji bo tan pund, u bo kaan’o k u ji tie u Diem bad.—Lii Luk 1:32, 33.

Nyan Yiesu n bo maad nand nba nyan siɛb be g tan bu do polu gii tie batieb yen’o. (Luk 22:28, 29; Daniɛl 7:27, MN) Yendu n bo cind g lugd yab nba bo tie Yiesu apostolo-nba nba bo ŋua’ɔg saa yen u kuum i. Lan cil l youg saa yen dinne, Jeofa lugd jab yen puob nba tie u buam k b mɔ ń tan te batieb yen Yiesu polu po. Youg nba k b kpe, b tu yied g ji gii mɔg foŋanm gbannand nyan Yiesu nyan i.—Lii San 14:1-3; 1 Korɛnt Kristo-yab 15:42-44.

 Niib banŋaa n bu do polu po i? Yiesu bo yiin’m “Yendu buolu nba g yab.” (Luk 12:32) B kul taan g tie niib tuda kobg yen tuda piinna yen tuda ŋanna i (144 000). Yiesu yen banm n tan bu taan g kub tinŋ.—Lii Dɔgdu 14:1.

Yendu kaan u Diem bina 1914 n ninŋ i. * Yiesu n te bad, u daa cind g bel Sitaan yen u sanpola i polu po g jiin’m tinŋ n. Sitaan pal bo bie, l po n te k u bo jiid tinŋ n ninŋ ne g ji ŋmad bona. (Dɔgdu 12:7-10, 12) L cil l youg u g niib cicagm ŋanm g yabd g pugn. Tɔb, kom, yiɛli, tinjegnu ŋɔnŋ k l ji kan wai yen Yendu Diem n baal g lebd bona tinŋ po mɔ.—Lii Luk 21:7, 10, 11, 31.

Yendu Diem n ŋmagd laabamann muandu. L laabamann muandu n taand niwulug ŋanduna n ninŋ k b be mɔtaaɔg n ninŋ. Niib miiliɛnd nba jinŋ b kua dinne n tan baa tie Yiesu niib. Yendu Diem tan bu guul’b youg nba g Yendu tan bu nyan bonbiil kul tinŋ po. L bual g danm nba kul bua ban tan gii be Yendu Diem n ninŋ ń cil dinne i g tuo g Yiesu n tie b bad g biɛ gii cɔlm’o.—Lii Dɔgdu 7:9, 14, 16, 17.

Yendu Diem bu tug bina tudl (1 000) i g ŋanm tinŋ lan guan gii tie nyan Yendu n bo bua lan gii tie nand cilg youg nyan. Tinŋ ji tan bu kpand paradi i. U tan gii tien l kul ne g gbenn, Yiesu tan bu guan g tug bal g ŋmiɛn u Baa. (1 Korɛnt Kristo-yab 15:24-26) A bua ŋan ŋɔn ŋmaa i Yendu Diem n tie yal nba i?—Lii 2 Piɛr 3:13.