Zezi finn sov bann dimounn ki fidel kan li’nn donn so lavi an sakrifis. (Matie 20:28) Se akoz sa ki Labib apel Zezi “Sover lemond.” (1 Zan 4:14) Labib dir osi: “Pena enn lot kikenn ki kapav fer nou gagn delivrans, parski Bondie pa finn donn enn lot nom parmi bann dimounn lor later atraver ki nou pou gagn lavi.”​—Zistwar Bann Apot 4:12.

 Zezi finn “gout lamor pou tou dimounn” ki ena lafwa dan li. (Ebre 2:9; Zan 3:16) Apre sa, “Bondie finn resisit li,” ek Zezi inn retourn dan lesiel antan ki enn kreatir spiritiel. (Zistwar Bann Apot 3:15) Dan lesiel, Zezi pe kapav “sov dimounn ki vinn kot Bondie atraver li, parski li touzour vivan pou pled dan zot faver.”​—Ebre 7:25.

Kifer nou bizin ki Zezi pled dan nou faver?

 Nou tou nou fer pese. (Romin 3:23) Pese met enn obstak ant nou ek Bondie, ek konsekans pese se lamor. (Romin 6:23) Me Zezi li kouma enn “avoka” pou bann dimounn ki ena lafwa dan so sakrifis. (1 Zan 2:1, not) Li pled dan zot faver, setadir li demann Bondie pou ekout zot bann lapriyer ek pou pardonn zot bann pese lor baz sakrifis Zezi. (Matie 1:21; Romin 8:34) Bondie fer seki Zezi demann Li. Kifer? Parski tou seki Zezi demann Bondie li an-akor avek So volonte. Bondie ti avoy Zezi lor later “pou ki lemond sove par so mwayin.”​—Zan 3:17.

Eski nou bizin zis krwar dan Zezi pou ki nou gagn lavi sov?

 Non. Mem si nou bizin krwar dan Zezi pou ki nou gagn lavi sov, nou bizin fer plis ki sa. (Zistwar Bann Apot 16:30, 31) Labib dir: “Parey kouma enn lekor san lespri, li mor, lafwa osi parey, san bann aksion, li mor.” (Zak 2:26) Pou ki nou gagn lavi sov, nou bizin:

•   Aprann konn Zezi ek so Papa, Zeova.​—Zan 17:3.

•   Ena lafwa dan zot.​—Zan 12:44; 14:1.

•   Montre ki nou ena lafwa kan nou obeir zot bann komannman. (Lik 6:46; 1 Zan 2:17) Zezi ti dir ki pa tou dimounn ki apel li “Segner” ki pou sove, me bann “ki fer volonte [so] Papa ki dan lesiel” ki pou sove.​—Matie 7:21.

•   Nou bizin kontign montre ki nou ena lafwa mem pandan bann leprev. Zezi ti explik sa kan li ti dir: “Dimounn ki persevere ziska lafin pou sove.”​—Matie 24:13.