Eski pou ou, pli ale sa pe vinn pli difisil pou kone ki vre ki fos? Azordi, li paret ki pou bann dimounn se zot santiman ek zot lopinion ki pli inportan ki laverite ek bann prev. Ek partou dan lemond boukou dimounn pa krwar ki laverite existe.

 Se pa aster-la ki bann dimounn pans koumsa. Inn gagn apepre 2,000 an, Gouverner Romin Pons Pilat ti demann Zezi: “Ki ete laverite?” (Zan 18:38) Pilat pa ti atann ki Zezi reponn, me kestion ki li’nn poze ti inportan. Labib reponn sa kestion-la ek li kapav ed ou pou fer diferans ant seki vre ek seki fos, alor ki nou pe viv dan enn lemond kot bann dimounn nepli kone ki kitsoz ki vre ouswa fos.

Eski laverite vremem existe?

 Wi. Labib servi mo “laverite” pou koz lor bann prev ek osi lor seki bon lor plan moral. Li ansegn nou ki Bondie Zeova a Li Lasours laverite ek li apel Li “Bondie laverite.” (Psom 31:5) Dan Labib ena laverite ki sorti kot Bondie, ek li konpar sa laverite-la ar lalimier parski li kapav gid nou dan sa lemond ki ranpli ar konfizion la.​—Psom 43:3, Psom an Kreol Morisien, PKM; Zan 17:17.

Kouma ou kapav trouv laverite?

 Bondie pa anvi ki nou aksepte laverite ki ena dan Labib san reflesi. Okontrer, Li ankouraz nou pou servi nou kapasite pou reflesi pou examinn Labib, olie ki nou fie zis lor nou santiman. (Romin 12:1) Li anvi ki nou servi ‘tou nou lespri’ pou aprann konn Li ek pou kontan Li. Li osi ankouraz nou pou examinn bien laverite ki ena dan Labib pou ki nou kapav trouve par noumem ki zot exakt.​—Matie 22:37, 38; Zistwar Bann Zapot 17:11.

Kotsa mansonz sorti?

 Labib dir ki se lennmi Bondie, Satan Lediab, ki’nn koz premie manti ek Labib apel li “papa bann manter.” (Zan 8:44) Li’nn koz manti lor Bondie ar bann premie imin. (Zenez 3:1-6, 13, 17-19; 5:5) Depi sa, Satan inn kontign fann bann mansonz ek kasiet laverite lor Bondie.​—Revelasion 12:9.

Kifer ena sa kantite mansonz la azordi?

 Azordi, dan lepok ki Labib apel “bann dernie zour,” Satan pe inflians ek anbet bann dimounn boukou plis ki avan. Souvan bann dimounn koz manti pou anbet lezot ek pou profit lezot. (2 Timote 3:1, 13) Anplis, laplipar relizion koz manti. Parey kouma Labib ti predir, dan nou lepok bann dimounn “pou antour zotmem avek bann ansegnan ki pou kares zot zorey,” ek zot pou swazir “pou aret ekout laverite.”​—2 Timote 4:3, 4.

Kifer laverite inportan?

 Laverite li inportan pou ki bann dimounn kapav fer konfians zot kamarad. Si pena konfians, bann lamitie ek mem sosiete dan ki nou pe viv, pa pou tini dibout. Dan Labib, li dir ki Bondie anvi ki nou ador li an-akor avek laverite. Li dir: “Bann ki ador [Bondie] bizin ador li an-akor avek direksion lespri sin ek an-akor avek laverite.” (Zan 4:24) Laverite ki ena dan Labib kapav ed ou pou rekonet bann mansonz ki bann relizion ansegne ek pou liber ou ar sa bann mansonz-la. Pou aprann plis lor la, lir bann lartik ki ena anba tit « Des mensonges qui empêchent d’aimer Dieu. »

Kifer Bondie anvi ki ou konn laverite?

 Bondie anvi ki ou viv pou touletan, ek pou ki sa posib, ou bizin aprann laverite lor li. (1 Timote 2:4) Si ou aprann konn seki bon ek seki pa bon devan lizie Bondie, ek met zot an pratik dan ou lavi, ou pou kapav vinn pros ar Bondie. (Psom 15:1, 2, PKM) Bondie finn avoy Zezi lor later pou ed bann dimounn konn laverite ek Li anvi ki nou ekout seki Zezi ti ansegne.​—Matie 17:5; Zan 18:37.

Eski Bondie pou fer mansonz disparet enn zour?

 Wi. Bondie deteste kan bann dimounn koz manti pou profit lezot. Li’nn promet pou detrir bann ki swazir pou kontign koz manti. (Psom 5:6, PKM) Kan Bondie pou fer sa, li pou osi realiz sa promes-la: “Labous ki dir laverite pou la pou touletan.”​—Proverb 12:19.