Kan ou tann dir, “Lafin pre!” ki vinn dan ou latet? Eski ou pans enn asteroid ki pou vinn tap ar later ek pou detrir tou bann dimounn? Ouswa ou pans enn gran katastrof natirel oubien Trwaziem Ger Mondial? Sertin dimounn trakase kan zot pans sa bann kitsoz-la, alor ki lezot ena bann dout lor la ouswa trouv sa komik.

Labib konfirme: “Lafin pou vini.” (Matie 24:14) Labib apel osi sa levennman-la “gran zour Bondie” ek “Armagedon.” (Revelasion 16:14, 16) Li vre ki larelizion ansegn diferan kitsoz lor sa size-la, ek bann dimounn ena boukou lide etranz ek flou lor la. Me Labib bien kler konsernan lafin​—li fer nou kone seki lafin ete ek seki li pa ete. Parol Bondie osi ed nou pou trouve si lafin pre. Anplis, li montre nou seki nou bizin fer pou sape! Pou koumanse, anou eklersi sertin fos lide ek gete ki lafin ete vremem. Dapre Labib ki ete “lafin”?

1. LAFIN SE PA DESTRIKSION LATER PAR DIFE.

   Labib dir: “[Bondie] finn poz later lor so bann fondasion; zame, wi zame li pa pou bouze depi so plas.” (Psom 104:5) Sa verse-la ek lezot ankor rasir nou ki zame Bondie pa pou detrir later, ni Li pou les kikenn detrir li!​—Ekleziast 1:4; Izai 45:18.

2. LAFIN SE PA ENN LEVENNMAN KI POU ARIVE PAR AZAR, ENN KOUT KOUMSA.

   Labib dir ki Bondie inn fini plann kan lafin pou vini​—Li’nn fixe enn moman presi pou sa. Nou lir: ‘Personn napa kone ki zour, ki ler sa pou arive, ni bann anz, pa mem so Garson, me zis Papa la. Get bien, vey bien; parski zot pa kone kan letan fixe pou arive.’ (Mark 13:32, 33) Li bien kler ki Bondie (“Papa la”) inn fini plann “letan fixe” kot Li pou amenn lafin.

3. LAFIN PA POU DEKLANSE PAR BANN DIMOUNN OUSWA PAR BANN DEBRI KI SAP DAN LESPAS.

   Kouma lafin pou deklanse? Revelasion 19:11 dir: “Lerla mo ti trouv lesiel ouver, ek gete! enn seval blan. Sa kikenn ki pe asiz lor sa seval-la apel Fidel ek Vre.” Verse 19 kontigne: “Ek mo trouv bebet sovaz la ek bann lerwa ki diriz later ek zot bann larme rasanble ansam pou fer lager avek sa kikenn ki asize lor seval la ek avek so larme.” (Revelasion 19:11-21, NW.) Mem si laplipar sa bann parol-la zot sinbolik, nou kapav diserne ki Bondie pou avoy enn larme anz pou detrir so bann lennmi.

1. LAFIN TOU BANN GOUVERNMAN IMIN KI PA PE GOUVERNE KOUMA BIZIN.

   Labib explike: “Bondie ki dan lesiel pou etabli enn rwayom [gouvernman] ki zame pa pou detrir. Ek sa rwayom-la pa pou vinn pou okenn lot pep. Li  pou kraz tou sa bann rwayom-la ek li pou fini zot, ek limem ki pou regne pou touletan.” (Daniel 2:44) Kouma finn mansione avan, dan 3^em pwin, pou ena enn destriksion “bann lerwa ki diriz later ek zot bann larme.” Zot pou “rasanble ansam pou fer lager avek sa kikenn ki asize lor seval la ek avek so larme.”​—Revelasion 19:19, NW.

2. LAFIN LAGER, VIOLANS, EK LINZISTIS.

   “[Bondie] fer bann lager arete partou lor later.” (Psom 46:9) “Zis bann dimounn drwat pou res lor later, ek bann dimounn ki pa kapav repros zot nanye ki pou res lor la. Me bann move dimounn zot, pou tir zot lor sa later-la; ek bann tret zot, pou ras zot lor la.” (Proverb 2:21, 22) Bondie dir: “Gete! Mo pe fer tou kitsoz nouvo.”​—Revelasion 21:4, 5, NW.

3. LAFIN BANN RELIZION KI’NN DESEVWAR BONDIE EK BANN DIMOUNN.

   Labib dir: “Bann profet pe profetiz bann foste, ek bann pret pe dominn dapre zot prop lotorite. . . . Me ki zot pou fer kan lafin vini?” (Zeremi 5:31) Zezi Kris osi ti dir: “Zour zizman, pou ena boukou ki pou dir mwa: ‘Segner, Segner, lor to nom nou finn azir kouma profet, lor to nom nou finn sas bann move lespri, lor to nom ki nou finn akonpli boukou mirak.’ Lerla [“mo,” NW] pou dir zot, ‘Zame mo pa finn konn zot; sorti la ale, zot ki komet lemal.’”​—Matie 7:21-23.

4. LAFIN BANN DIMOUNN KI ANKOURAZ EK SOUTENIR BANN SITIASION KI ENA DAN LEMOND AZORDI.

   Zezi Kris ti dir: “Ala zizman la: lalimier finn vinn dan lemonn me bann dimoun finn pli kontan teneb ki lalimier parski zot manier pa bon.” (Zan 3:19) Labib koz lor enn destriksion mondial ki ti ena dan lepok Noe, enn zom fidel. “Lemond dan sa lepok-la ti detrir kan li ti kouver ar delo. Me par sa mem parol-la, lesiel ek later ki existe asterla inn rezerve pou brile par dife ek finn garde ziska zour zizman ek destriksion bann dimounn ki pena okenn respe pou Bondie.”​—2 Pier 3:5-7, NW.

Remarke ki konpar sa “zour zizman ek destriksion” ki pe vini la ar destriksion “lemond” ki ti ena dan lepok Noe. Ki lemond ki ti detrir? Se pa nou planet ki ti detrir, me “bann dimounn ki pena okenn respe pou Bondie.” Se bann lennmi Bondie ki “ti detrir.” Pandan “zour zizman,” bann ki’nn swazir pou vinn lennmi Bondie pou detrir parey. Me bann kamarad Bondie pou gagn lavi sov parey kouma Noe ek so fami.​—Matie 24:37-42.

Mazine kouma li pou extra bon pou viv lor later kan Bondie pou eliminn tou mesanste! Wi, seki Labib dir lor lafin li enn bon nouvel, pa enn move nouvel. Selman, kitfwa ou ankor pe demann ou: ‘Eski Labib dir nou kan lafin pou vini? Eski lafin pre? Kouma mo kapav sape?’