Biblical Archaeology Review ti pibliye enn lartik ki dir ki gras-a bann dekouvert arkeolozik, kapav konfirme ki “omwin 50” personaz ki mansione dan Bann Lekritir Ebre finn vremem existe. Parmi ena 14 lerwa Zida ek Izrael, kouma David ek Izkiya ki nou konn bien, ek bann ki nou pa tro kone kouma Menaem ek Peka. Parmi ena osi 5 Faraon ek 19 lerwa Lasiri, Babilonn, Moab, Pers, ek Siri. Selman, dan bann Lekritir ek dan bann resers ki bann arkeolog inn fer pa mansionn zis bann lerwa. Mansionn osi bann gran pret, enn skrib, ek lezot ofisie.

Samem lartik-la dir ki “enn kantite spesialis inn tom dakor” lor lidantite tou sa bann personaz-la. Bann Lekritir Grek Kretien osi fer referans ar boukou lezot personaz istorik, ek la osi ena bann prev arkeolozik ki konfirme ki boukou sa bann personaz-la ti existe​—kouma Erod, Pons Pilat, Tiber, Kaif, ek Serzis Polis.

Mem si azordi pena lion dan dezer Later Sint, ena apepre 150 plas dan Labib ki koz lor sa zanimo-la, ek sa montre ki bann ekrivin Labib ti konn bien sa zanimo-la. Laplipar sa bann referans-la zot sinbolik; me sertin verse koz lor bann vre lion. Par exanp, Labib dir ki Sanson, David, ek Benaya ti touy bann lion. (Ziz 14:5, 6; 1 Samiel 17:34, 35; 2 Samiel 23:20) Me sertin dimounn se bann lion ki’nn touy zot.​—1 Lerwa 13:24; 2 Lerwa 17:25.

Dan lepase, ti kapav trouv bann lion Aziatik (Panthera leo persica) dan rezion Lazi Miner ek Lagres ziska Palestinn, Siri, Mezopotami, ek dan nor-lwes Lenn. Bann dimounn ti bien per ek ti respekte sa zanimo-la. Se akoz sa ki bien souvan ti trouv li dan bann ansien travay artistik dan Proche-Orient. Miray la Voie processionnelle (semin prinsipal) dan ansien Babilonn ti dekore ar bann brik bien lis kot ti ena bann lion.

Bann dimounn dir ki bann sevalie ti lasas bann lion dan Palestinn ver lafin 12^em siek Nou Lepok. Li paret ki ti nepli ena lion dan sa rezion-la enn tipe apre lane 1300. Selman, dapre sertin dimounn, ti ankor ena bann lion dan Mezopotami ek Siri ziska 19^em siek ek dan l’Iran ek l’Irak ziska premie parti 20^em siek.