“Kinde ma ne an rawera, achiel kuom gik ma ne ochanda moloyo en ni ne an gi gombo mar nindruok gi yawuoyi wetena. Naparo ni gombogo biro rumo kaka amedo dongo, kata kamano, pod gichanda nyaka sani.”​—David, 23.

 David en Jakristo ma gombo moro Nyasaye. Be onyalo moro Nyasaye ka konchiel to chunye gombo terore gi chwo wetene? Kuom adier, Nyasaye neno nade terruok e kind chwo gi chwo kata mon gi mon?

•  Ang’o ma Muma wacho?

•  Be mano nyiso ni . . . ?

•  To nade ka . . . ?

 Oganda ka oganda kata tieng’ ka tieng’ nigi paro mopogore opogore e wi wach nindruok e kind chwo gi chwo kata mon gi mon. Jokristo to ok onego ‘oyuk kitero koni gi koni gi puonj’ mag dhano. (Jo-Efeso 4:14) Kar mano, puonj mag Muma e ma tayo kaka gineno wach nindruok e kind chwo gi chwo kata mon gi mon kata e wi timbe mamoko.

 Muma oketo chik ma winjore maler e wi wach nindruok e kind chwo gi chwo kata mon gi mon. Muma wacho niya:

•  “Kik inind gi dichwo kaka dinind gi dhako.”​—Tim Jo-Lawi 18:22.

•  “Nikech gombo mag chunygi, . . . Nyasaye noweyogi mondo giowre gi gombo mag terruok, nimar mon manie kindgi noweyo riwore gi chwogi kaluwore gi kaka nochuegi.”​—Jo-Rumi 1:24, 26.

•  “Kik wuondu. Joterruok, kata jo ma lamo sanamu, kata jochode, kata chwo ma yie mondo chwo wetegi oterre kodgi, kata chwo ma terore gi chwo wetegi, kata jokuoge, kata jo ma igi lach, kata jomer, kata joyenyo, kata jomecho, ok noyud pok e Pinyruodh Nyasaye.”​—1 Jo-Korintho 6:9, 10.

 Ji duto onego oti gi puonj mag Muma bed ni gin gi gombo mag nindruok e kind chwo gi chwo kata mon gi mon kata gin gi gombo mag nindruok e yo ma pile. Adiera en ni, ng’ato ka ng’ato onego oritre mondo kik otim gik ma Nyasaye ok oyiego.​—Jo-Kolosai 3:5.

 Be mano nyiso ni Muma jiwo ji mondo gisin gi chwo ma terore gi chwo kata mon ma terore gi mon?

 Ooyo. Adiera en ni, Muma ok dwar ni wasin gi ng’ato ang’ata, bed ni e dichwo ma terore gi chwo wetene kata dhako ma terore gi mon wetene, kata bed ni en dichwo gi dhako ma terore. Kar mano, onyisowa ni ‘wadwar kuwe gi ji duto,’ ma ok wang’iyo ni gidak e ngima ma chal nade. (Jo-Hibrania 12:14) Omiyo, ok owinjore wakwiny, kata watim mahundu, kata tim moro amora marach ne joma terore e kind chwo gi chwo kata mon gi mon.

 Be mano nyiso ni Jokristo onego okwed chike moyie mondo dichwo okend dichwo wadgi kata dhako okend dhako wadgi?

 Muma nyiso ni chik Nyasaye dwaro ni kend obed e kind dichwo achiel gi dhako achiel. (Mathayo 19:4-6) Kata kamano, chike ma sirkal keto e weche mag kend otenore kuom paro mag dhano to ok Wach Nyasaye. Muma nyiso Jokristo ni kik gidonjre e weche mag siasa. (Johana 18:36) Omiyo, ok giriw lwedo kata kwedo chike ma sirkal oketo e wi kend e kind dhako gi dhako kata dichwo gi dichwo, kata timbe mag terruok e kind joma kamago.

 To nade ka gie sani ng’ato terore gi dichwo wadgi kata dhako wadgi? Be onyalo lokore?

 Ee. Moko kuom Jokristo mokwongo nolokore! Bang’ Muma wacho ni chwo ma terore gi chwo wetegi ok bi donjo e Pinyruodh Nyasaye, omedo wacho niya: “To mano e kaka moko kuomu ne chal.”​—1 Jo-Korintho 6:11.

 Be mano nyiso ni joma oseweyo terore gi chwo wetegi kata mon wetegi koro ok nyal bedo gi gombo ma kamago kata matin kendo? Ooyo. Muma wacho niya: ‘Rwakuru kit dhano manyien, ma kokalo kuom ng’eyo malong’o, ilose kodhi nyime bedo manyien.’ (Jo-Kolosai 3:10) En lokruok ma dhi nyime.

 To nade ka ng’ato dwaro luwo chike Nyasaye to pod en gi gombo mar terore gi chwo wetene kata mon wetene?

 Ng’ato nyaloga bedo gi gombo mang’eny, kata kamano, onyalo yiero timo gik ma ogombogo kata weyo ma ok otimogi. Onyalo timo kamano nade? Muma wacho niya: “Dhiuru nyime wuotho ka roho chikou to ok ubi timo timbe ma luwore gi gombo mag ringruok ngang’.”​—Jo-Galatia 5:16.

 Ne ni ndikoni ok wach ni ng’atno ok bi bedo gi gombo mag ringruok kendo. Kar mano, ka en gi chenro maber mar puonjruok Muma kod lemo, obiro bedo gi teko mar kwedo gombo marichogo.

 David, ma ne wasewuoyo kuome motelo, noyudo ni wechego gin adier to ahinya ahinya bang’ ka nosewuoyo gi jonyuolne ma Jokristo e wi chandruokneno. Owacho kama: “Ne afuong’ora ahinya, kendo ne chalo ka gima ogol osigo moro mapek e kora. Ka dine awuoyo gi jonyuolna chon, ngimana dine obedo maber ka ne pod an rawera.”

 Adier, wabedo mamor ahinya ka waluwo chike mag Jehova. Wan gadier ni chikego “ni kare, gimiyo chuny mor” kendo “ng’at ma ritogi yudo pok maduong’.”​—Zaburi 19:8, 11.