Nsumuinu 24:1-34
24 Kualakanyi bantu babi,Ne kujingi bua kulamakanangana nabu,+
2 Bualu muoyo wabu udi welangana meji a tshikisu,Ne mishiku yabu idi yakula bua ntatu.
3 Ku meji nzubu* udi wibakibua,+Ne ku dijingulula dia malu udi ujadikibua.
4 Ku dimanya bibambalu biende mbiuwujibueNe biuma bia mushinga mukole bidi bisankisha bia mishindu yonso.+
5 Muena meji udi ne bukole,+Ne muntu udi uvudija bukole buende padiye ne dimanya.
6 Ku buludiki bua meji* neuluangane mvita yebe,+Ne mu bungi bua bafidi ba ngenyi* mudi ditshimuna.*+
7 Bua mutshimbakane mbikole bua kufikaye ku meji malelela;+Kena ne tshia kuamba ku tshiibi tshia tshimenga.
8 Muntu udi upangadija malu mabiNebamubikile ne: mulukakaji wa meji mabi munene.+
9 Kulukakaja meji a butshimbakane* kudi mpekatu,Ne bantu badi bapetula musekianganyi.+
10 Wewe mutekete mu maboko mu dituku dia dikenga,*Bukole buebe nebukepe.
11 Sungila bantu badibu baya nabu ku lufu,Ne kanda bantu badi batetuka batangile ku dishipibua.+
12 Wewe muambe ne: “Kadi katuvua bamanye bualu ebu,”
Yeye udi ukonkonona mioyo* kena ujingulula bualu ebu anyi?+
Eyowa, Yeye udi ukutangila* neamanyeNe neafute muntu ne muntu bilondeshile mudimu wende.+
13 Muananyi, diaku buitshi, bualu mbuimpe;Buitshi bua mu dipula* mbushême mukana.
14 Bia muomumue, umanye ne: meji mmimpe buebe wewe.*+
Wewe muapete, newikale ne matuku atshilualua mimpeNe ditekemena diebe kadiakumbushibua to.+
15 Kualaminyi pabuipi ne nzubu wa muntu muakane bu muenji wa malu mabi;Kubutudi muaba wende wa kuikishila to.
16 Bualu muntu muakane udi mua kukuluka misangu muanda mutekete, ne yeye neajuke kabidi,+Kadi bantu babi nebalenduke bua dikenga.+
17 Padi muena lukuna webe udishinda, kusanki to,Ne padiye ulenduka, muoyo webe kawusanki to;+
18 Tshianana, Yehowa neamone bualu ebu, neanyingalale,Ne Yeye neumbushe tshiji tshiende kudiye.*+
19 Kufiiki munda* bua bualu bua bantu babi;Kualakanyi bantu babi to,
20 Bualu kakuena matuku mimpe atshilualua bua muntu mubi;+Nebajime muendu wa bantu babi.+
21 Muananyi, tshina Yehowa ne mukalenge.+
Kubuelakanyi ne batontolodi ba malu,*+
22 Bualu dikenga diabu nedilue diakamue.+
Nnganyi udi mumanye kabutu kabatuadilabu kudi bobu bonso babidi?*+
23 Mêyi aa kabidi nga bena meji:
Kulumbuluisha ne kansungansunga ki nkuimpe to.+
24 Muntu udi wambila muntu mubi ne: “Wewe udi muntu muakane,”+
Nebamuele mulawu kudi bukua bantu, ne bisamba nebimuele patoke.
25 Kadi malu neende bimpe bua bantu badi bamubela;+Mabenesha a bintu bimpe nealue kudibu.+
26 Bantu nebatue muntu udi wandamuna malu anu mudiwu mishiku.*+
27 Longolola mudimu webe wa pambelu, ne wakaje bintu bionso mu budimi;Pashishe wibake nzubu* webe.
28 Kufidi bujadiki bua kupisha muinebe kakuyi bualu.+
Kukuatshi mudimu ne mishiku yebe bua kudinga bantu bakuabu.+
29 Kuambi ne: “Nemmuenzele anu bu mudiye mungenzele;Meme nemmufute bua tshivuaye muenze.”*+
30 Ngakapitshila pabuipi ne budimi bua muena lulengu,+Pabuipi ne budimi bua tumuma tua mvinyo bua muntu udi kayi ne lungenyi lujalame.*
31 Ngakamona ne: bisonsa bibi bivua bitumpukamu;Buloba buvua bubuikila kudi mpesa,Ne tshimanu tshiabu tshia dibue tshivua tshiupuke.+
32 Ngakatangila bualu ebu ne kubuteka ku muoyo;Ngakabumona, meme kupeta kalasa ne:*
33 Kulala ndambu, kubungila ndambu,Kuvunga bianza ndambu bua kuikisha,
34 Nunku, bupele buebe nebulue anu bu munyengianganyi wa bintu,Ne dikenguluka diebe dia bintu nedilue bu muntu muambule bia mvita.+
Note
^ Anyi “ba mu nzubu.”
^ Anyi “bulombodi bua meji.”
^ Anyi “bafidi ba mibelu.”
^ Anyi “diakalengele; lupandu.”
^ Anyi “Kulukakaja meji kua mutshimbakane.”
^ Anyi “mu bikondo bia ntatu.”
^ Anyi “malu adi mu meji.”
^ Anyi “utangila anyima webe.”
^ Anyi “dikatshi.”
^ Anyi “mmashême bua anyima webe.”
^ Mmumue ne: muluishi au.
^ Anyi “Kulunduki ne tshiji.”
^ Anyi “badi bakeba bua kushintulula malu.”
^ Mmumue ne: Yehowa ne mukalenge.
^ Anyi pamuapa: “Kuandamuna buludiludi kudi bu kutuangana mishiku.”
^ Anyi “ba mu nzubu.”
^ Anyi “Meme nemmupingajile tshivuaye muenze.”
^ Ku mua.: “udi kayi ne muoyo wa munda.”
^ Ku mua.: “Ngakapeta dilongesha ne:”
