Misambu 55:1-23
Kudi muludiki; wa kuimba tshiapamue ne biombelu bia nshinga. Masikile.* Wa Davidi.
55 Nzambi wanyi, teleja koku disambila dianyi,+Ne kubengi kuteleja dilomba dianyi dia luse.*+
2 Tumaku ntema yebe kundi ne ngandamuna.+
Bualu budi buntonde kabuena bungikishisha,+Ne ndi ndubakana mu meji
3 Bua malu adi muena lukuna wambaNe dintshintshimika dia muntu mubi.
Bualu badi bangunguijila lutatu,Ne padibu ne tshiji, badi bandamina lukuna munda.+
4 Muoyo wanyi udi ukengakana munda muanyi,+Ne buôwa bukole bua lufu mbumpite bukole.+
5 Buôwa ne luzakalu mbilue kundi,Ne lukanku lukole ndunkuate.
6 Ndi anu ngamba ne: “Bu meme nansha ne mapuapua bu nkutshi!
Mvua mua kubuuka, kuya kusombela muaba udi kawuyi njiwu.
7 Mona! Mvua mua kunyemena kule.+
Mvua mua kusombela mu tshipela.+ (Sela)
8 Mvua mua kuya lubilu muaba wa kupengamaKule ne mvunde, kule ne tshipepele tshikole.”
9 Yehowa wetu, bakondakaja ne tatakaja malu adibu balongolola bua kuenza,*+Bualu ndi mumone tshikisu ne dikokangana mu tshimenga.
10 Munya ne butuku, badi benda banyunguluka pa bimanu biatshi;Munda muatshi mudi muoyo mubi ne tshimvundu.+
11 Kabutu kadi munkatshi muatshi;Dikengeshangana ne dishima kabiena biumbuka muaba watshi wa tshinsangansanga nansha.+
12 Bualu udi umbunda* ki mmuena lukuna to;+Tshianana mvua mua kulengulula bualu abu.
Udi munjukile ki mmuluishi to;Tshianana mvua mua kumusokoma.
13 Kadi nguewe, muntu bu meme,*+Muena dianyi undi mumanye bimpe.+
14 Tuvua mu bulunda buimpe;Tuvua tuenda pamue ne tshisumbu tshia bantu bua kuya kubuela mu nzubu wa Nzambi.
15 Kabutu kabakuate!+
Bapueke mu Lukita* ne muoyo;Bualu malu mabi mmasombe munkatshi muabu ne munda muabu.
16 Kadi meme nembikile Nzambi,Ne Yehowa neampandishe.+
17 Dilolo ne dinda ne munda munya, ndi ndubakana ne ndi ntua mikemu,*+Ne yeye udi umvua dîyi dianyi.+
18 Yeye neansungile* kudi badi banduisha ne neampeteshe* ditalala,Bualu misumba ya bantu idi induila ne mvita.+
19 Nzambi neumvue ne neabandamune,+Yeye udi musombe mu nkuasa wa bukalenge katshia ku kale.+ (Sela)
Nebabenge bua kushintuluka,Bobu badi kabayi batshine Nzambi.+
20 Yeye* wakabunda bavua nende mu ditalala;+Wakashipa tshipungidi tshiende.+
21 Mêyi ende mmabotakane kupita manteka,+Kadi dikokangana didi mu muoyo wende.
Mêyi ende adi ne bufinu kupita mafuta,Kadi adi bu miele ya mvita mipatula mu bizubu.+
22 Upuila Yehowa bujitu buebe,+Ne yeye neakuambuluishe.+
Yeye kakuitaba bua muntu muakane adishinde* nansha kakese.+
23 Kadi wewe, Nzambi, neubapuekeshe mu tshina tshidi tshipite bule.+
Badi ne dibanza dia mashi ne bena mashimi kabakufika ku tshia bibidi tshia matuku abu a muoyo nansha.+
Kadi meme, nenkueyemene wewe.
Note
^ Anyi “Ne kusokomi pandi nkulomba diambuluisha.”
^ Ku mua.: “upandulule ludimi luabu.”
^ Anyi “unkeba bilumbu.”
^ Anyi “muntu, udi muomumue nanyi.”
^ Anyi “ndi ne lutoyitoyi.”
^ Ku mua.: “neankuule.”
^ Anyi “neapeteshe anyima wanyi.”
^ Mmumue ne: mulunda wa kale udibu batele mu mvese wa 13 ne wa 14.
^ Anyi “alenduke; atetuke.”
