Mutindu ya kusambila—Beto fueti sala kaka kisambu ya Tata na beto?
Mvutu ya Biblia
Kisambu ya Tata na beto kesadisaka beto beto zaba mutindu beto fueti sambila mpe yinki mambu beto fueti lomba na kisambu. Yesu pesaka yau lokola mvutu na banlonguki na yandi ntangu balombaka yandi: ‘Mfumu, longa beto mutindu ya kusambila.’ (Luka 11:1) Kasi, kisambu ya Mfumu, to kisambu ya Tata na beto, kele kaka ve kisambu mosi yina Nzambi kendimaka. a Nzokande, Yesu pesaka yau lokola kifuani samu na bisambu yina Nzambi kendimaka.
Na disolo yayi
Yinki mambu kisambu ya Tata na beto ketubilaka?
Kisambu ya Tata na beto kele ya kusonama na Matayo 6:9-13, bamesonikaka yau ve mutindu mosi na Babiblia nionso. Tala mutindu basonikaka yau na Babiblia yayi zole:
Mbalula ya Nsi-Ntoto ya Mpa: ‘Tata na beto yina kele na dizulu, bika nkumbu na nge vuanda nlongo. Bika Kimfumu na nge kuiza. Bika lukanu na nge salama na ntoto, lokola na dizulu. Pesa beto bubu yayi madia na beto samu na kilumbu yayi mpe nlemvukila masumu na beto, mutindu beto diaka beto kenlemvukilaka bantu yina mesala beto yimbi. Mpe kubika ve ti beto kubua na ntotolo, kasi vukisa beto na muntu ya yimbi.’
KBiblia ya Yeruzalemi: ‘Tata na beto kele na dizulu, nkumbu na nge ya nlongo vuanda ya lokumu, Kimfumu na nge kuiza, Luzolo na nge salama awa na ntoto lokola na dizulu. Pesa beto bubu yayi madia yina beto kele na yau mfunu. Nlemvukila beto bantu ya masumu mutindu beto mpe beto kenlemvukilaka bantu yina kesalaka beto yimbi. Kubika beto ve na kumona mpasi ya kuluta mingi, kasi katula beto na maboko ya Muntu ya Yimbi.’ b
Yinki zola monisa kisambu ya Tata na beto?
Lokola malongi ya Yesu vuandaka na nguizani na Masonukua nionso, na yau beto lenda ndima ti baverse yankaka ya Biblia kesadisa beto samu beto bakusa nsasulu ya kisambu ya Tata na beto.
‘Tata na beto yina kele na dizulu’
Yamebonga kubokila Nzambi lokola “Tata na beto” samu yandi salaka beto mpe yandi pesaka beto luzingu.—Yezaya 64:8.
‘Bika nkumbu na nge vuanda nlongo’
Bantu fueti pesa lokumu mpe kukumisa Yehova nkumbu ya Nzambi nlongo. Bantu kepesaka maboko samu na kukumisa nkumbu ya Nzambi nlongo ntangu baketubilaka bikadulu na yandi mpe baketubilaka lukanu na yandi na bantu yankaka.—Nkunga 83:18; Yezaya 6:3.
‘Bika Kimfumu na nge kuiza’
Kimfumu ya Nzambi kele guvernema ya dizulu yina Ntinu na yau kele Yesu. Yesu longaka beto sambila samu guvernema yango yadila ntoto ya mvimba.—Daniele 2:44; Kusonga 11:15.
‘Bika luzolo na nge salama na ntoto, lokola na dizulu’
Mutindu kaka mambu ya yimbi to lufua kevuandaka ve na dizulu, luzolo ya Nzambi samu na ntoto kele ti bantu nionso zinga mvula na mvula na kiyenge mpe na lutanunu.—Nkunga 37:11, 29.
‘Pesa beto bubu yayi dimpa (nyp) na beto samu na kilumbu yayi’
Na ntangu ya Yesu, dimpa vuandaka kima mosi ya mfunu ya kudia. Beto fueti zimbakana ve ti bima yina beto kevuandaka na yau nsatu samu na kuzinga kekatukaka nde na Mvangi na beto.—Bisalu 17:24, 25.
‘Nlemvukila bamfuka (nyp) na beto, mutindu beto diaka beto kenlemvukilaka bantu yina mesala beto yimbi’
Na kikapu yayi, mpova “bamfuka” zola monisa masumu. (Luka 11:4) Bantu nionso kesalaka masumu mpe bakevuandaka na nsatu banlemvukila bau. Kasi kana beto zola Nzambi nlemvukila beto, beto fueti vuanda pene ya kunlemvukila bantu yankaka kana bamesadila beto masumu.—Matayo 6:14, 15.
‘Kubika ve ti beto kubua na ntotolo, kasi vukisa beto na muntu ya yimbi’
Yehova Nzambi kentotaka beto ve samu beto sala diambu ya yimbi. (Yakobo 1:13) Kasi muntu yina kentotaka beto kele nde ‘muntu ya yimbi,’ Satana Diabulu—yina bakebokidilaka diaka “Mumeki.” (1 Yoane 5:19; Matayo 4:1-4) Beto kelombaka Yehova yandi bika beto ve beto kubua na ntotolo ya kumanga kuzitisa yandi.
Kuvutukila kisambu ya “Tata na beto” kele kaka mutindu mosi ya kusambila?
Yesu pesaka kisambu ya Tata na beto lokola kifuani. Yalomba ve beto vutukilaka mpova mosimosi ya kisambu yango. Ntangu fioti tekila yandi pesaka kisambu ya Tata na beto, Yesu pesaka nduengoso yayi: ‘Ntangu nge kena kusambila, kuvutukila ve kaka mambu yango mbala na mbala.’ (Matayo 6:7) Ntangu yandi pesaka kisambu ya kifuani na diluaku yankaka, yandi sadilaka bampova ya mutindu yankaka.—Luka 11:2-4.
Mutindu meluta mbote ya kusambila kele kusadila bampova na beto mosi ya kedika yina kena kukatuka mpenza na ntima na beto.—Nkunga 62:8.
Yinki mutindu beto fueti sambila?
Kisambu ya Tata na beto kena kumonisa kifuani ya mbote ya mutindu ya kusambila yina kesala ti Nzambi kuwa beto. Beto tala mutindu yakele na nguizani na baverse yankaka ya Biblia yina kena kutubila kisambu.
Sambila kaka Nzambi
Verse: ‘Na konso diambu na nzila ya kisambu mpe lilombo na matondo, beno zabisa Nzambi mambu yina beno kena kulomba.’—Bafilipi 4:6.
Nsasulu: Beto fueti sambila kaka Nzambi—kasi Yesu ve, Maria ve, to bantu ya nlongo ve. Na kubandaka na bampova, “Tata na beto,” Kisambu ya Tata na beto kena kulonga beto ti beto fueti sambila kaka Yehova Nzambi.
Sambila samu na mambu yina kele na nguizani na luzolo ya Nzambi
Verse: ‘Konso kima yina beto kena kulomba na nguizani na luzolo na yandi, yandi kekuwaka beto.’—1 Yoane 5:14.
Nsasulu: Beto lenda sambila samu na konso diambu yina kele na nguizani na luzolo ya Nzambi. Yesu longaka beto mfunu ya luzolo ya Nzambi na kutulaka na kisambu ya Tata na beto bampova, ‘bika luzolo na nge salama na ntoto.’ Beto lenda longuka mambu metadila luzolo ya Nzambi samu na ntoto mpe bantu na kulongukaka Biblia.
Sambila samu na mambu yina kena kutungisa nge
Verse: ‘Lozila Yehova kizitu na nge, mpe yandi kesadisa nge.’—Nkunga 55:22.
Nsasulu: Nzambi ketudilaka mitungisi na beto dikebi. Mutindu kaka Yesu kotisaka bansatu yina muntu kevuandaka na yau na kisambu ya Tata na beto, beto lenda sambila samu na bansatu na beto ya kinsuni, samu na kubaka banzengolo ya mfunu, samu na kulomba lusadusu na bantangu ya mpasi, mpe samu na kulomba nlemvo na masumu na beto. c
a Na kifuani, Yesu mpe banlonguki salaka bisambu yankaka yina vutukilaka ve mpova mosimosi ya kisambu yayi ya kifuani.—Luka 23:34; Bafilipi 1:9.
b Biblia La Bible en français courant memanisa kisambu ya Tata na beto na bampova yayi: “Samu kimfumu, kilendo, mpe nkembo kele na nge samu na mvula na mvula. Amen.” Bampova yango ya kukumisa Nzambi, kele diaka na Babiblia yankaka mezabana lokola doxologie. Kasi, bakomantere ya Biblia ya The Jerome Biblical Commentary metuba: “Doxologie . . . kele ve na [bamaniskri] ya sikisiki.”
c Bantu yina kemonaka ti Nzambi fueti nlemvukila bau, balenda kukimona lokola babonga ve na kusambila. Kasi Yehova kena kulomba bantu ya mutindu yina: ‘Beto bongisa mambu na kati na beto.’ (Yezaya 1:18) Yandi kesundolaka ve konso muntu yina kena kusosa nlemvo na yandi.