Diabulu kele yinki mutindu?

KUWA NA

Mvutu ya Biblia

Diabulu kele muntu ya kimpeve yina kemonanaka ve, yazola monisa ti yandi kele ve na nzutu ya kinsuni yina beto lenda mona—Baefezo 6:11, 12.

Bantu yankaka kemonisaka Diabulu lokola kisemua mosi yina mekokana na nkombo yina kele na bampoka, kisuka, mpe n’soma mosi ya nene. Bantu yankaka ketubaka ti bifikula yango ya Diabulu salamaka na ba artiste yina zingaka bamvula 1000 meluta.

Yinki mutindu Biblia kemonikisaka Diabulu?

Biblia kena kusadila bifuani mingi samu na Diabulu. Yakesadisa beto, beto suka kaka ve na kuzaba kana yandi mekokana na yinki, kasi mpe yinki kele kimuntu na yandi. Tala ndambu ya bifuanusu yango:

Mbasi ya kukia. Yandi kevunaka bantu na kumonisaka bau bima ya mbote samu na kutinda bau balanda banzila na yandi kasi ya Nzambi ve.—2 Bakorinto 11:14.
Nkosi yina kena kuganga. Yandi kenuanisaka na kinkesi nionso bisadi ya Nzambi.—1 Piere 5:8.
Dragoni ya nene. Yandi kebangisaka bantu, yandi kele ngolo mpe yandi kebimisaka bisumbula ya nene.—Kusonga 12:9.

Baverse ya Biblia yina ketubilaka Diabulu

2 Bakorinto 11:14: ‘Satana yandi mosi kena kutatamana kudikitula lokola mbasi ya kukia.’

Yazola monisa: Satana kesadilaka bima yina kebendaka dikebi ya bantu samu na kuvuna bau mpe balanda malongi na yandi na kisika ya kulanda malongi ya Nzambi.
Baefezo 6:11: ‘Beno vuata binuaninu nionso yina Nzambi kepesaka samu beno koka kutelemina ngolo na ntuala ya mayele ya yimbi ya Diabulu.’

Yazola monisa: Satana kesadilaka mayele ya yimbi samu na kutinda bantu babika zitisa Nzambi.
Yakobo 4:7: ‘Beno kumikitisa na ntuala ya Nzambi; kasi beno vuanda bambeni ya Diabulu, mpe yandi ketina ntama na beno.’

Yazola monisa: Muntu lenda nunga kutelemina Satana na kuzitisaka Nzambi na kisika ya kuzitisa Diabulu.
1 Piere 5:8: ‘Mbeni na beno, Diabulu, kekuendaka kuzieta lokola nkosi yina kena kuganga, yandi kena kusosa kudia muntu.’

Yazola monisa: Diabulu keyinaka bantu yina kezitisaka Nzambi mpe yandi kezolaka kubebisa nguizani na bau na Nzambi.