Nsangu ya mbote mekatuka na Yehova, Nzambi ya kiese, yina mezola ti mabuta vuanda na kiese. (1 Timoteo 1:11) Yandi bandisaka dikuela. Yau kele na mfunu dikuela sonama na buku ya Leta samu dibuta vuanda na kiese, samu yau kesalaka ti bana yunduka na kisika mosi yina ketanina bau. Baklisto fueti zitisa minsiku ya buala na yina metala kusonikisa dikuela na buku ya Leta.​—Tanga Luka 2:1, 4, 5.

Yinki mutindu Nzambi ketadilaka dikuela? Yandi kezolaka ti nketo na bakala yina mekuelana bavuanda mvimbamvimba. Yehova zola bakala na nketo bavuanda ya kukuikama mosi na muninga na yandi. (Baebreo 13:4) Yandi keyinaka kufua dikuela. (Malashi 2:16) Kasi yandi mepesa baklisto yinsua ya kufua dikuela mpe kukuela diaka kaka kana nketo to bakala mesala kinsuza.​—Tanga Matayo 19:3-6, 9.

Yehova salaka bakala na nketo samu basalasanaka na dikuela. (Kuyantika 2:18) Lokola bakala kele mfumu ya dibuta, yandi nde kele na kiyekua ya kukokisa bansatu ya dibuta na yandi, mpe kulonga bau mambu ya Nzambi. Yandi fueti zola mpe kukipesa mpenza na nketo na yandi. Bakala na nketo fueti zolanaka mpe kupesanaka luzitu. Lokola nketo na bakala bakele bantu ya kukondua kulunga, kuzaba kulemvukila nde kesadisa bau bavuanda na kiese na dibuta.​—Tanga Baefezo 4:31, 32; 5:22-25, 33; 1 Piere 3:7.

Kana beno kele na matata na dikuela na beno, beno nionso zole lenda sala ngolo samu beno sadilanaka mambu na nzola.  (1 Korinto 13:4, 5) Mpova ya Nzambi mekindisa ve beno vambana samu na kumanisa matata yina kebimaka na dikuela.​—Tanga 1 Bakorinto 7:10-13.

Yehova zola beno vuanda na kiese. Yandi kepesaka beno malongi yina kesadisa beno beno vuanda na kiese na kintuenia ya beno. Yandi kezolaka beno baka mambote na nduenga mpe mambu yina bibuti na beno kutanaka na yau. (Bakolosai 3:20) Yehova zola diaka ti beno mona kiese yina kekatukaka na kusadila Mvangi na beno na Muana na yandi.​— Tanga Longi 11:9–12:1; Matayo 19:13-15; 21:15, 16.

Beno fueti sala nionso samu na kudikila, kuvuatisa, mpe kupesa bana na beno kisika ya kuleka. (1 Timoteo 5:8) Kasi samu bana ya beno vuanda na kiese, beno fueti diaka longa bau bazola Nzambi mpe balonguka mambu na yandi. (Baefezo 6:4) Ntangu beno kena kupesa bau kifuani ya kuzola Nzambi, yau lenda simba ngolo mintima na bau. Kana beno kena kusadila Biblia samu na kulonga bana na beno, yau lenda bongisa mpenza bangindu na bau.​—Tanga Kulonga 6:4-7; Bingana 22:6.

Bana keyangalalaka kana beno kena kukindisa bau mpe kukumisa bau. Beno fueti diaka kusemba mpe kupesa bau disiplini. Kusala mutindu yina ketanina bana na bikadulu yina lenda katula bau kiese. (Bingana 22:15) Kasi, ntangu nge kena kupesa bana disiplini, nge fueti nyokola bau ve to kusadila bau mambu ya ngolongolo.​—Tanga Bakolosai 3:21.

Bambangi ya Yehova kebimisaka mikanda ya mutindu na mutindu samu na kusadisa bibuti mpe bana. Bangindu kele na mikanda yango kekatukaka na Biblia.​—Tanga Nkunga 19:7, 11.