• ယွၤကဃုထၢအီၤ. “တၢ်လၢယၤအံၤ ယပာ်လီၤလံ ယစီၤပၤလၢ . . . ယကဟ့ၣ်​ ပှၤကလုာ်တဖၣ်လၢ နန့ၢ်ဘၣ်သါတၢ်အဂီၢ်, ဒီးဟီၣ်ခိၣ်အကတၢၢ်တဖၣ်​ လၢနစုလီၢ်နခီၣ်ခိၣ် အဂီၢ်လီၤ.”—စံးထီၣ်ပတြၢၤ ၂:၆, ၈.

• ကဟဲလီၤစၢၤလီၤသွဲၣ်လၢ စီၤပၤဒၤဝံး. “ဖိသၣ်တဂၤအိၣ်ဖျဲၣ်လၢပဂီၢ်, တၢ်ဟ့ၣ်လီၤပှၤလၢ ဖိခွါတဂၤလီၤ. . . . ဒီးအဘီအမုၢ် ဒိၣ်ထီၣ်လဲၢ်ထီၣ်န့ၣ်, ဒီးအတၢ်ဃူတၢ်ဖိးန့ၣ်​ အကတၢၢ်တအိၣ်ဘၣ်. လၢစီၤဒၤဝံး အလီၢ်ပစိာ်အဖီခိၣ်, ဒီးလၢအဘီအမုၢ်အဖီခိၣ်​ ဒ်သိးအကမၤအီၤလၢ အဂၢၢ်အကျၢၤ” လီၤ.—ယၡါယၤ ၉:၆, ၇.

• ကအိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ်. ‘ဘ့ၤသလ့ဃ့ၣ်ဧၢ . . . , ပှၤကဟဲထီၣ်လၢနပူၤ ဆူယအိၣ်လၢ အကကဲထီၣ်ပှၤပၢတၢ် . . . အဝဲဒၣ်ကဒိၣ်ဝဲပၢၢ်လၢ ဟီၣ်ခိၣ်အကတၢၢ်တဖၣ်လီၤ.’—မံကၤ ၅:၂, ၄.

• ပှၤကဂ့ၢ်လိာ်ကွံာ်အီၤ ဒီးမၤသံအီၤ. “ပှၤမၤအီၤတရီတပါ, ဒီးပတပာ်ဘၣ်​ အလီၢ်ဘၣ်. . . . ဒီးဘၣ်တၢ်ဆဲးဖျိအီၤလၢ ပတၢ်ကမၣ်အဃိ, ဒီးဘၣ်တၢ်မၤသဘှံးအီၤလၢ ပတၢ်ဒဲဘးအဃိလီၤ.”—ယၡါယၤ ၅၃:၃, ၅.

• ကဂဲၤဆၢထၢၣ်​ သမူထီၣ်က့ၤလၢတၢ်သံဒီး ဘၣ်တၢ်မၤလၤကပီၤအီၤ. “နတပာ်လီၤတဲာ်ဘၣ်ယၤလၢ ပျုၤပူၤဘၣ်, နတဒုးထံၣ်ဘၣ်​ နပှၤစီဆှံလၢ တၢ်အုၣ်သံဘၣ်. . . . တၢ်အမုာ်အိၣ်လၢ နစုထွဲလီၤထူလီၤယိာ်လီၤ.”—စံးထီၣ်ပတြၢၤ ၁၆:၁၀, ၁၁.

လၢပှၤဟီၣ်ခိၣ်ဖိ အတၢ်စံၣ်စိၤတဲစိၤခဲလၢာ်အပူၤ တၢ်ကွဲးအသးတဖၣ်အံၤန့ၣ်​ လီၤပလိာ်သးထဲ ယ့ၣ်ၡူးခရံာ်တဂၤဧိၤလီၤ. တကးဒံးဘၣ်​ မူခိၣ်ကလူးတဂၤတဲဘၣ်​ အမိၢ်နီၢ်မၤရံလၢ “ကစၢ်ယွၤကဟ့ၣ်အီၤလၢ အပၢ်စီၤဒၤဝံးအလီၢ်ပစိာ်, . . . ဒီးအဘီအမုၢ်န့ၣ်​ အကတၢၢ်တအိၣ်ဘၣ်လီၤ.”—လူၤကၣ်​ ၁:၃၁-၃၃.

ယ့ၣ်ၡူးတပၢတၢ်လၢ ဟီၣ်ခိၣ်နီတဘျီဘၣ်. လၢတၢ်န့ၣ်အလီၢ် အဝဲကပၢတၢ်လၢမူခိၣ်​ ဒ်ယွၤအဘီအမုၢ် အစီၤပၤတဂၤအသိးလီၤ. အမ့ၢ်ပှၤပၢတၢ်လၢ အဂ့ၤကတၢၢ်တဂၤဒ်လဲၣ်. ပကကွၢ်သကိး ဖဲအအိၣ်လၢဟီၣ်ခိၣ်ချၢအခါ အမၤတ့ၢ်တၢ်မနုၤလဲၣ်န့ၣ်လီၤ.

•   ယ့ၣ်ၡူးသူၣ်အိၣ်သးအိၣ်ပှၤဂၤ. ယ့ၣ်ၡူးမၤစၢၤဝဲ ပှၤပိာ်မုၣ်ဒီးပှၤပိာ်ခွါ ဒီးပှၤသးစၢ် ဒီးပှၤသးပှၢ်တဖၣ်လီၤ. အဝဲသ့ၣ်အတၢ်အိၣ်သး မ့ၢ်အိၣ်ဝဲဒ်လဲၣ်ဂ့ၤဒ်လဲၣ်ဂ့ၤ ယ့ၣ်ၡူးသးအိၣ်မၤစၢၤ အဝဲသ့ၣ်ခဲလၢာ်လီၤ. (မးသဲ ၉:၃၆; မၢ်ကူး ၁၀:၁၆) ဖဲပှၤဘၣ်တၢ်ဆါအၢတဂၤ ဃ့ကညးဝဲလၢ “နသးမ့ၢ်အိၣ်လၢနကမၤ ကဆှီထီၣ်က့ၤယၤဒီး, နမၤသ့လီၤ” အခါ ယ့ၣ်ၡူးသးကညီၤဘၣ်အီၤဒီး မၤဘျါက့ၤအီၤလီၤ.—မၢ်ကူး ၁:၄၀-၄၂.

• ယ့ၣ်ၡူးသိၣ်လိပှၤ ဒ်သိးပကမၤတၢ်ဘၣ်​ ကစၢ်ယွၤအသး. အဝဲတဲဝဲလၢ “သုမၤကစၢ်ယွၤအတၢ်မၤဒီး ကျိၣ်စ့အတၢ်မၤခံမံၤလၢာ် တသ့ဘၣ်.” ဒီးအဝဲတဲလၢ ပမ့ၢ်အဲၣ်ဒိးလၢ ပှၤဂၤကရ့ဒီးပှၤဂ့ၤဂ့ၤန့ၣ်​ ပကဘၣ်ရ့ဒီးပှၤဂၤဂ့ၤဂ့ၤစ့ၢ်ကီးလီၤ. တကးဒံးဘၣ်​ အပာ်ဖျါထီၣ်ဝဲ တမ့ၢ်ထဲ အသးအိၣ်ဝဲ တၢ်လၢပမၤတဖၣ်ဘၣ်, တၢ်လၢပဆိကမိၣ်ဒီး တၢ်လၢပတူၢ်ဘၣ်တဖၣ်စ့ၢ်ကီး အသူၣ်အိၣ်သးအိၣ်ဝဲလီၤ. အဃိ ပကမၤတၢ်ဘၣ်ကစၢ်ယွၤသးအဂီၢ် ပကဘၣ်ပၢၤ တၢ်အိၣ်လၢ ပသးကံၢ်ပူၤတဖၣ်န့ၣ်လီၤ. (မးသဲ ၅:၂၈; ၆:၂၄, ခ့ခါစှီၤကျိာ်; ၇:၁၂) ဒ်သိးပကအိၣ်ဒီး တၢ်သးခုနီၢ်နီၢ်အဂီၢ် ယ့ၣ်ၡူးသိၣ်လိပှၤလၢ ပကဘၣ်မၤလိ ကစၢ်ယွၤအတၢ်ဘၣ်သးဒီး အိၣ်မူမၤထွဲအီၤလီၤ.—လူၤကၣ်​ ၁၁:၂၈.

• ယ့ၣ်ၡူးသိၣ်လိပှၤလၢ ပကအဲၣ်ပှၤဂၤအဂီၢ်. ယ့ၣ်ၡူးအတၢ်ကတိၤ ဒီးအတၢ်မၤသ့ၣ်တဖၣ်န့ၣ်​ ထိၣ်ဟူးထိၣ်ဂဲၤထီၣ်ဝဲ ပှၤလၢအဒိကနၣ်အီၤတဖၣ်အသးလီၤ. “ပှၤဂီၢ်မုၢ်တၢ်ဖၣ်န့ၣ်​ ပာ်အသးကမၢကမၣ်လၢ အသိၣ်တၢ်သီတၢ်အဃိလီၤ. အဂ့ၢ်ဒ်အံၤ, သိၣ်က့ၤသီက့ၤအီၤ ဒ်ပှၤအိၣ်ဒီးအစိကမီၤ” တဂၤအသိးလီၤ. (မးသဲ ၇:၂၈, ၂၉) ယ့ၣ်ၡူးသိၣ်လိ အဝဲသ့ၣ်လၢ “အဲၣ်သုဒုၣ်သုဒါတက့ၢ်.” တကးဒံးဘၣ်​ အဝဲဃ့န့ၢ်တၢ်လၢ ပှၤလၢအမၤသံအီၤတဖၣ်အဂီၢ်စ့ၢ်ကီး ဒ်အံၤ “ပၢ်ဧၢ, ပျၢ်အတၢ်ဒဲးဘးတက့ၢ်. အဂ့ၢ်ဒ်အံၤ, မ့ၢ်အမၤဝဲ ဒ်လဲၣ်ဒ်လဲၣ်န့ၣ်​ တသ့ၣ်ညါဘၣ်” ဝဲအဃိလီၤ.—မးသဲ ၅:၄၄; လူၤကၣ်​ ၂၃:၃၄.

ယ့ၣ်ၡူးန့ၣ်​ တုၤထီၣ်ထီၣ်ဘးလၢလၢပှဲၤပှဲၤ လၢကပၢဝဲဟီၣ်ခိၣ်အံၤ ဒီးအမ့ၢ်ပှၤလၢအသးဂ့ၤ ဒီးသးအိၣ်မၤစၢၤတၢ် ထီဘိန့ၣ်လီၤ. ဘၣ်ဆၣ်​ အဝဲစးထီၣ်​ ပၢတၢ်အခါဖဲလဲၣ်.