ဒ်န့ၣ်အသိး ပဝဲသ့ၣ်ခဲလၢာ် ပထံၣ်ဘၣ်ဒီးတၢ်အိၣ်သးလၢ အလီၤဂာ်ဒ် “ကလံၤမုၢ်” လၢအမၤဟးဂီၤတၢ်အသိးအဃိ ယ့ၣ်ၡူးတဲဝဲလၢအမ့ၢ် “တၢ်နးတၢ်ဖှီၣ်ဖးဒိၣ်” တခါန့ၣ်လီၤ. (မးသဲ ၂၄:၂၁) တၢ်နးတၢ်ဖှီၣ်ဖးဒိၣ်တခါ လၢကဟဲအံၤန့ၣ်​ ပဟးဆှဲးအီၤတန့ၢ်နီတဂၤဘၣ်. ဘၣ်ဆၣ်​ ပဃုထံၣ်န့ၢ် တၢ်အိၣ်သဒၢအလီၢ် သ့ဝဲလီၤ. ကသ့လၢကျဲဒ်လဲၣ်.

ဖဲယ့ၣ်ၡူးခရံာ် စံၣ်တဲၤတဲလီၤတၢ်လၢ ကစၢၢ်ဒီခိၣ်အခါ အဝဲဟ့ၣ်ကူၣ်ပှၤလၢ “မ့မ့ၢ် ဃုဆိယွၤအဘီအမုၢ်, ဒီးအတၢ်တီတၢ်လိၤတက့ၢ်.” (မးသဲ ၆:၃၃) ပမၤအီၤကသ့ဒ်လဲၣ်.

ဃုဆိယွၤအဘီအမုၢ်. အခီပညီန့ၣ်​ ပကြၢးထံၣ်ကစၢ်ယွၤအဘီအမုၢ်လၢ အရ့ဒိၣ်န့ၢ်ဒံး တၢ်အဂၤတဖၣ်ခဲလၢာ်လီၤ. (မးသဲ ၆:၂၅, ၃၂, ၃၃) ဘၣ်မနုၤအဃိ ပကြၢးထံၣ်အီၤဒ်န့ၣ်လဲၣ်. မ့ၢ်လၢပှၤဟီၣ်ခိၣ်ဖိတဖၣ်​ မၤဘၣ်လိာ်က့ၤဝဲ တၢ်ကီတၢ်ခဲတဖၣ်အံၤ တန့ၢ်ဘၣ်အဃိလီၤ. ထဲဒၣ်​ ယွၤအဘီအမုၢ်တခါဧိၤန့ၣ်​ ကမၤလီၤမၢ်ကွံာ်ဝဲ ပှၤဟီၣ်ခိၣ်ဖိ အတၢ်ကီတၢ်ခဲတဖၣ်​ ခဲလၢာ်န့ၣ်လီၤ.

ဃုတၢ်တီတၢ်လိၤ. ပကြၢးဂုာ်ကျဲးစၢး အိၣ်မူမၤထွဲ ယွၤအတၢ်သိၣ်တၢ်သီ လၢအတီအလိၤဒီး အတၢ်ဟံးစုနဲၣ်ကျဲလၢ အဂ့ၤကတၢၢ်န့ၣ်လီၤ. ဘၣ်မနုၤအဃိလဲၣ်. ပမ့ၢ်ပာ်ပနီၣ်​ တၢ်အဘၣ်ဒီးတၢ်အကမၣ်​ လၢပနီၢ်ကစၢ်န့ၣ်​ ပကတုၤလၢတၢ်ဟးဂီၤန့ၣ်လီၤ. (ကတိၤဒိ ၁၆:၂၅) ဘၣ်ဆၣ်​ ပမ့ၢ်အိၣ်မူဒ် ယွၤအတၢ်သိၣ်တၢ်သီအသိးန့ၣ်​ ပကမၤသးခုဘၣ်​ ကစၢ်ယွၤအသး ဒီးပနီၢ်ကစၢ်စ့ၢ်ကီး ကဒိးန့ၢ်ဘၣ်​ တၢ်ဘျုးတၢ်ဖှိၣ်န့ၣ်လီၤ.—ယၡါယၤ ၄၈:၁၇, ၁၈.

ဆဲးဃုဆိ ယွၤအဘီအမုၢ်ဒီး အတၢ်တီတၢ်လိၤတက့ၢ်. ယ့ၣ်ၡူးဟ့ၣ်ပလီၢ်ဝဲလၢ ပှၤတနီၤန့ၣ်​ ကသူၣ်ကိၢ်သးဂီၤတၢ်ဒီး အဝဲသ့ၣ်ဆိကမိၣ်ဝဲလၢ မ့ၢ်ဃုကျိၣ်ဃုစ့အါအါမး ကဒိးန့ၢ်ဘၣ်​ တၢ်ဒီသဒၢလီၤ. မ့မ့ၢ်ပှၤအဂၤ တနီၤန့ၣ်​ ဘၣ်ယိၣ်ဘၣ်ဘှီတၢ်လၢ အဝဲသ့ၣ်တၢ်အိၣ်မူအဂီၢ် အါတလၢအဃိ အဝဲသ့ၣ်တၢ်ဆၢကတီၢ်တအိၣ်လၢ ကဃုဆိယွၤအဘီအမုၢ် အဂီၢ်လၢၤဘၣ်.—မးသဲ ၆:၁၉-၂၁, ၂၅-၃၂.

ယ့ၣ်ၡူးအၢၣ်လီၤပာ်ဝဲလၢ ပှၤလၢအဆီၣ်ထွဲမၤစၢၤ ယွၤအဘီအမုၢ်တဖၣ်န့ၣ်​ အဝဲသ့ၣ်ကဒိးန့ၢ်ဘၣ်ဝဲ ကယဲၢ်တၢ်လၢအလိၣ်ဘၣ်တဖၣ်​ ဒီးတကးဒံးဘၣ်​ ခါဆူညါစ့ၢ်ကီး အဝဲသ့ၣ်ကဒိးန့ၢ်ဘၣ်​ တၢ်ဆိၣ်ဂ့ၤလီၤထူလီၤယိာ်န့ၣ်လီၤ.—မးသဲ ၆:၃၃.

ယ့ၣ်ၡူးအပျဲၢ်အဘီၣ်တဖၣ်လၢ တၢယၤဖှိၣ်အစိၤန့ၣ်​ အဝဲသ့ၣ်ဃုဆိဝဲယွၤအဘီအမုၢ် ဒီးအတၢ်တီတၢ်လိၤလီၤ. ဘၣ်ဆၣ်​ အဝဲသ့ၣ်ထံၣ်ဘၣ်ဒီး တၢ်သူၣ်ကိၢ်သးဂီၤဒီး တၢ်နးတၢ်ဖှီၣ်တဖၣ်ဒံးလီၤ. သနာ်က့ အဝဲသ့ၣ်ဒိးန့ၢ်ဘၣ်ဝဲ တၢ်ဒီသဒၢလီၤ. အဝဲသ့ၣ်ဒိးန့ၢ်ဘၣ်ဝဲ လၢကျဲဒ်လဲၣ်.

တၢ်ကီတၢ်ခဲတဖၣ်လၢ ပှၤလၢတဒိကနၣ်​ ကစၢ်ယွၤအကလုၢ်တဖၣ်​ ထံၣ်ဘၣ်ဝဲန့ၣ်​ အဝဲသ့ၣ်တထံၣ်ဘၣ်ဝဲဒၣ်ဘၣ်. မ့ၢ်လၢအဝဲသ့ၣ်​ အိၣ်မူမၤထွဲဝဲဒ် ကစၢ်ယွၤအတၢ်သိၣ်တၢ်သီ အသိးအဃိလီၤ. အဝဲသ့ၣ်နာ်ဝဲလၢ ကစၢ်ယွၤအဘီအမုၢ် ကဟဲသပှၢ်ကတၢၢ်အဃိ တၢ်အံၤမၤစၢၤအဝဲသ့ၣ်​ ဒ်သိးကလဲၤခီဖျိဝဲ တၢ်ကီတၢ်ခဲလၢအဝဲသ့ၣ်​ တၢ်အိၣ်မူပူၤအဂီၢ်လီၤ. ဒီးကစၢ်ယွၤဟ့ၣ်အဝဲသ့ၣ်​ “အစိအကမီၤဒိၣ်ကဲၣ်ဆိး” ဒ်သိး အဝဲသ့ၣ်လဲၤခီဖျိ တၢ်ကီတၢ်ခဲတဖၣ်​ ကန့ၢ်အဂီၢ်လီၤ.—၂ ကရံၣ်သူး ၄:၇-၉.

ခရံာ်ဖိလၢ တၢယၤဖှိၣ်အစိၤတဖၣ်န့ၣ်​ ဒိကနၣ်ဝဲ ယ့ၣ်ၡူးအတၢ်မၤလိာ်လၢ ဃုဆိယွၤအဘီအမုၢ်န့ၣ်လီၤ. အဝဲသ့ၣ်စံၣ်တဲၤတဲလီၤဝဲ ဘီမုၢ်တၢ်သးခုကစီၣ်တုၤလၢ တၢ်လီၢ်သကုၤဆးဒးလီၤ. (ကလီးစဲ ၁:၂၃) မုၢ်မဆါတနံၤအံၤ ပှၤမၤဝဲဒ်န့ၣ်​ အိၣ်ဝဲတဂၤဂၤဧါ.

မ့ၢ်, အိၣ်ဝဲလီၤ. ယဟိဝၤပှၤအုၣ်အသးတဖၣ်​ သ့ၣ်ညါဝဲလၢ တၢ်ဆၢကတီၢ်ဘူးထီၣ်လံလၢ ယွၤအဘီအမုၢ် ကမၤကတၢၢ်ကွံာ် ဟီၣ်ခိၣ်အတၢ်ရဲၣ်တၢ်ကျဲၤအံၤန့ၣ်လီၤ. အဃိ အဝဲသ့ၣ်ဂုာ်ကျဲးစၢး အိၣ်မူမၤထွဲဝဲ ယ့ၣ်ၡူးအတၢ်မၤလိာ်လၢ အမ့ၢ် “ဘီမုၢ်အတၢ်သးခု အကစီၣ်အံၤ, ကဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ, လၢတၢ်အုၣ်အသးလၢ ပှၤကလုာ်ခဲလၢာ်အဂီၢ်လီၤ. တုၤနုၤတစု တၢ်အကတၢၢ်န့ၣ်​ ကဟဲဘၣ်ဝဲလီၤ.”—မးသဲ ၂၄:၁၄.

ဖဲနနၢ်ဟူဘၣ်​ ဘီမုၢ်အတၢ်သးခုကစီၣ်အခါ နကြၢးမၤဒ်လဲၣ်. ပဟ့ၣ်ဂံၢ်ဟ့ၣ်ဘါနၤလၢ နကကွၢ်လိမၤဒိး ပှၤမၤက့းဒနံဖိလၢ အအိၣ်လၢဝ့ၢ်ဘ့းရံၤ ဖဲတၢယၤဖှိၣ်အစိၤန့ၣ်လီၤ. ဖဲအဝဲသ့ၣ်နၢ်ဟူဘၣ်ဝဲ ဘီမုၢ်အတၢ်သးခုကစီၣ်လၢ တၢ်မၢဖိပီလူးအအိၣ်အခါ အဝဲသ့ၣ်​ “တူၢ်လိာ်တၢ်အကလုၢ်အကထါ လၢအသူၣ်ဆူၣ်အသးဆူၣ်” အပူၤလီၤ. ဝံၤဒီးအဝဲသ့ၣ်​ ‘ဃုကွၢ် လံာ်စီဆှံတၢ်ကွဲးအသး လီၤတံၢ်လီၤဆဲး’ ဒီးတၢ်လၢအနၢ်ဟူဝဲတဖၣ်န့ၣ်​ သ့ၣ်ညါဝဲလၢ အလီၤပလိာ်ဒီး လံာ်စီဆှံတၢ်ကွဲးအသးအဃိ အဝဲသ့ၣ်အိၣ်မူမၤထွဲဝဲလီၤ.—မၤတၢ် ၁၇:၁၁, ၁၂.

နမၤဒ်န့ၣ်အသိး သ့စ့ၢ်ကီးလီၤ. ခီဖျိလၢ နဃုဆိယွၤအဘီအမုၢ်ဒီး အတၢ်တီတၢ်လိၤအဃိ နကထံၣ်န့ၢ်တၢ်ဒီသဒၢ ဒီးတၢ်ပူၤဖျဲးအလီၢ်လၢ အခဲအံၤလီၤ. ဒီးလၢခါဆူညါအဂီၢ်စ့ၢ်ကီး နကဒိးန့ၢ်ဘၣ်​ တၢ်ဃူတၢ်ဖိး ဒီးတၢ်ဘံၣ်တၢ်ဘၢန့ၣ်လီၤ.