“ಯೆಹೋವ a ಹೇಳೋದು ಏನಂದ್ರೆ ‘ನಿಮಗೆ ಒಳ್ಳೇದು ಮಾಡಬೇಕಂತ ಯೋಚ್ನೆ ಮಾಡಿದ್ದೀನಿ. ನೀವು ಶಾಂತಿ ನೆಮ್ಮದಿಯಿಂದ ಬದುಕಬೇಕು, ನಿಮಗೆ ಕೆಟ್ಟದು ಆಗಬಾರದು, ನಿಮ್ಮ ಭವಿಷ್ಯ ಚೆನ್ನಾಗಿರಬೇಕು, ನೀವು ಒಳ್ಳೇದನ್ನ ಎದುರುನೋಡಬೇಕು ಅನ್ನೋದೇ ನನ್ನ ಆಸೆ.’”—ಯೆರೆಮೀಯ 29:11, ಹೊಸ ಲೋಕ ಭಾಷಾಂತರ.

 “ಇವರಿಗೆ ಗತಿಯಾಗಲಿ, ನಿರೀಕ್ಷೆಯಿರಲಿ ಎಂದು ನಾನು ನಿಮ್ಮ ವಿಷಯದಲ್ಲಿ ಮಾಡಿಕೊಳ್ಳುತ್ತಿರುವ ಆಲೋಚನೆಗಳನ್ನು ನಾನೇ ಬಲ್ಲೆನು; ಅವು ಅಹಿತದ ಯೋಚನೆಗಳಲ್ಲ, ಹಿತದ ಯೋಚನೆಗಳೇ.”—ಯೆರೆಮೀಯ 29:11, ಸತ್ಯವೇದವು.

 ಈ ಮಾತುಗಳನ್ನು ಯೆಹೋವ ದೇವರು ಹಿಂದಿನ ಕಾಲದಲ್ಲಿದ್ದ ತನ್ನ ಜನರಿಗೋಸ್ಕರ ಬರೆಸಿದನು. ಅವರಿಗೊಂದು ಒಳ್ಳೇ ಭವಿಷ್ಯ ಸಿಗುವ ಹಾಗೆ, ಶಾಂತಿ ನೆಮ್ಮದಿಯಿಂದ ಜೀವಿಸುವ ಹಾಗೆ ಮಾಡುತ್ತೇನೆ ಅಂತ ಆತನು ಮಾತುಕೊಟ್ಟಿದ್ದನು. ಇವತ್ತು ಕೂಡ ಯೆಹೋವ ದೇವರು ತನ್ನ ಜನರಿಗೆ ಒಳ್ಳೇ ಭವಿಷ್ಯ ಸಿಗಬೇಕು ಅಂತ ಇಷ್ಟಪಡುತ್ತಾನೆ. ಆತನು ‘ನಿರೀಕ್ಷೆ ಕೊಡೋ ದೇವರು.’ (ರೋಮನ್ನರಿಗೆ 15:13) ನಿಜ ಹೇಳಬೇಕಂದ್ರೆ, ಉತ್ತಮ ಭವಿಷ್ಯಕ್ಕಾಗಿ “ನಮಗೀಗ ನಿರೀಕ್ಷೆ” ಇರಬೇಕು ಅಂತಾನೇ ಆತನು ಕೊಟ್ಟ ಆ ಮಾತುಗಳನ್ನು ಬರೆಸಿಟ್ಟಿದ್ದಾನೆ.—ರೋಮನ್ನರಿಗೆ 15:4.

 ಈ ಮಾತುಗಳು ಬಾಬೆಲಿನಲ್ಲಿದ್ದ ಇಸ್ರಾಯೇಲ್ಯರಿಗೆ ಬರೆದ ಪತ್ರದಲ್ಲಿದ್ದವು. b ಅವರು ಯೆರೂಸಲೇಮಿಂದ ಕೈದಿಗಳಾಗಿ ಹೋಗಿದ್ದರು. (ಯೆರೆಮೀಯ 29:1) ಅವರು ಆ ದೇಶದಲ್ಲಿ ತುಂಬ ವರ್ಷ ಕೈದಿಗಳಾಗಿರುತ್ತಾರೆ, ಅಲ್ಲೇ ಅವರು ಮನೆ ಕಟ್ಟಿಕೊಂಡು, ತೋಟಗಳನ್ನು ಮಾಡಿಕೊಂಡು, ಮದುವೆ ಮಕ್ಕಳು ಮಾಡಿಕೊಂಡು ಇರಬೇಕು ಅಂತ ದೇವರು ಹೇಳಿದನು. (ಯೆರೆಮೀಯ 29:4-9) ದೇವರು ಅವರಿಗೆ ಇನ್ನೂ ಏನು ಹೇಳಿದನು ನೋಡಿ: “ನೀವು ಬಾಬೆಲಲ್ಲಿ 70 ವರ್ಷ ಕಳೆದ್ಮೇಲೆ ನಿಮಗೆ ಗಮನ ಕೊಡ್ತೀನಿ. ನಿಮಗೆ ಮಾತು ಕೊಟ್ಟ ಹಾಗೆ ನಿಮ್ಮನ್ನ ವಾಪಸ್‌ [ಯೆರೂಸಲೇಮಿಗೆ] ಕರ್ಕೊಂಡು ಬರ್ತಿನಿ.” (ಯೆರೆಮೀಯ 29:10) ಈ ರೀತಿ ಅವರನ್ನು ಮರೆಯಲ್ಲ, ಅವರು ಸ್ವಂತ ಊರಿಗೆ ವಾಪಸ್‌ ಬರುವ ನಿರೀಕ್ಷೆಯನ್ನು ಖಂಡಿತ ನಿಜ ಮಾಡುತ್ತೇನೆ ಅಂತ ದೇವರು ಧೈರ್ಯ ತುಂಬಿದನು.—ಯೆರೆಮೀಯ 31:16, 17.

 ದೇವರು ಇಸ್ರಾಯೇಲ್ಯರಿಗೆ ಕೊಟ್ಟ ಮಾತನ್ನು ಉಳಿಸಿಕೊಂಡನು. ಆತನು ಮುಂಚೆನೇ ಹೇಳಿದ ಹಾಗೆ ಪರ್ಶಿಯದ ರಾಜ ಕೋರೆಷ ಬಾಬೆಲನ್ನು ಸೋಲಿಸಿದನು. (ಯೆಶಾಯ 45:1, 2; ಯೆರೆಮೀಯ 51:30-32) ಆಮೇಲೆ ಬಾಬೆಲಲ್ಲಿ ಕೈದಿಗಳಾಗಿದ್ದ ಯೆಹೂದ್ಯರನ್ನು ಸ್ವಂತ ಊರಿಗೆ ವಾಪಸ್‌ ಹೋಗಲು ಬಿಟ್ಟನು. 70 ವರ್ಷ ಆದ ಮೇಲೆ ಅವರು ಪುನಃ ಯೆರೂಸಲೇಮಿಗೆ ಬಂದರು.—2 ಪೂರ್ವಕಾಲವೃತ್ತಾಂತ 36:20-23; ಎಜ್ರ 3:1.