Îsa got: “Miletê rabe li ser milet, padşatî li ser padşatiya, cî-ciya erdhejêd mezin, xelayî-celayê û mîna nexweşiya hal wê bibin, li ezmên jî tiştêd xof û tirs û nîşanêd mezin wê biqewimin” (Lûqa 21:10, 11). Em zanin wekî bi saya xezên ser tiliya, dikarin têderxin ew destê kê ye. Anegorî wê yekê bi saya qewimandina, derheqa kîjana Îsa digot, em dikarin nîşana hatina Padşatiya Xwedê têderxin. Gelo ev qewimandin li temamiya dinyayê gerekê hevra biqewimiyana? Werên evê yekê şêwir kin.

1. ŞER

Sala 1914 şerekî usa destpêbû, ku ser gelek meriya û gelek ciya hukum kir, terîxiyêda tiştên usa neqewimîne! Terîxzan gelek car dibêjin, wekî sala 1914 terîxiya însanetê guhast, çimkî ew şerê hemdinyayê ya ewlin bû. Wî şerîda hatine xebitandinê tank, bombên hewê, gaza jerdedayî û cûre-cûre çekên xof. Pey wêra şerê hemdinyayê yê duda destpêbû, kîderê ku cara pêşin çekên atomê dane xebatê. Ji sala 1914, şer pey şerra diqewimin, ji bo çi jî bi mîlîona meriv têne kuştinê.

2. ERDHEJ

Li gora “Britannica Academic”, her sal weke 100 erdhejên qayîm diqewimin, kîjan ku “ziyaneke mezin” tînin. Usa jî li gora hesabê “Geological Survey” ya Welatên Yekbûyî, “li ser hîmê hesabên sala 1 900”, her sal dikarin 16 erdhejên mezin biqewimin. Hinek difikirin wekî erdhej zêde nebûne, lê bi saya hine têknîkên teze, meriv dikarin pêşda wana têderxin. Çi jî hebe, erdhejên mezin kîjan ku li temamiya dinyayê diqewimin, gelek ziyanê û mirinê tînin.

 3. XELAYÎ-CELAYÎ

Nav temamiya dinyayêda xelayî-celayî pêşda tên ji bo şera, korûpsiyê, problêmên aboriyêva girêdayî û ji bo gelek tiştên din. Hesabê Bernama Xwarinêye Hemdinyayêda “ya Sala 2018” hatibû gotinê: “Temamiya dinyayêda halê 821 mîlîon meriva usa xirab e, ku ewana dikarin birçî bimînin. Lê 124 mîlîon meriv îda birçîbûnêda nin”. Ji bo kêmasiya xwarinê her sal weke 3.1 mîlîon zar dimirin. Sala 2011-da, ev bû meniya sereke, ku weke 45 selef zar ser temamiya dinyayê mirin.

4. NEXWEŞIYÊN HAL

Hesabê “Organîzasiyona Saxlemxweykirinêye Hemdinyayê” usa eyan dike: “Qirna 21 îda bi çend nexweşiyên hal eyan e. Nexweşiyên kewin jî dîsa pêşda hatine, yên usa ça kolera, mirina reş û taya zer. Xêncî wê yekê nexweşiyên teze pêşda hatine, mesele SARS û MÊRS nexweşiyên pişikava girêdayî, usa jî vîrûsên xof ça Ebola û Zîka”. Rast e zandar û doxdir gelek tişt pêhesiyane derheqa wan nexweşiya, lê dîsa jî ewana nikarin wan hemû nexweşiya qenc kin.

5. BELAKIRINA MIZGÎNIYÊ SER TEMAMIYA DINYAYÊ

Çaxê Îsa derheqa rojên axiriyê pêxembertî dikir, ewî nîşanek jî eyan kir: “Ev Mizgîniya Padşatiyê wê li nav temamiya dinyayê bê dannasînkirinê, ku hemû miletara bibe şedetî û hingê xilazî wê bê” (Metta 24:14). Rast e dinyayêda gelek tiştên xirab diqewimin, lê dîsa jî heyşt mîlîon meriva zêdetir ji her miletî, 240 welatada li ser 1 000 zimana zêdetir, mizgîniya xêrê derheqa Padşatiya Xwedê bela dikin. Tiştên usa mezin terîxiya însanetêda neqewimiye.

Ev hemû tiştên ku Îsa pêxembertî kir, îro têne sêrî. Lê çima ev yek seva me ferz e? Çimkî Îsa got: “Gava hûn bibînin ku ev yek diqewimin, bizanibin ku Padşatiya Xwedê nêzîk e” (Lûqa 21:31).

Bi saya nîşan û kronolojiya Kitêba Pîroz em dikarin fem bikin, wekî Padşatiya Xwedê sala 1914-da a li ezmên hate kifşkirinê. Wî çaxî Xwedê, Kurê xwe Îsa Mesîh, kire Padşa (Zebûr 2:2, 4, 6-9). Zûtirekê Padşatiya Xwedê destpêke ser erdê serwêrtiyê bike, û ewê hemû serwêrtiyên meriva bide hildanê û erdê bike cinet, wekî meriv li ser heta-hetayê bijîn.

Dêmek, duakirina Îsa derheqa Padşatiya Xwedê, wê zûtirekê bê sêrî: “Padşatiya te bê, emirê te be, çawa li ezmên, usa jî li ser erdê” (Metta 6:10). Gelo destpêbûyî ji sala 1914, Padşatiya Xwedê çi karê tîne? Û emê çi kerema bistînin, çaxê Padşatiya Xwedê bi temamî ser însanetê serwêrtiyê bike?