Әз Һунгаристанеда шәһәре Секесфеһервареда һатьмә буйине. Тʹәрихийа ԝи ԝәлати гәләк дәԝләмәнд ә у жь 1 000 сали зедәтьр ә. Һʹәта ньһа бь кʹәсәр те бира мьн ԝәки әԝ шәрʹе һʹәмдьнйайейә дӧда зьрарәкә чьԛас мәзьн да шәһәре мә.

Бьчʹуктайа мьнда кальке мьн у пирька мьн әз хԝәй дькьрьм. Әз бь һʹьзкьрьн ԝана тиньм бира хԝә, илаһи пирька хԝә Елизабете. Әԝе нав мьнда баԝәрикә мәзьн һьндава Хԝәдеда пешда ани. Пирька мьн һәр евар дӧа дькьр у мьн жи ида се салийа хԝәда пәй ԝерʹа әԝ дӧа дьԝәкʹьланд. Ле нета ԝи дӧайи мьн һьнге фәʹм кьр, чахе әз ида ԝәкә 30 сали бум.

Чахе әз бьчʹук бум, кальке мьн у пирька мьн бона мьн хәм дькьрьн, чьмки де-баве мьн шәв у рʹож дьхәбьтин ԝәки бькарьбьн маләкә пʹак мәрʹа бькʹьрьн. Малбәта мә дӧ һʹәфтийа щарәке рʹожа Шәмийе тʹәвайи тʹоп дьбун, ԝәки тʹәви һәв нан бьхԝьн. Әԝ бона мьн рʹожед лапә хԝәш бун.

Сала 1958-да нета де-баве мьн һатә сери, ԝана мал кʹьрʹи. Шабуна ньгед мьн әʹрд нә дьгьрт, ԝәки иди әзе тʹәви де-баве хԝә бьжим, ле әве шабуне дьреж нәкʹьшанд. Шәш мәһ шунда баве мьн жь нәхԝәшийа кʹансәре мьр.

Әве йәке кӧләкә гьран кьрә дьле мьн. Те бира мьн кӧ мьн ча Хԝәдерʹа дӧа дькьр у дьгот: «Мьн чьԛас бәр тә лава дькьр, ԝәки баве мьн хьлаз ки, нә әз гәләк һʹәԝще ԝи бум. Тә чьрʹа щаба дӧайе мьн нәда?» Мьн гәләк дьхԝәст бьзаньбьн кӧ әԝ кʹӧ йә. Әз дьфькьрим, гәло әԝ әʹзмана йә, йан тʹӧ щики ида тʹӧнә йә? Мьн дәхәси ԝан зарʹа дькьр баве кʹижана һәбу.

Бь сала әз чьԛас рʹож ә дьчумә сәр мәзәл. Бәр мәзәле баве хԝә әз дькʹәтьмә сәр чока у мьн Хԝәдерʹа дӧа дькьр. Мьн дьгот: «Һиви тә дькьм, али мьн бькә әз бьзаньбьм баве мьн кʹӧ йә». Мьн ӧса жи дӧа дькьр кӧ фәʹм бькьм нета жийине чь йә.

Сездәһ салийа хԝәда мьн сафи кьр ԝәки зьмане Алмани һин бьм. Әз дьфькьрим кӧ дьбәкә әʹдәбйәтед Алманийә навдарда бькарьбьм щабед пьрсед хԝә бьвиньм. Сала 1967 әз чумә шәһәрәки Алманийайе, наве кʹижани Жәна бу, ԝәки һин бьм. Мьн мина мәрьвәки бьрʹчи кʹьтебед философед Алмани дьхԝәндьн, илаһи әԝ кʹьтеб, кʹижанада дәрһәԛа нета әʹмьр ньвисар бу. Рʹаст ә мьн һьнә фькьред һʹәԝас дитьн, ле диса жи әз тʹер нәбум, мьн щаба пьрсед хԝә нәдит. У ләма жи мьн бәрдәԝам дькьр Хԝәдерʹа дӧа бькьм, ԝәки али мьн бькә әз щабед пьрсед хԝә бьвиньм.

Сала 1970 әз пашда вәгәрʹийамә Һунгаристане кʹидәре әз рʹасти Розайе һатьм, йа кӧ ахьрийеда бу жьна мьн. Һьнге Һунгаристанеда комуниста сәрԝерти дькьрьн. Һьнә ԝәʹдә шунда паши зәԝаща мә, әз у Роза рʹәвийанә Австрйайе. Ле нета мә әԝ бу, ԝәки әм жь ԝедәре дәрбази Австралйайе бьн у шәһәре Сиднәйеда бьминьн, кʹидәре хале мьн дьжит.

Австрйайеда мьн зу хԝәрʹа хәбат дит. Рʹожәке һәвалхәбаткʹарәки мьн мьнрʹа гот, ԝәки әз дькарьм щабед пьрсед хԝә Кʹьтеба Пирозда бьвиньм. Әԝи чәнд кʹьтеб данә мьн, кʹижанада кӧ Кʹьтеба Пироз дьһатә шьровәкьрьне. Мьн бинәкерʹа әԝ кʹьтеб хԝәндьн у хԝәст һе зедә пебьһʹәсьм. Ләма жи мьн нәʹмә ньвиси Шәʹдед Йаһоԝарʹа, йед кӧ әԝ кʹьтеб нәшьр кьрьбун у мьн һиви кьр ԝәки диса әʹдәбйәта мьнрʹа бьшиньн.

Чахе сала зәԝаща мә тʹәмам бу, һәма ве рʹоже бьраки щаһьл жь Австрйайе һатә бал мә. Әԝи әʹдәбйәт ани, кʹижан кӧ мьн хԝәстьбу, у мьнрʹа гот ԝәки һинбуна Кʹьтеба Пироз дәстпекьм. Әз ԛайил бум. Әз гәләк һʹьзрәта һинбуне бум у мьн сафи кьр һʹәфте дӧ щара һин бьм. Һинбуна мә ԝәкә чар сьһʹәта дькʹьшанд.

Чь кӧ әз һин дьбум, әве йәке дьле мьн бь шабуне тʹьжә дькьр. Чахе Шәʹдед Йаһоԝа Кʹьтеба Пирозда кӧ бал мьн һәбу, наве Хԝәде Йаһоԝа нишани мьн кьрьн, мьн нькарьбу чʹәʹве хԝә баԝәр кьра. Бист һʹәфт сала әз дьчумә дере, ле ԝедәре мьн тʹӧ щар наве Хԝәде нәбьһистьбу. Щабед Кʹьтеба Пирозә зәлал у бь логики гәләк дьле мьн дьгьртьн. Мәсәлә әз пеһʹәсийам ԝәки мьри һаш жь хԝә тʹӧнә нә. Әԝана ча бежи хәԝа кʹурда ньн (Ԝаиз 9:5, 10; Йуһʹәнна 11:11-15). Әз ӧса жи пеһʹәсийам ԝәки Хԝәде дьнйа тʹәзә соз дьдә, кʹидәреда кӧ «иди мьрьне тʹӧнәбә» (Әʹйанти 21:3, 4). Һевийа мьн һәйә ԝәки әзе диса баве хԝә бьвиньм, чьмки дьнйа тʹәзәда мьри ԝе «жь мьрьне рʹабьн» (Кʹаред Шандийа 24:15).

Роза жи бь дьл ԛайил бу ԝәки Кʹьтеба Пироз һин бә. Әм ԝәʹдәки кьнда пешда чун. Әԝ әʹдәбйәта кӧ әм пе һин дьбун, мә нава дӧ мәһада хьлаз кьр. Мьн у жьна хԝә, мә ԛә щьват бәрʹнәдьда. Һʹьзкьрьн хәмкьрьн у йәктийа Шәʹдед Йаһоԝа гәләк дьле мә гьрт (Йуһʹәнна 13:34, 35).

Сала 1976 мьн у Розайе изьн станд ԝәки бькʹәвьнә Австралйайе. Ԝедәре мә дәрберʹа Шәʹдед Йаһоԝа дитьн. Шәʹдед ԝедәре ӧса бь дьл у щан әм ԛәбул кьрьн, ԝәки әм гәләк зу һини ԝи щийи бун. Сала 1978-да әз у жьна хԝә һатьн ньхӧмандьне.

Ахьрийеда мьн щабед пьрсед хԝә станд кʹижан кӧ гәләк сал әз дьчәрчьрʹандьм. Чахе әз незики Йаһоԝа Хԝәде бум, мьн бавәки лапи баш у дьлшәԝат дит (Аԛуб 4:8). Мьн ӧса жи дьлбиникә мәзьн станд, чьмки дьнйа тʹәзәда әзе бькарьбьм баве хԝәйи дәлал бьвиньм (Йуһʹәнна 5:28, 29).

Сала 1989 мьн у Розайе сафи кьр ԝәки вәгәрʹьнә Һунгаристане, сәва мәрьвед хԝәйи незикрʹа, һәвалед хԝәрʹа у мәрьвед дьнрʹа дәрһәԛа баԝәрийа хԝәйә тʹәзә гьли кьн. Бона мә ԛәдьрәки мәзьн бу ԝәки мә тʹәви бь сәда мәрьва һинбуна Кʹьтеба Пироз дәрбаз кьр. Жь ԝан 70 мәрьви зедәтьр у ӧса жи дийа мьн һатьнә ньхӧмандьне.

Һʹьвдәһ сала мьн Хԝәдерʹа дӧа дькьр, ԝәки щабед пьрсед хԝә бьвиньм. Сив нәһ сал дәрбаз буйә у әз диса бәрдәԝам дькьм дӧа дькьм, ле ньһа әз дьбежьм: «Гәләк рʹази мә Баве мьни ширьн, ԝәки тә щаба гәде бьчʹук да».