Әз ль Лондонеда һатьмә буйине, дь маһала Падингтонеда. Мьн тʹәви дийа хԝә у се хушкед хԝәйи мәзьн дьжит. Баве мьн жь бо вәхԝарьна ичке ԛә малда нәдьма.

Чахе әз бьчʹук бум, дийа мьн әз һиндькьрьм һәр евар дӧа бькьм. Щәм мьн кʹьтеба Зәбур һәбу, у мьн хԝәрʹа кʹьлам чедькьрьн сәва кӧ ԝан Зәбура бьстьрем. Те бира мьн, ча щарәке кʹьтебәкеда мьн тʹьштәк хԝәнд, чь кӧ әз тьрсандьм. Ԝе дәре ньвисар бу: «Щарәке ԝе рʹожа сьбе ида тӧнә бә». Жь бо ԝан гьлийа, әз евара нькарьбум разама у дәрһәԛа ахьрийе дьфькьрим. Мьн хԝәрʹа дьгот: ‹Нә нета жийине гәрәке һәбә? Чира әз һатьмә дьне?› Мьн нәдьхԝәст бьмьрьм!

Мьн дәстпекьр сербази у кочʹәктийева мьжул бьм. Мьн дьхԝәст тʹәви мьрийа хәбәр дьм, ләма жи әз тʹәви һәвалед хԝәйә мәктәбе дьчумә сәр мәзәла, әм ӧса синәмед (кино) тьрсәһез дьньһерʹин. Әм дьфькьрин, кӧ әԝ һʹәму тьшт һьм һʹәԝас ьн һьм жи тьрсәһез ьн.

Чахе әз дәһә сали бум әз бумә йәкә хԝәһʹьз. Мьн дәстпекьр тʹьтʹуне бькʹьшиньм у ахьрийеда әз вева һатьме гьредане. Һьне ԝәʹдә шунда мьн дәстпекьр марихуане бькʹьшиньм. 11 салийа хԝәда мьн дәстпекьр ичке тәʹм кьм. Рʹаст ә тәʹма ичке мьн һʹьз нәдькьр ле мьн бәгәм дькьр кӧ жь бо ве йәке әз сәрхԝәш дьбум. Мьн ӧса жи мьԛам у рәԛас һʹьз дькьр. Мьн ԝәʹдәдәрбазкьрьн гәләк һʹьз дькьр у дьчумә клубед шәве. Әз евара дәрдькʹәтьм у бәрбанге вәдьгәрʹийамә мал. Рʹожа дьн әз ида ԝәстийайи бум у жь бо ԝе йәке мьн тʹьме мәкʹтәб бәрдьда. Ле чахе әз дьчумә мәкʹтәбе, ԝәʹде чәнд дәԛе һесабуне мьн ичкә вәдьхԝар.

Сала пашьнә мәкʹтәбеда, әз гәләк хьраб һин дьбум. Чахе дийа мьн пеһʹәсийа дәрһәԛа кьред мьнә хьраб, у дит кӧ чаԝа әз хьраб һин дьбьм, әԝ гәләк дьлтәнг у һерс бу. Мә һәврʹа шәрʹ кьр у әз жь мале рәвʹийам. Чәндәке мьн тʹәви һәваләки хԝә Тони дьжит. Әԝи хԝә ль дине Растафари дьгьрт. Тони дьзийед бьчʹук дькьр у наркотика дьфьрот, һьм жи әԝ әʹйан бу ча мәрәвәки зӧлм. Зутьрәке әз гьран дәркʹәтьм у чахе 16 сали бум, кӧрʹ мәрʹа һатә буйине.

Щара пешьн әз рʹасти Шәʹдед Йаһоԝа һатьм, чахе мьн ԝи ханида дьжит, кʹижан кӧ бона ԝан кʹӧлфәта бу, йед кӧ тʹәне зарʹед хԝә мәзьн дькьрьн. Ви ханида, дәԝләте отʹах дабу мьн. Дӧ кʹӧлфәт йед кӧ Шәʹдед Йаһоԝа бун, тʹьме дьһатьн ханийе мә у тʹәви дайикед щаһьл хәбәр дьдан. Щарәке мьн жи тʹәви ԝан хәбәр да. Мьн дьхԝәст избат кьм ԝәки әԝана нәрʹаст ьн. Ле ԝана сәр һʹиме Кʹьтеба Пироз щаба һʹәму пьрсед мьн дан. Әԝана мәрьвнә ԛәнщ у дьлрʹәʹм бун, чь кӧ гәләк мьн хԝәш һат. Ләма жи әз ԛайил бум кӧ әԝана һинкьрьна Кʹьтеба Пироз тʹәви мьн дәрбаз кьн.

Һьнә ԝәʹдә шунда әз жь Кʹьтеба Пироз тьштәки ӧса пеһʹәсийам, чь кӧ жийина мьн гӧһаст. Бьчʹуктайа хԝәда әз мьрьне дьтьрсийам. Ле ньһа әз пеһʹәсийам дәрһәԛа сахкьрьне, чь кӧ Иса һин дькьр (Йуһʹәнна 5:28, 29). Ӧса жи әз пеһʹәсийам, ԝәки Хԝәде бона мьн хәм дькә (1 Пәтрус 5:7). Гьлийед жь Йерәмйа 29:11 гәләк дьле мьн гьртьн. Ль вьр Йаһоԝа дьбежә кӧ рʹьнд занә ԝәки чь бона мә ԛьрар кьрийә. Демәк әԝи бона мә әʹдьлайи ԛьрар кьрийә нә кӧ хәзәб, у әԝ ахьрикә баш мәрʹа соз дьдә. Ләма жи мьн дәстпекьр баԝәр бькьм кӧ әз жи дькарьм дь Щьнәтеда ль сәр әʹрде һʹәта-һʹәтайе бьжим (Зәбур 37:29).

Шәʹдед Йаһоԝа бь рʹасти жи һʹьзкьрьна хԝә һьндава мьнда данә кʹьфше. Чахе әз щара пешьн чумә щьватед ԝан, һʹьзкьрьна ԝан ль сәр мьн һʹӧкӧм бу, чьмки һәр кәс һәвалһʹьз бу! (Йуһʹәнна 13:34, 35) Бь рʹасти жи әԝана гәләк щӧдә дьбун жь ԝе дере, кʹидәре кӧ әз дьчум. Шәʹдед Йаһоԝа бь дьл у щан әз ԛәбул кьрьм у нәньһерʹин ль сәр һале мьн. Ԝана ԝәʹде хԝә сәр мьн хәрщ дькьрьн, бона мьн хәм дькьрьн у аликʹарийа керһати дьданә мьн. Мьн хԝә тʹәхмин кьр ԝәк пʹарәкә малбәта мәзьн, нава кʹижанида кӧ һʹьзкьрьн һәйә.

Жь һинбуна Кʹьтеба Пироз мьн фәʹм кьр кӧ гәрәке жийина хԝәда тьштәки бьгӧһезьм, сәва кӧ ль гора нормед Хԝәдейи нав-намусийе бьжим. Мьрʹа һеса нибу тʹәрка тʹьтʹуне бьдьм. Хенщи ԝе йәке, мьн фәʹм кьр ԝәки һьнә мьԛамед кӧ мьн дьбьһист, мьн һелан дькьн марихуанайе бькʹьшиньм. Ләма жи мьн мьԛамед хԝә гӧһаст. Мьн нәдьхԝәст диса жи сәрхԝәш бьм, ләма жи әз ида нәдьчум клубед шәве у щийед дьн, кʹидәре кӧ әз дькарьбум диса жи бькʹәтама бәр байе ичке. Мьн һәвалед ну хԝәрʹа дьгәрʹийа, йед кӧ ԝе баш ль сәр мьн һʹӧкӧм кьрана, у али мьн бькьрана, ԝәки жийина хԝә бьгӧһезьм (Мәтʹәлок 13:20).

Хенщи ԝе йәке Тони жи дәстпекьр тʹәви Шәʹдед Йаһоԝа Кʹьтеба Пироз һин бә. Чахе Шәʹдед Йаһоԝа щаба пьрсед ԝи бь Кʹьтеба Пироз дан, әԝ баԝәр бу кӧ әв һәйә рʹасти. У әԝи гӧһастьнед мәзьн жийина хԝәда кьр; әԝи һәвалед хԝәйә зӧлм һишт, тʹәрка дьзийед бьчʹук да у һәла һе марихуана жи тʹәрьканд. Сәва кӧ бь тʹәмами дьле Хԝәде ша кьн, мә фәʹм кьр, кӧ гәрәке шьхӧлед хԝәйи бенамуси бьһельн у дәрәщәкә баш сәва кӧрʹе хԝә чекьн. Дь сала 1982-да әм зәԝьщин у һәләԛәтийа мә ида ԛануни бу.

Те бира мьн ча мьн журналед «Бьрща Ԛәрәԝьлийеда» у «Һʹьшийар Бьн!» * готар дьгәрʹийан дәрһәԛа сәрһатийа ԝан мәрийа, йед кӧ жийина хԝә гӧһастьн у сәрфьраз бун, чь кӧ мьрʹа лазьм бу. Мәсәла ԝан, гәләк әз һелан дькьрьм! Мьн ԛәԝат станд кӧ һʹәму тьшти бькьм ԝәки бемә гӧһастьне у сьст нәбьм. Мьн бәрдәԝам дькьр Йаһоԝарʹа дӧа кьм кӧ әԝ мьн нәһелә. Әз у Тони сала 1982 мәһа Тирмәһе һатьнә ньхӧмандьне у бунә Шәʹдед Йаһоԝа.

Достийа мьн тʹәви Йаһоԝа Хԝәде, жийина мьн хьлаз кьр. Мьн у Тони ԝәʹде чәтьнда тʹьме пьштгьрийа Йаһоԝа ль сәр хԝә тʹәхмин дькьр. Әван чәтьнайа әм һин кьрьн итʹбарийа хԝә Хԝәде биньн, у ньһа жи әм тʹәхмин дькьн кӧ әԝ һәр гав али малбәта мә дькә у мә ԛәԝи дькә (Зәбур 55:22).

Әз гәләк ша мә кӧ дькарьм аликʹарийе бьдьмә кӧрʹ у ԛиза мә, ԝәки әԝана жи мина мьн Йаһоԝа нас кьн. Ньһа әз дьлша мә чахе дьвиньм кӧ чаԝа нәбичʹьркед мьн занәбуне дәрһәԛа Хԝәде дьстиньн у пешда дьчьн.

У ньһа евара әз дькарьм архайин рʹазем у бәрхԝәнәкʹәвьм дәрһәԛа ахьрийе у мьрьне. Ньһа әз у Тони һәр һʹәфтийе сәрледана щурʹә-щурʹә щьватед Шәʹдед Йаһоԝа дькьн, сәва кӧ ԝана һелан кьн. Әм тʹәви ԝана аликʹарийе дьдьнә мәрьвед дьн сәва кӧ баԝәрийа хԝә Иса биньн, у бькарьбьн жийина абадин демәк жийина һәрһәйи бьстиньн.