Әз дь гӧнде Саксонйайеда һатьмә буйине, йе кӧ бәре дькʹәтә Кʹомара Демократик йа Алманйайе (GDR). Мала мә бь һьзкьрьн тʹьжә бу у де-баве мьн жи әз һин кьрьмә, кӧ бь нормед нав-намусийе бьжим. GDR Комунисти бу, ләма жи бона гәләк мәрьвед Саксонйайе, религийа тьштәкә муһим нибу. У мьн жи һʹәсаб дькьр кӧ Хԝәде тʹӧнә. Атеизм у Комунизме гәләк һʹӧкӧм кьрьн сәр 18 салед мьнә пешьн.

Чьма Комунизм мьн хԝәш һат? Чьмки мьн гәләк бәгәм дькьр әԝ фькьр, кӧ һʹәму мәрьв ԝәк һәԝ ьн. Хенщи ве йәке мьн һʹәсаб дькьр, кӧ тʹәмамийа һәбуке гәрәке бь һәԛийе нава мәрьвада бе пʹаравәкьрьне, чьмки ида фьрԛи ԝе тʹӧнә буйа ортʹа дәԝләмәндтийе у фәԛирийе. Ләма жи әз кʹәтьмә нава тʹәшкиләта Комуниста йа бона щаһьла. Чахе әз 14 сали бум, мьн гәләк ԝәде хԝә хәрщ дькьр, кӧ бона екологйайе хәм бькьм, демәк әз дьхәбьтим кӧ кʹахазед нәлазьм тʹәзә кьм. Мәрьвед шәһәре Ауе ӧса мьрʹа рʹази бун сәва шьхӧле мьн, кӧ һʹӧкӧмдаред ԝан һәла һе әз хәлат жи кьрьм. У ида ԝи чахи мьн ӧса жи һьнә мәрьве политикийә GDR нас дькьр, йед кӧ мәрьвнә бь нав у дәнг бун. Мьн тʹьре кӧ әз бәрбь нетәкә рʹаст дьчьм у кӧ ахьрийа мьн ԝе баш бә.

Паше, ньшкева нет-мәрәмед мьн бәта вәбун. Дь сала 1989-да Диԝаре Берлине у блока рʹӧһʹьлате йа Комунизме һатә һьлшандьне. Әз гәләк әʹщебмайи дьмам. Зутьрәке мьн тедәрхьст, кӧ дь GDR-да нәрʹасти гәләк бәлабуйи йә. Мәсәлә мәрьвед кӧ пьштгьрийа Комунизме нәдькьрьн, ча бажарванед бекер дьһатьнә һʹәсабе. Ле чьма ӧса бу? Нә Комунизм дьбежә кӧ һʹәму мәрьв ԝәк һәв ьн. Йан кьред Комунизме жь хәбәрдана ԝан, һәв щӧдә дьбә? Әз гәләк хәмгин бум.

Ләма жи мьн нетед хԝә гӧһаст у әз музикайева у нәԛьшькьрьна шьклава мьжул бум. Әз мәкʹтәба музикайе йа бьльнда һин дьбум, у мьн нет да пешийа хԝә дәрбази заньнгәһе бьм, чьмки әз һьзрәт бум бьбьмә музиканте щерʹьбанди у нәхшкʹар. Хенщи ԝе йәке әз жь нормед нав-намусийе дур кʹәтьм, кӧ зарʹотийеда әз һин кьрьмә. Ԝи чахи бона мьн даһа фәрз бу, кӧ тʹәви чәнд кәчʹька ԝәʹдә дәрбаз кьм. Чь жи һәбу, мьԛам, нәԛьшкьрьна шькьла у жийина нәщайиз, хәмед мьн кем нәкьрьн. Һәла һе әв шькьл жи, кʹижан мьн нәԛьш дькьр, тьрс дьданә кʹьфше. Чь ахьри һивийа мә йә? У нета жийине чь йә?

 Ахьрийе чахе мьн щаба пьрсед хԝә дит, әз әʹщебмайи мам. Щарәке еваре дь заньнгәһеда әз рʹуньштьбум тʹәви кʹома шагьрта, йед кӧ дәрһәԛа ахьрийе шеԝьр дькьрьн. Менди * шагьрта заньнгәһа мә, Шәʹде Йаһоԝа бу. Ԝе еваре әве ширәтәкә баш да мьн. Әԝе гот: «Андреас, һәрге тӧ дьхԝази щабед пьрсед хԝә бьстини йед кӧ жийин у ахрийева гьредайи нә, рʹьнд дина хԝә бьдә Кʹьтеба Пироз».

Мьн сәд сәләфи баԝәр нәкьр, ле йәкә мьн сафи кьр дь Кʹьтеба Пирозда щабед ԝан пьрса бьгәрʹьм. Менди дина мьн дабу сәр кʹьтеба Данийел сәре 2, у чахе мьн хԝәнд әз гәләк әʹщебмайи мам. Әв пʹехәмбәрти шьровәдькә дәрһәԛа рʹеза һʹӧкӧмдарийа, йед кӧ һʹәта рожа иройин жи гәләк һʹӧкӧм дькьн. Менди ӧса жи пʹехәмбәртийед дьн жь Кʹьтеба Пироз мьнрʹа нишан кьр, кʹижан кӧ ахьрийа мәва гьредайи нә. Шькьр, мьн щаба пьрсед хԝә дит! Ле гәло кʹи әв пʹехәмбәрти ньвисин, у кʹи дькарьбу ӧса рʹастә-рʹаст ахьрийе әʹйан кә? Мьнрʹа зәлал бу, кӧ Хԝәде һәйә у тʹәне Әԝ дькарә һʹәму тьшти әʹйан кә.

Менди әз дамә наскьрьне тʹәви Һорст у Ангеликайе. Әв жьн-мер Шәʹдед Йаһоԝа бун. Ԝана али мьн кьр һе рʹьнд Хәбәра Хԝәде фәʹм кьм. Мьн дәрбера тедәрхьст кӧ тʹәне Шәʹдед Йаһоԝа әԝ тʹәшкиләт ә, йа кӧ тʹьме дина хԝә дьдә сәр наве Хԝәдейи шәхси, демәк Йаһоԝа, у әви нави дьдьнә хәбате (Зәбур 83:18; Мәтта 6:9). Әз пеһʹәсийам кӧ Йаһоԝа Хԝәде һевийе дьдә инсанәте, кӧ һәр-һәйи ль сәр әʹрде щьнәте бьжин. Зәбур 37:9 дьбежә: «Йед ль Хӧдан сәбьр дькьн, әԝе ль әʹрде ԝар бьн». Әве йәке дьле мьн гьрт чьмки әв һеви сәва ԝан һʹәму мәрийа нә, йед кӧ ԛәԝате дьдьнә хәбате, ԝәки ль гора нормед Хԝәде бьжин.

Мьнрʹа һеса нибу жийина хԝә бьгӧһезьм у ль гора Кʹьтеба Пироз бьжим. Һьм музикеда, һьм жи нәԛьшкьрьнеда әз гәләк пешда дьчум у сәрфьраз дьбум. Жь бо ве йәке әз бумә йәки бабах. Ләма жи пешийе әз гәрәке мьлуктийе һин бума. Мьнрʹа ӧса жи һеса нибу жийина хԝәйә нәщайиз бьһельм. Әз чьԛас рʹази мә, кӧ Йаһоԝа мәрийа фәʹм дькә. Әԝ ӧса жи сәбьре у дьлрʹәмийе дьдә кʹьфше һьндава ԝан мәрьвада, йед кӧ бь принсипед Кʹьтеба Пироз дьжин!

Комунизм у Атеизм 18 салед мьни пешьнда алийе хьрабда әз гӧһастьмә, ле Кʹьтеба Пироз жийина мьн алийе башда гӧһаст. Чь кӧ әз педьһʹәсийам, хәмгинийа мьн дәрһәԛа ахьрийе дьтәмьранд у мьн нета жийине дит. Дь сала 1993-да, әз һатьмә ньхӧмандьне у бумә Шәʹде Йаһоԝа. У сала 2000-да әз тʹәви Табитайе зәԝьщим, кʹӧлфәтәкә хирәт йа кӧ ԝәк мьн Хԝәде баԝәр дькьр. Мә гәләк ԝәʹдә хәрщ дькьр кӧ али мәрийа бькьн, сәва Кʹьтеба Пироз нас кьн. Ньһерʹандьна гәләк мәрийа, йед кӧ рʹасти мьн тен, ль сәр һʹиме Комунизме у Атеизме һатә сазкьрьне. Мьнрʹа гәләк һʹәԝас ә ԝанарʹа гьли кьм, кӧ чаԝа Йаһоԝа нас кьн.

Чахе әз щара пешийе тʹәви Шәʹдед Йаһоԝа текли бум, де-баве мьн гәләк әʹщебмайи ман. Ле һьнгеда ԝана дит, кӧ чаԝа һәвалтийа мьн тʹәви ԝана, баш сәр жийина мьн һʹӧкӧм дькә. Әз гәләк ша мә кӧ ньһа де-баве мьн Кʹьтеба Пироз дьхуньн у тенә сәр щьватед Шәʹдед Йаһоԝа.

Әз у Табита зәԝаща хԝәда бәхтәԝар ьн, чьмки әм дьхәбьтьн кӧ хԝә ль ԝан ширәта бьгьрьн, йед кӧ Кʹьтеба Пироз дьдә жьн-мера. Мәсәлә әв кӧ әм дьдьнә хәбате ширәте дәрһәԛа амьнйа зәԝащеда, зәԝаща мә даһа ԛәԝи дькә (Ибрани 13:4).

Ньһа ида әз жь жийине натьрсьм у дәрһәԛа ахьрийе жи бәрхԝәнакʹәвьм. Әз кʹәтьмә нава малбәта һʹәмдьнйайе йа ԝан мәрийа, йед кӧ ԝәк мьн Хԝәде дьһʹәбиньн у нава кʹижана кӧ һәйә әʹдьлайа рʹаст у йәкти. Дь ве малбәтеда кәсәк жь йед дьн хԝә бьльнд һʹәсаб накә. Әԝ һʹәма әԝ ә чь кӧ әз һивийе бум у тʹәмамийа жийина хԝәда һьзрәт бум бьгьһижьмә ве йәке.