Чахе әз бьчʹук бум, малбәта мьн незики Лейпзике, Алманйа Рʹоһьлате дьжит, кʹижан кӧ бәр синора Чехйа у Полонйайе бу. Чахе әз шәш сали бум, жь бо хәбата баве мьн, әм дәрбази Бразилйайе бун у паше Әкԝадоре.

Чахе әз 14 сали бум, де-баве мьн әз шандьмә мәкʹтәба Алманйайе, кʹидәре зарʹ һьм һин дьбун, һьм ԝедәре дьжитьн. Жь бо ве йәке кӧ де-баве мьн Америкайа Башуреда бун у жь мьн гәләк дур бун, әз мәщбур бум хԝәха мьԛати хԝә бьм. Әз бумә йәки ԛӧрʹә у хԝәсәрихԝә. Ԛә хәма мьн нибу, кӧ кьред мьн ԝе ча сәр мәрьвед дьн һʹӧкӧм бьн.

Чахе әз 17 сали бум, де-баве мьн вәгәрʹийанә Алманйайе. Серида мьн тʹәви ԝан дьжит. Ле жь бо хәйсәте хԝәйи гьран у ԛӧрʹә мьн нькарьбу гәләк ԝәхт тʹәви ԝан бьжита. Чахе әз 18 сали бум, әз жь мале чум.

Мьн бь хирәт нета жийине дьгәрʹийа. Әз дькʹәтьмә щурʹә-щурʹә щьвака у тʹәшкиләта. У паше әз һатьмә сәр ве нете, ԝәки дьһа баш ә әз планета мә леколин кьм, һʹәта кӧ мәрьва әв бь тʹәмами кʹӧта нәкьрьнә.

Әз жь Алманйайе чум, мьн хԝәрʹа мотосиклет кʹьрʹи у мьн хԝәст һәрʹьмә Африкайе. Зутьрәке мотосиклета мьн шкәст у әз мәщбур бум вәгәрʹьмә Әԝропайе. Һьнә ԝәʹдә шунда әз ида ль Португалйайе бәр дәве бәʹре бум. Мьн сафи кьр ԝәки ида пе ԛәйьке рʹеԝитийе бькьм.

Әз кʹәтьмә нава кʹомәкә щаһьла, кʹижан кӧ һазьр дьбун окйануса Атлантикерʹа дәрбаз бьн. Нав ԝанда әз рʹасти Лаурайе һатьм, кʹижан кӧ ахьрийеда бу жьна мьн. Пешийе әм бь ԛәйьке бәрбь гьравед Карибе чун, паше әм һьнә ԝәхт Порто-Рикойеда һеса бун у щарәкә дьн вәгәрʹийанә Әԝропайе. Мьн у Лаурайе дьхԝәст ԛәйькәкә бьчʹук дәстхьн, паше әԝе бькьнә йа бь мотор, сәва кӧ бькарьбьн рʹеԝитийа дьреж бькьн. Ле се мәһ шунда һʹәму тьшт һатә гӧһастьн, чьмки Алманйайе гази мьн кьр, кӧ һәрʹьм әскәрийе.

Панздәһ мәһа мьн Алманйайеда щийе гәмийед әскәрийе ԛӧльх дькьр. Ԝи ԝәʹдәйида әз у Лаура кʹәтьнә зәԝаще у әм һазьр дьбун диса рʹеԝитийа хԝә бәрдәԝам кьн. Һьнә ԝәʹдә пешийа чуйина мьнә әскәрийе, мә ԛәйькәкә бона хьлазкьрьна мәрьва кʹьрʹи, ле һащәтед ԝе тʹӧнә бун. Ԝәʹде ԛӧльхкьрьна мьнә әскәрийеда, мә әв ԛәйьк һеди-һеди чекьр. Мә дьхԝәст ве ԛәйькеда бьжита у бәрдәԝам кьра планета мә леколин кьра. Һәма ԝи чахи, гава мьн ԛӧльхкьрьна хԝәйә әскәрийе хьлаз кьр у ԛәйьк һе чедькьр, әм рʹасти Шәʹдед Йаһоԝа һатьн у мә һинбуна Кʹьтеба Пироз дәстпекьр.

Серида мьн тедәрнәдьхьст, ԝәки гәрәке нав хԝәда гӧһастьна бькьм, чьмки зәԝаща мьн ԛануни бу у мьн тʹәрка щьхаре жи дабу (Әфәси 5:5). Ле хԝәстьна мәйә кӧ нав тʹәмамийа дьнйайе рʹеԝитийе бькьн, мьн тʹьре әва тьштәки баш ә, чьмки бь ве йәке мә дькарьбу әʹфринед Хԝәдейә бәдәԝ леколин кьра.

Ле бь рʹасти мьнрʹа лазьм бу һьнә гӧһастьна бькьм, илаһи хәйсәтед хԝәда. Әз йәки гәләк ԛӧрʹә у хԝәсәрихԝә бум у һʹьш аԛьле мьн сәр сәрԝахтийа мьн бу, кӧ ча һʹәму тьшт мьнрʹа һәв те, у диса чь бькьм кӧ дьһа пешдачуйи бьм. Кʹеф-кʹефа мьн бу, дьне дьнйа мьн бу.

Рʹожәке мьн Хьзмәткьрьна Исайә сәр Чʹийе хԝәнд (Мәтта сәре 5-7). Серида гьлийе Исайә дәрһәԛа шабуне у бәхтәԝарийе, әз әʹщебмайи кьрьм. Мәсәлә әԝи гот, ԝәки мәрьвед тʹи у бьрʹчи бәхтәԝар ьн (Мәтта 5:6). Әз дьфькьрим ԝәки мәрьве кӧ һʹәԝщәтийа ԝи һәйә, ча дькарә бәхтәԝар бә. Ԝәʹде һинбуна Кʹьтеба Пироз мьн фәʹм кьр, кӧ һәр кәс жь мә һʹәԝщед тьштед рʹӧһʹани йә. Ле сәва кӧ әве һʹәԝщәтийе рʹази кьн, әм гәрәке бь мьлукти биньн сәр хԝә, ԝәки әм һʹәԝщә нә. Чаԝа кӧ Иса гот: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани» (Мәтта 5:3, ДТʹ).

Паши ԝе йәке кӧ мьн у Лаурайе Алманйайеда һинбуна Кʹьтеба Пироз дәстпекьр, әм дәрбази Франсайе бун. Ле һьнә ԝәхт паше, дәрбази Италийайе бун. Әм кʹӧда жи дьчун, мә Шәʹдед Йаһоԝа дьгәрʹийа у әԝана дьдитьн. Йәктийа ԝан у һʹьзкьрьна ԝанә һʹәлал һьндава һәвда, гәләк дьле мьн дьгьрт. Мьн фәʹм кьр ԝәки рʹасти жи Шәʹдед Йаһоԝа бьратийа һʹәмдьнйайе нә (Йуһʹәнна 13:34, 35). Паши һьнә ԝәʹдә әз у Лаура һатьнә ньхӧмандьне у әм бунә Шәʹдед Йаһоԝа.

Паши ньхӧмандьне мьн бәрдәԝам кьр нав хԝәда гӧһастьна бькьм. Мьн тʹәви Лаурайе сафи кьрьбу, ԝәки пе ԛәйьке бәр дәве Африкайева дәрбаз бьн, паше окйануса Атлантикерʹа дәрбаз бьн у бьгьһижьнә Дәԝләтед Йәкбуйи. Чахе әз у Лаура пе ԛәйьке сәр окйанусе дьчун, дәр-доре мә гьшк ав бу, мьн фәʹм кьр ԝәки әз һьмбәри Әʹфьрандаре мәзьн чьԛас бьчʹук ьм. Чахе әм ортʹа окйануседа бун, гәләк ԝәʹде мьн һәбу, ләма жи мьн һәр рʹож Кʹьтеба Пироз дьхԝәнд. Чахе мьн дәрһәԛа әʹмьре Исайи сәр әʹрде дьхԝәнд, гәләк сәр мьн һʹӧкӧм дьбу. Әԝ мәрьвәки кʹамьл бу, у әԝи дькарьбу һаԛас тьшт бькьра, чь кӧ мьн ԛә нькарьбу бьда бәр чʹәʹве хԝә жи. Ле әԝи тʹӧ щар һʹьш-аԛьле хԝә нәдьда сәр хԝә. Әԝ нә кӧ дькʹәтә һʹәйра хԝә, ле дькʹәтә һʹәйра ве йәке, ԝәки хԝәстьна Баве хԝә бинә сери.

Чахе әз дәрһәԛа жийина Иса дьфькьрим, мьн фәʹм кьр ԝәки Пʹадшатийа Хԝәде гәрәке әʹмьре хԝәда дайньм щийе пешьн, нә кӧ нава ван шьхӧле хԝәда чь кӧ дьхԝазьм бькьм, анщах ԝәʹдә бона Пʹадшатийа Хԝәде бьвиньм (Мәтта 6:33). Чахе әз у Лаура гьһиштьнә Дәԝләтед Йәкбуйи, мә сафи кьр ԝәки ԝедәре бьминьн у һʹьш-аԛьле хԝә бьдьнә сәр һʹәбандьне.

Бәре чахе әз хԝәсәрихԝә бум, тʹьме сафикьрьнед хԝәда дькʹәтьмә шьке. Ле ньһа мьн канийа биланийа рʹаст дитийә, кʹижан кӧ рʹебәрийе мьн дькә (Ишайа 48:17, 18). У ӧса жи нета әʹмьре мьн һәйә, чь кӧ бәре тʹӧнә бу, демәк Хԝәдерʹа ԛӧльх дькьм у али мәрьва дькьм, ԝәки дәрһәԛа ԝи пебьһʹәсьн.

Әз у Лаура принсипед Кʹьтеба Пироз дьдьнә хәбате у бь ве йәке мә зәԝаща хԝә ԛәԝи кьрийә. Кʹәрәмәкә мәйә дьн жи әԝ ә, ԝәки ԛизәкә мәйә хԝәшьк һәйә, кʹижан кӧ Йаһоԝа нас дькә у гәләк һʹьз дькә.

Ӧса нинә кӧ әʹмьре мә тʹьме һеса дәрбаз дьбә. Ле бь аликʹарийа Йаһоԝа мә сафи кьрийә, ԝәки тʹӧ щар сьст нәбьн у тʹьме итʹбарийа хԝә ԝи биньн (Мәтʹәлок 3:5, 6).