Рʹебәрийа Рʹаст у Нәрʹаст: Рʹебәрийа кӧ Кʹаре Тинә
Дина хԝә бьдьне, кӧ чаԝа ширәтед Кʹьтеба Пироз бона чар дәрәщед әʹмьрва гьредайи, али бь милйона мәрьва кьрьн, у әԝана избат бун ԝәки ширәтед Кʹьтеба Пироз бь итʹбар ьн.
1. Зәԝащ
Ньһерʹандьна мәрьв сәр зәԝаще у сәр ве йәке кӧ чь гәрәке бькьн ԝәки зәԝащ бәхтәԝар бә, жь һәв щӧдә дьбә.
КʹЬТЕБА ПИРОЗ ДЬБЕЖӘ: «Жь ԝә һәр кәс жи бьра жьна хԝә һʹьз бькә чаԝа хԝә у жьн жи ԛәдьре мере хԝә бьгьрә» (Әфәси 5:33, ДТʹ).
ӘВ ЧЬ ТЕ ҺʹӘСАБЕ: Хԝәде зәԝащ саз кьрийә, ләма жи әԝ рʹьнд занә щотед зәԝьщирʹа чь лазьм ә, сәва кӧ бәхтәԝар бьн (Маркос 10:6-9). Щотед зәԝьщи һьнге бәхтәԝар ьн, гава әԝана дина хԝә дьдьнә нә сәр ве йәке, чь кӧ йәк жь ԝан дькарә бьстинә, ле чь һәр кәс жь ԝан дькарә бькә, ԝәки зәԝаща ԝан ԛәԝи бә. Малхе кӧ кʹӧлфәта хԝә һʹәз дькә, әве йәке ԝе бь хәмкьрьне әʹйан кә. У кʹӧлфәта кӧ ԛәдьре малхе хԝә дьгьрә, әве йәке ԝе бь хәбәрдан у кьред хԝә әʹйан кә.
ШИРӘТА КʹЬТЕБА ПИРОЗ КʹАРЕ ТИНӘ: Куанг у кʹӧлфәта ԝи Ти, йед кӧ жь Вийәтнаме нә, баԝәр бун кӧ зәԝаща ԝан ԝе ида тʹӧ щар бәхтәԝар нибә. Куанг һьндава кʹӧлфәта хԝә гәләк щар һʹәйф нибу. Әԝ дьбежә: «Мьн һәстед кʹӧлфәта хԝә ԛә һьлнәдьда һʹәсаб у гәләк щар дьле ԝе дешанд». Кʹӧлфәта ԝи дьбежә: «Мьн дьхԝәст кӧ әм жь һәв бьԛәтьн, чьмки мьн ида нькарьбу нә ԛәдьре ԝи бьгьрта у нә жи итʹбарийа хԝә ԝи бьанийа».
Ахьрийе, Куанг у Ти пеһʹәсийан кӧ Кʹьтеба Пироз чь һин дькә у ча әԝана дькарьн Әфәси 5:33 бьдьнә хәбате. Куанг дьбежә: «Әв рʹез али мьн кьр фәʹм кьм, кӧ чьԛас фәрз ә һʹәйф бьм у ӧса бькьм, ԝәки кʹӧлфәта мьн һʹәзкьрьне тʹәхмин кә, у ӧса жи алийе материйали, физики у емосийалида бона ԝе хәм бькьм. Мьн дит кӧ чахе әз ӧса дькьм, кʹӧлфәта мьн һʹәзкьрьне у ԛәдьр һьндава мьн дьдә кʹьфше». Кʹӧлфәта ԝи дьбежә: «Мьн тедәрхьст кӧ чьԛас һе зедә әз Әфәси 5:33 дьдьмә хәбате у ԛәдьре малхе хԝә дьгьрьм, һаԛас һе зедә әз һʹәзкьрьна ԝи у пьштгьрийа ԝи тʹәхмин дькьм, ӧса әʹдьлайи дькʹәвә дьле мьн».
Сәва кӧ һе зедә информасийа дәрһәԛа зәԝаще пебьһʹәсьн, бьхуньн журнала Һʹьшйар бьн! № 2 йа сала 2018, бь наве «12 Гавед Керһати Бона Бәхтәԝарийа Малбәте» сәр jw.org.
2. Чаԝа Хԝә Һьндава Мәрьва Бьдьнә Кʹьфше
Мәрьв гәләк щар фьрԛийе дькьнә нава мәрьва жь бо мьләт, бәрәк, бәжн-бал, религийа йан жи орийентасийа сексуали.
КʹЬТЕБА ПИРОЗ ДЬБЕЖӘ: «Ԛәдьре һʹәмуйа бьгьрьн» (1 Пәтрус 2:17).
ӘВ ЧЬ ТЕ ҺʹӘСАБЕ: Кʹьтеба Пироз һин накә кӧ мәрьва нәфрʹәт кьн жь бо мьләт, бәрәк йан жи жь бо һомосексуалийе. Дәԝсе әв һелан дькә кӧ һьндава һʹәму мәрьвада ԛәдьр бьдьнә кʹьфше, фьрԛи тʹӧнә әԝана жь чь мьләти нә, жь чь бәрәки нә, дәԝләти нә йан кʹәсиб ьн (Кʹаред Шандийа 10:34). Ԝи чахи жи һәрге әм ԛайил ниньн тʹәви баԝәри йан кьред мәрьва, әм диса жь ԛәнщийе у ԛәдьр дьдьнә кʹьфше (Мәтта 7:12).
ШИРӘТА КʹЬТЕБА ПИРОЗ КʹАРЕ ТИНӘ: Данийел ӧса һатьбу һинкьрьне, ԝәки сәр мәрьвед жь Асйайе ӧса бьньһерʹә ча сәр мәрьвед хоф бона ԝәлате хԝә. Әԝи һәр мәрьвед жь мьләте Асйайе нәфрʹәт дькьр у гәләк щар бәр мәрьвед дьн ԝана беһӧрмәт дькьр. Әԝ дьбежә: «Әз дьфькьрим, кӧ бь ви щурʹәйи мьн ԝәлате хԝә дьпʹараст. Әз нә жи сәрва дьчум, кӧ фькьр у кьред мьн нәрʹаст бун».
Ахьрийе Данийел пеһʹәсийа, кӧ Кʹьтеба Пироз чь һин дькә. Әԝ гьлийед ӧса дьбежә: «Мьн гәрәке бь тʹәмами ньһерʹандьна хԝә бьгӧһаста. Мьн гәрәке сәр мәрьва ӧса бьньһер′ийа ча Хԝәде дьньһерʹә, чьмки әм һʹәму жи йәк ьн у фьрԛи тʹӧнә әм жь кʹидәре нә». Данийел дьбежә: «Ньһа чахе әз тʹәви мәрьва дьбьмә нас, гәләк щар әз нә жи дьфькьрьм әԝана жь кʹидәре нә. Әз мәрьвед жь һʹәму мьләта һʹәз дькьм у һәвалед мьн жь щурʹә-щурʹә ԝәлата нә».
Сәва кӧ һе зедә информасийа пебьһʹәсьн, бьхуньн Һʹьшйар бьн! № 3 йа сала 2020, бь наве «Тӧ сәр Мәрьвед Дьн Чаԝа Дьньһерʹи?» сәр jw.org.
3. Пʹәрә
Гәләк мәрьв пәй һәбуке дькʹәвьн, сәва кӧ бәхтәԝар бьн у ахьрийе бь жийинәкә баш бьжин.
КʹЬТЕБА ПИРОЗ ДЬБЕЖӘ: «Шәһрәзайи сьтʹар ә, пʹәрә жи сьтʹар ә, ле фәйдәйа занабуне әв ә кӧ шәһрәзайи жийана хԝәйе хԝә дьпарезә» (Ԝаиз 7:12).
ӘВ ЧЬ ТЕ ҺʹӘСАБЕ: Пʹәрә мәрʹа лазьм ә, ле әв йәк нькарә бәхтәԝарийа рʹаст у ахьрийа баш мәрʹа бинә (Мәтʹәлок 18:11; 23:4, 5). Бәхтәԝарийа рʹаст у ахьрийа бехоф, әм дькарьн бьстиньн тʹәне бь сайа ве йәке, һәрге биланийа жь Кʹьтеба Пироз йа кӧ жь Хԝәде йә бьстиньн (1 Тимотʹейо 6:17-19).
ШИРӘТА КʹЬТЕБА ПИРОЗ КʹАРЕ ТИНӘ: Кардо йе кӧ жь Әндонәзйайе йә, пәй һәбуке кʹәтьбу. Әԝ дьбежә: «Щәм мьн һәр тьшт һәбу, чь кӧ мәрьв һʹьзрәт бун. Әз дьчум щурʹә-щурʹә ԝәлата у мьн тьштед бьһа дькʹьрʹи, әʹрәба у мала». Ле әв йәк дьреж нәкʹьшанд. Әԝ бәрдәԝам дькә: «Әз һатьмә хапандьне, пʹәре кӧ мьн нава һаԛас салада ԛазанщ кьрьбу дәрбәкерʹа ӧнда бун. Тʹәмамийа әʹмьре хԝә әз пәй һәбуке кʹәтьбум, ле ахьрийе әз бе тʹӧ тьшт мам, ләма жи мьн хԝә дьлтәнг у бекер тʹәхмин дькьр».
Кардо дәстпекьр ширәта жь Кʹьтеба Пироз дәрһәԛа пʹәра әʹмьре хԝәда бьдә хәбате. Әԝи ида дина хԝә нәдьда сәр һәбуке, ле дәстпекьр бь әʹмьрәки һеса бьжи. Әԝ дьбежә: «Һәбука һәрһәйи әв һәйә һәләԛәтийа тә тʹәви Хԝәде. Ньһа әз шәв рʹьһʹәт рʹадьзем у әз бь рʹасти бәхтәԝар ьм».
Сәва кӧ һе зедә информасийа дәрһәԛа ньһерʹандьна Кʹьтеба Пироз сәр пʹәрә пебьһʹәсьн, бьхуньн готара бь наве «Гәло Хԝәндьна Бьльнд у Һәбук Ахьрийа Баш Тиньн?» Бьрща Ԛәрәԝьлийеда № 3 йа сала 2021, сәр jw.org.
4. Секс
Ньһерʹандьна мәрьва сәр сексе жь һәв щӧдә дьбә.
КʹЬТЕБА ПИРОЗ ДЬБЕЖӘ: «Жь ԛавийе дур бьн. Бьра жь ԝә һәр кәс жи заньбә ԛальбе хԝә һʹәлал у бь намуси хԝәй кә, нә бь хԝәстьна тәме хьраб, мина пʹутпʹарьста, йед кӧ Хԝәде нас накьн» (1 Тʹесалоники 4:3-5).
ӘВ ЧЬ ТЕ ҺʹӘСАБЕ: Кʹьтеба Пироз синора сәр хԝәстьнед сексуали датинә. Хәбәра ԛави, ӧса жи те һʹәсабе бенамуси, пʹутпʹарьсти, һәләԛәтийа сексуали ортʹа мәрьвед нәзәԝьщи, һомосексуали у һʹәрʹьмандьна тʹәви һʹәйԝана (1 Корьнтʹи 6:9, 10). Һәләԛәтийа сексуали әв пʹешкʹеша жь Хԝәде йә, йа кӧ тʹәне бона ԝан кәса йә, кʹе зәԝащеда ньн (Мәтʹәлок 5:18, 19).
ШИРӘТА КʹЬТЕБА ПИРОЗ КʹАРЕ ТИНӘ: Кʹӧлфәтәкә бь наве Кайли, йа кӧ жь Австралйайе йә, дьбежә: «Чахе әз нәмеркьри бум, әз дьфькьрим кӧ һәрге әз тʹәви кәсәки бькʹәвьмә һәләԛәтийа сексуали, әзе бехоф у һʹәзкьри хԝә тʹәхмин кьм. Ле бь рʹасти, мьн хԝә дьлтәнг у хофеда тʹәхмин дькьр».
Ԝәʹдә шунда, Кайли ширәта дәрһәԛа нав-намусийе жь Кʹьтеба Пироз пеһʹәсийа у әʹмьре хԝәда да хәбате. Әԝ дьбежә: «Әз дьвиньм кӧ нормед Йаһоԝа али мьн дькьн дьлтәнг нәбьм у еше тʹәхмин нәкьм. Ньһа әз дьһа хԝә бехоф у һʹәзкьри тʹәхмин дькьм, чьмки ԝан тьшта дькьм, чь кӧ Йаһоԝа жь мә дәʹԝа дькә. Чахе мьн дәстпекьр рʹебәрийа жь Кʹьтеба Пироз бьдьмә хәбате, әв йәк мьн жь хәмед зедә хьлаз кьр!»
Сәва кӧ һе зедә информасийа пебьһʹәсьн, бьхуньн готара бь наве «Кʹьтеба Пироз Чь Дьбежә Дәрһәԛа Жийина Тʹәвайә бе Зәԝащ?» сәр jw.org.
Әʹфьрандаре мә али мә дькә бьзаньбьн чь рʹаст ә у чь нәрʹаст ә. Әре, тʹьме һеса нинә гӧһ бьдьнә нормед ԝи, ле диса жи һежайә ԛәԝате бона ве йәке бьдьнә хәбате. Әм дькарьн баԝәр бьн, кӧ әв йәк ԝе шабуна һәрһәйи мәрʹа бинә.
