Бона гәләка кьред һьнә мәрьва дькарьн рʹаст бенә кʹьфше, ле кьред һьнәка нәрʹаст. Мәсәлә кӧштьн, рʹурʹәшкьрьн у хьрабкьрьна зарʹа те сущдаркьрьне, ле һәԛи, ԛәнщи у дьлшәԝати те ԛимәткьрьне. Ле гәләк мәрьв дьфькьрьн, кӧ әԝана хԝәха дькарьн сафи кьн чь рʹаст ә чь на, чахе хәбәрдан дьчә дәрһәԛа һәләԛәтийа сексуалийе, һʹәлалийе у мәзьнкьрьна зарʹа. Әԝана дьфькьрьн ԝәки һʹәму сафикьрьнед кӧ әԝана дькьн рʹаст ьн. Гәләк щар мәрьв ль гора ньһерʹандьна хԝә, йан жи ньһерʹандьна мәрьвед дьн сафикьрьна дькьн. Гәло әԝ йәк тʹьме рʹаст ә?

Әм гәләк щар сафикьрьна сәр һʹиме һәстед хԝә, йан жи сәр һʹиме исафа хԝә дькьн (Рʹомайи 2:14, 15). Һәла һе зарʹед бьчʹук жи дькарьн щӧдәбуна ортʹа кьред һәԛ у нәһәԛ бьвиньн. Ԝәʹдә пәй ԝәʹдәрʹа исафа мә сәр һʹиме ве йәке те һинкьрьне, чь кӧ әм жь малбәта хԝә һин дьбьн, жь һәвалед хԝә, жь дәрсдаред хԝә, жь мәрьвед дор-бәри хԝә, жь религийайе у жь култура хԝә. Чахе әм сафикьрьна дькьн, исафа мә мәрʹа дьдә кʹьфше сафикьрьна мә рʹаст ә йан на.

Исафа мә дькарә мә һелан кә, ԝәки әм һәԛийе, дьлшәԝатийе у рʹазибуне һьндава мәрьвед дьн бьдьнә кʹьфше. Әԝ йәк ӧса жи дькарә жь ве йәке мә хԝәй кә, кӧ дьле ԝан мәрьва нәешиньн йед кӧ бона мә ԛимәт ьн, йан жи жь ԝан тьшта мә хԝәй кә, чь кӧ дькарә мә бьдә шәрме, йан жи дьлтәнг кә.

Гәло әм дькарьн тʹьме итʹбарийа хԝә ньһерʹандьна хԝә биньн? Щаһьлтийа хԝәда Гарик бь әʹмьрәки ӧса дьжит дәрһәԛа кʹижани әԝ дьбежә, «Мьн хԝәха сафи дькьр чь әз дьхԝазьм бькьм, ле чь на». Ле әԝи дит кӧ әв йәк чь кӧ әԝи рʹаст һʹәсаб дькьр, бәред баш нәдьани. Щурʹе әʹмьре ԝи бь бенамусийе, наркотикайе, ичке у зӧлмийе тʹьжә бу.

Хенщи һәстед мә, гәләк щар ньһерʹандьна мәрьва сәр сафикьрьнед мә һʹӧкӧм дькьн. Әв йәк дькарә али мә бькә кʹаре жь занәбун у биланийа ԝан бьстиньн. Чахе әм ве йәке дькьн чь кӧ малбәта мә, һәвалед мә, мәрьвед дор-бәри мә дьфькьрьн кӧ рʹаст ә, ԝи чахи әԝана ԛәдьре мә дьгьрьн.

Гәло әм дькарьн тʹьме итʹбарийа хԝә ньһерʹандьна мәрьвед дьн биньн? Щаһьлтийа хԝәда Присила кʹәтә һәләԛәтийа сексуали, әԝ тьшт гәләк бәлабуйи бу нав һәвалед ԝеда. Паше әԝе фәʹм кьр, ԝәки тьштед кӧ мәрьв һʹәсаб дькьн рʹаст, бь рʹасти ле бәхтәԝар нәкьрьн. Әԝ дьбежә: «Әԝ йәк мьн бьрә бәрбь ве йәке кӧ мьн тьштед хоф у нәрʹаст кьр».

Чахе әм сафи дькьн чь йә рʹаст у нәрʹаст, һәстед мә у һәстед мәрьвед дьн ве йәкеда роләкә мәзьн дьлизьн. Ле гәләк щар әԝ сафикьрьн нә һәртʹьм дьбә бәрбь ахьрийа баш. Әм дькарьн хԝәха жь сафикьрьна хԝә зийане бьстиньн у бьвиньн ча бьжартьна мә дькарә сәр мә у мәрьвед дьн һʹӧкӧм кә (Мәтʹәлок 14:12). Ԝи чахи жи һәрге әм йан жи мәрьвед дьн дьфькьрьн, ԝәки фьлан тьшт рʹаст ә, диса жи әԝ йәк дькарә зийане бинә. Дьԛәԝьмә ԝәʹдәки рʹабун-рʹуньштандьна конкрет нәрʹаст дьһатә һʹәсабе, ле ньһа рʹаст те һʹәсабе. Дькарә щурʹәки майин жи бьԛәԝьмә, ԝәки рʹабун-рʹуньштандьна кʹижан бәре рʹаст дьһатә һʹәсабе, ньһа дькарә нәрʹаст бе һʹәсабе.

Гәло һәйә дьһа рʹебәрийа баш, йа кӧ ԝе али мә бькә сафи кьн чь рʹаст ә у чь нәрʹаст ә? Гәло әм дькарьн хԝә кʹижан рʹебәрийе бьгьрьн, жь бо чь әме ча ньһа ӧса жи ахьрийе дьлтәнг нәбьн?

Чьԛас баш ә кӧ һәйә рʹебәрийа бь итʹбар, йа кӧ һәр кәс дькарә бьдә хәбате. Готара дьнда әме пебьһʹәсьн, кӧ кʹидәре әм дькарьн рʹебәрийа бь итʹбар бьвиньн, сәва кӧ фәʹм кьн чь рʹаст ә у чь нәрʹаст ә.