Dyebhi o Dijina Dya Nzambi? Ngana Nzambi wambe: “Eme ngi Jihova, didi dyene o dijina dyami.” (Izaya 42:8) O dijina dya Nzambi di moneka 7.000 dya jiveji mu Bibidya. Maji sayí ji Bibidya, o dijina dya Nzambi, a di katula-mu, a bhinganesa-mu o majina a ujitu kala, “Ngana.” Nzambi wa mesena eye u kala kamba dyê, u kuswinisa ‘kwijiya o dijina dyê.’—Jisálamu 105:1.

O Majina a Ujitu a Jihova. O Bibidya ixana Jihova mu majina a ujitu kala “Nzambi,” “Muteni-a-Yoso,” “Mubhangi,” “Tata,” “Ngana,” ni “Suke-ku.” Mu misambu yavulu mu Bibidya Nzambi a mwixana mu majina a ujitu ni mu dijina dyê Jihova.—Daniyele 9:4.

 Nzambi wa Difu Kyebhi? Nzambi nzumbi. (Nzwá 4:24) O Bibidya i longa kwila, ‘seku muthu wa mono Nzambi.’ (Nzwá 1:18) O Bibidya i lombolola kyebhi Nzambi kya dívwa ni kyebhi kya xinganeka. O athu a tena ku mu luwalesa mba ‘ku mu sangulukisa.’—Jisabhu 11:20; Jisálamu 78:40, 41.

O Idifwa Yambote ya Nzambi. Nzambi kene ni kathombo ka athu, mwene wa zolo athu akwa jixi joso. (Ikalakalu 10:34, 35) Mwene we mukwa “jihenda ni kyadi, wa lenduka, u kokoloka mu kuthathamana, u kôla mu kukwatela henda, ufiyele u vula.”(Makatukilu 34:6, 7) Maji Nzambi wala ni idifwa iwana ya katunda.

Kutena. Kuma “Nzambi Muteni-a-Yoso,” o kutena kwê kwa ku kumbidila o ikanenu yê, ki kwene mbambe.—Dimatekenu 17:1.

Unjimu. O unjimu wa Nzambi wa beta kota wa athu ndenge. Kiki kyene o kilombolwelu kya izwelu ya Bibidya yambe: “Nzambi imoxi’èlele, wejiya yoso.”—Loma 16:27.

Kuyuka. Nzambi u bhanga ngó kya yuka. O ikalakalu yê ya “yuka,” “mwene ngó wayuka.”—Matendelelu 32:4.

Henda. O Bibidya yamba kwila, “Nzambi henda.” (1 Nzwá 4:8) Nzambi ka londekesa ngó o henda yê, maji mwéne mwene o henda. O henda yê ya katunda i di monekena mu ibhangelu yê yoso. I tu bhekela mbote mu mawukexilu avulu.

O Ukamba wa Nzambi ni Athu. Nzambi Tata yetu ya henda wala ku dyulu. (Matesu 6:9) Se tu kala ni kixikanu kwa mwene, tu tena kukala makamba mê. (Jisálamu 25:14) Mu kidi, Nzambi u kwixana phala ku mu zukama bhu kaxi ka musambu, “héle yenu yoso xilenu-yu Nzambi, kuma mwène wa mi kwatela mwanu.”—1 Phetele 5:7; Tiyaku 4:8.

Jezú ki Mwene Nzambi. Nzambi wa bhange Jezú ubheka wê, mwene ngó a mu bhange kiki. Mukonda dya kiki, o Bibidya i mwixana Mona umoxyelele wa Nzambi. (Nzwá 1:14) Kyoso kya bhange Jezú, Jihova wa mu bhana o ujitu wa kukala “mesene ya ikalakalu” phala kubhanga o ima ni athu oso.—Jisabhu 8:30, 31; Kolose 1:15, 16.

 Jezú Kidistu ka Mesenene ku di Bhanga Nzambi. Mu veji dya kiki, mwene wambe: “Nga tundu kwa [Nzambi], Mwène wa ngi tumu.” (Nzwá 7:29) Mu kuzwela ni dixibulu dyê ya lungu ni Jihova, Jezú wambe: ‘Tata yami, ni Tata yenu; Nzambi yami, ni Nzambi yenu.’ (Nzwá 20:17) Kyoso Jezú kyafu, Jihova wa mu fukununa phala kukala ku dyulu wa mu bhana ungana wonene ku mbandu yê.—Matesu 28:18; Ikalakalu 2:32, 33.

Jezú Kidistu u Tena ku Kukwatekesa Kuzukama Kwa Nzambi

Jezú weza mu ixi phala kulonga ya lungu ni Tat’ê. Ya lungu ni Jezú, Jihova wambe: “Mwenyú Mon’ami nga mu zola! Mwéne mu mu ívwa.” (Máluku 9:7) Kana-ku muthu wejiya kyambote Nzambi kala kya mwijiya Jezú. Mwene wambe: “Kana muthu we wejiya se o Tata mukwa-hi; wa mu’ijiya ngó mwène Mona, ni yó oso o Mona u sola ku mu tukwila-nê.”—Luka 10:22.

Jezú u londekesa kyambote o idifwa ya Nzambi. Jezú wa kayela kyambote idifwa ya Tat’ê, mwene wambe: “Woso wa ngi mono eme, wa mono we Tata.” (Nzwá 14:9) Jezú u zukamesa o athu kwa Nzambi mu kukayela o henda ya Tat’ê mu izwelu ni mu ibhangelu: Mwene wambe: “Eme ngi njila, ngi kidi, ngi mwenyu. Kana muthu u bhixila kwa Tata, wa kambe kwijila ko kwami.” (Nzwá 14:6) Mwene wambe dingi: ‘Abhezi a kidi a-nda bheza Tata mu nzumbi ni mu kidi. Kuma Tata mwène wandala abhezi a kala kiki, ni a mu bheze.’ (Nzwá 4:23) Xinganeka! Jihova wa mu tala o athu a mesena kwijiya o kidi kya lungu ni mwene, kala eye.