KU IZUELU iiadi íii, kiebhi o kibanzelu kiê? Athu avulu a sanga kutululuka mu izuelu ia Saulu mukua Talasu, a muixana ué poxolo Phaulu. (Ikalakalu 17:26, 27) Mu Bibidia, tu sanga-mu ué izuelu ia mukua kála íii. Mu kifika Jezú ua bhange musambu ua londekesa kuila o akaied’ê a tena kuijiia Nzambi ni ku tambula o mabesá mê.—Nzuá 17:3.

Maji jingijiie javulu kála Philo, ki kiene kia ­kexile mu banza. Akexile mu longesa kuila nuka ­tueji kuijiia kiambote Nzambi, mukonda Nzambi ua bhonzo ku mu tongolola. Kiki ki kidi kana.

O Bibidia i tu tangela ué kuila, mu kidi saí ima ia lungu ni Nzambi ia bhonzo ku i tongolola. Mu kifika o mivu Iê, ni kilunji kiê, ni unjimu uê, ki tu tena ku u tanga. Ua somboka o kuijiia kua athu oso. Maji o ima íii, ki i tokala ku tu fidisa ku muijiia. O kuxinganeka mu ima íii i tena ku tu kuatekesa ku ‘Zukama kua Nzambi.’ (Tiiaku 4:8) Tu dilonge ima ia bhonzo ia lungu ni Nzambi. Mu suluka, tua-nda dilonga ima ia lungu ni Nzambi ki i bhonzo ku i tongolola.

NZAMBI UA KALELA-KU: O Bibidia i tu longa kuila Nzambi uene ku muenhu “tunde xahulu katé ku hádia.” (Jisálamu 90:2) Kiki kilombolola kuila muéne kene ni dimatekenu ka-nda kala ué ni disukilu. Phala o athu, “o izuua ia mivu iê, ki i xikina ku i tanga.”—Jobe 36:26.

Mbote i u katula: Nzambi u ku kanena muenhu ua kalelaku se u muijiia. (Nzuá 17:3) Kiebhi Nzambi keji kanena o muenhu ua kalelaku se muéne uexile ni disukilu? Muéne ngó “o muenexi ió, kene kùfua.”—1 Timote 1:17.

KILUNJI KIA NZAMBI: O Bibidia i longa kuila Nzambi, “o kilunji kiê kibhuene muthu utena kuzubha ku ki ijiia” mukonda o ibanzelu iê ia tundu o ibanzelu ietu. (Izaia 40:28; 55:9) O Bibidia ibhuidisa: “Nanhi u tena kuijiia o muxima ua [Jihova]? Nanhi muène u tena ku mu longa kaiula?”—1 Kolindo 2:16.

Mbote i u katula: Nzambi u tena kuívua misambu ia mazunda ni mazunda a athu mu kithangana kimoxi. (Jisálamu 65:2) Nzambi u mona katé ni tudièdie tu lauka bhoxi. O kuila o kilunji kia Nzambi kia-nda kuizala, ni ku mu fidisa ku ku mona mba kuívua o misambu iê? Kana mukonda o kilunji kiê, ki kiene mu kuizala. O kia beta-kota “Tudièdie né tua ndumba, enu mua beta ukota,” bhu pholo iê.—Matesu 10:29, 31.

JINJILA JA NZAMBI: O Bibidia i longa kuila o “muthu ua lémbua kuijiia o kikalakalu kioso kia bhange Nzambi, tundé ku dimatekenu katé ku dizubhilu.” (Ndongixi 3:11) Etu nuka tua-nda kuijiia o ima ioso ia lungu ni Nzambi. O unjimu ua Nzambi, ‘ka tena ku u tongolola.’ (Loma 11:33) Maji Nzambi ua mesena ku jimbulula o jinjila jê ku athu a mesena ku mu bheza.—Amoji 3:7.

Mbote i u katula: Se u tanga ni ku di longa o Bibidia, eie nuka ua-nda suka ku di longa ima ia ubhe ia lungu ni jinjila ja Nzambi. Kiki kilombolola kuila, etu tu tena kuzukama kua Tat’etu ia diulu katé ku hádia ni hádia.

Mukonda kuene ima ia bhonzo ia lungu ni Nzambi, ki kilombolola kuila ki tu tena ku muijiia kiambote. O Bibidia iala ni milongi iavulu i tena ku tu kuatekesa kuijiia kiambote Nzambi. Xinganeka:

O DIJINA DIA NZAMBI: O Bibidia I longa kuila Nzambi ua di luku dijina. Muéne uambe: “Eme ngi Jihova, Didi diene o dijina diami.” O dijina dia Nzambi tu di sanga mu Bibidia 7.000 dia ji veji, dijina dia mukua ndenge.—Izaia 42:8.

Mbote i u katula: Jezú uambe mu musambu uê: “Tata ietu uene mu diulu, dijina dié a dixile.” (Matesu 6:9) O kuila eie u tena ué ku tumbula o dijina dia Nzambi mu musambu? Jihova ua mesena ku bhulula o athu a xila o dijina diê.—Loma 10:13.

DIBHATA DIA NZAMBI: O Bibidia i longa kuila kuene “maulu aiadi”—o diulu kua tungu o athu mu nzumbi ni diulu dia ixi ietu. (Nzuá 8:23; 1 Kolindo 15:44) Mu Bibidia o kizuelu “máulu,” kia lungu ni diulu mua tungu o athu mu nzumbi. Ku ‘maulu’ koko ‘kuene kua tungu’ o Mubhangi.—1 Jisobha 8:43.

Mbote i u katula: Eie u tena kuijiia kiambote Nzambi. O Mubhangi ki muthu uala mu ididi ioso mba mu ima ioso kana. Jihova Muthu ua kidi ua tungu mu kididi kia kidi. Maji “kana-ku kima kiobhange ki kamba ku moneka ku mesu ma Nzambi.”—Jihebeleu 4:13.

UKEXILU UA NZAMBI: O Bibidia i tu longa kuila Jihova uala ni ídifua iambote. “Nzambi henda.” (1 Nzuá 4:8) Muéne ki mukua makutu. (Tito 1:2) Muéne ki mukua kathombo, maji mukua henda, ua kokoloka mu ku tema. (Makatukilu 34:6; Ikalakalu 10:34) Athu avulu nange a sasumuka kioso kievua kuila o Mubhangi ua mesena ku kala ni “ukamba” ni ió a mu xila.—Jisálamu 25:14.

Mbote i u katula: Eie u tena ku kala u dikamba dia Jihova. (Tiiaku 2:23) kioso ki ua-nda kuijiia kiambote o ukexilu ua Jihova, ua-nda tena ué kutendela kiambote o misoso ia Bibidia.

Nange u dibhuidisa: ‘Se ki ngi tena kuijiia o ima ioso ia lungu ni Mubhangi, kiebhi ki ngi tena ku kala dikamba diê?’ Xinganeka: O kuila o dikamba dia dotolo uene mu bhanga pelasá ua bhingi kukala ué dotolo? Kana! O dikamba dia dotolo u tena ku sola ufunu ua mukuá. Maji a tena ku kala makamba ambote. O kima kia beta-kota, o dikamba dia dotolo kuijiia o ukexilu ua dotolo ni ima ia uabhela ni ima ia zembe. Kiene kimoxi ué, eie u tena ku di longa mu Bibidia o ukexilu ua Jihova—kiki kiene ki ua tokala kuijiia phala ku kala ni ukamba ni muéne.

Mu veji dia ku tu suekela o ukexilu ua Mubhangi uetu, o Bibidia i tu tangela o milongi i tua bhindamena phala kuijiia Nzambi. O kuila ua mesena kuijiia dingi ia lungu ni Jihova Nzambi? O Jimbangi ja Jihova ene mu longa o Bibidia ku mabhata a athu se ku kobhala kima. Tua mu ku suinisa ku sota Mbangi ia Jihova mu diembu diê mba ku jikula o kijimbuete kietu www.pr418.com.