Kisumwa Kyalondekesa Kwa Nzwá 4:1-11
4 Kyabhiti o ima yiyi, ngamono dibhitu dya jikuka ku dyulu. O dízwi dya dyanga di ngevu kuzwela n’eme, dyedile kala mbimbi ya koloneta, o dyene dyambe: “Banda kuku, nganda kulondekesa o ima yanda bhita.”
2 Mu kithangana kyenyókyo, o nzumbi ikôla ya ngitulukila, anga ngimona kyandu ku dyulu, ku kyandu kwaxikamene muthu.
3 O Yó waxikamene ku kyandu wa difwanganene ni ditadi dya jaspe ni dya sáladu.* Mu jimbandu ja kyandu mwakexile hongolo ya difwanganene ni ditadi dya ejimelada.
4 Kwakexile makwinyi ayadi ni kiwana kya yandu ya kondolokele o kyandu. Mu yandu yenyiyi ngamono-mu makwinyi ayadi ni kiwana kya tufunga twaxikama. Azwata izwatu yazele, ku mítwe yâ kwala itundu ya ulu.
5 Ku kyandu kwakexile mu tunda jinzaji, mázwi ni inuminu. Ku pholo ya kyandu kwa kexile sambwadi dya tundeya twa wama. O tundeya tutu tulombolola o sambwadi dya jinzumbi ja Nzambi.
6 Ku pholo ya kyandu kwakexile we kima kyadifu ni musanza wa kalunga wa vídulu, wedile kala kidistale* mukuzela.
Mukaxi ka kyandu ni mu jimbandu mwakexile jianju jiwana jakexile ni mesu avulu, kupholo ni kudima.
7 O anju yadyanga yedile kala hoji, o anju ya kayadi yadifwanganene ni ngombe, o anju ya katatu pholo yê yadifwanganene ni ya diyala, o anju ya kawana yedile kala holokoko ya mutuka.
8 Kala anju yakexile ni mabhabha asamanu. Moxi a mabhabha ni mu jimbandu mwezalele ni mesu. O jianju ja kolokota ni kudikola usuku ni mwanya, exi: “U kôla, u kôla, u kôla, Jihova Nzambi, o Muteni-a-Yoso, yó wakexile-ku, wene-ku, wanda kwiza-ku.”
9 Kyoso o jianju jiwana kyaya ni kufumanesa, kujingisa ni kusakidila Yó waxikama ku kyandu, Yó wene-ku katé ku hádya ni hádya,
10 o makwinyi ayadi ni kiwana kya tufunga afukamena Yó waxikama ku kyandu, ene abheza Yó wene-ku katé ku hádya ni hádya, anga o itundu yâ a itakula bhu pholo ya kyandu, ene amba, exi:
11 “Eye u Jihova Nzambi yetu, kya kufwama kutambula o fuma, o kijingu ni kutena, mukonda éye wabhange o ima yoso, yene yezaku mu vondadi yé, eye wa ibhange.”
