Mukanda ku Akwa Kolose 1:1-29
1 Eme Phawulu ngi poxolo ya Kidistu Jezú mu vondadi ya Nzambi, ni phang’yetu Timote.
2 Twa musonekena o athu oso o’sole, o jiphange ja fiyele o maxibulu a Kidistu ala ku Kolose:
Mukale ni ngalasa ya Nzambi Tata yetu ni kutululuka kwê.
3 Twene mu sakidila jinga Nzambi, Tata ya Ngana yetu Jezú Kidistu, kyoso ki tu misambela,
4 mukonda twevu kuzwela yalungu ni kixikanu kimwala nakyu kwa Kidistu Jezú, ni henda i mwa kwatela ku athu o’sole,
5 mukonda dya kidyelelu kya mibhakela Nzambi ku dyulu. Enu mwevu kuzwela yalungu ni kidyelelu kiki bhukaxi ka njimbu ya kidi, o njimbu yambote
6 ya mitudila. O njimbu yambote ya mu kwima ibundu ni kudibandekesa mu ngongo yoso, kiki kyene we kya mubhita ni enu tundé o kizuwa ki mwevu ni kwijiya kyambote o ngalasa ya Nzambi.
7 Kiki kyene ki mwadilongo ni phang’yetu ya kazola mubhika ni mukwetu Epafala, mukunji wa fiyele wa Kidistu, wa musidivila bhu kididi kyetu.
8 Mwene we wa tutangela yalungu ni henda imwala nayu ni kikwatekesu kya nzumbi ya Nzambi.
9 Mukonda dya kiki, tundé o kizuwa kitwevu o maka enyá, twene mu misambela jinga, ni kubhinga kwila mwizale ni kwijiya kwa kidi kwalungu ni vondadi ya Nzambi, ni unjimu woso ni kutendela o ima ni kikwatekesu kya nzumbi ikôla,
10 phala mwende kala kya mesena Jihova ni mutene ku mu sangulukisa kyoso kimuya ni kwima ibundu mu ikalakalu yoso yambote ni kubandekesa o kwijiya kwa kidi kwalungu ni Nzambi.
11 Tubhinga we phala muswine ni nguzu yoso bhukaxi kakutena kwa Nzambi, phala mu kolokote ni mwanyu ni kusanguluka,
12 kyoso ki musakidila o Tata, wa mibhangesa kubhanga mbandu mu undundu wa athu o’sole ala mu mukengeji.
13 Mwene wa tubhulula ku ungana wa kitombe yu watubheka mu utuminu wa Mon’ê wa kazola,
14 kwa mwene a tubhulula bhukaxi ka kukula, o kubhuluka kuku kulombolola o muloloki wa ituxi yetu.
15 Kidistu mwéne o kidifwanganu kya Nzambi kamoneka kumesu, o phande-kumbi ya ibhangelu yoso.
16 Mukonda bhukaxi ka mwene, Nzambi wabhange o ima yoso ya mukwa kikale ku dyulu kikale mu ngongo, o ima imoneka ku mesu ni ima ikamba kumoneka ku mesu, kikale yandu, kikale makutena, kikale maunguvulu ni maungana. Ima yoso ya mukwa a ibhange bhukaxi ka mwene ni phala mwene.
17 Ande dya kubhanga o ima yoso ya mukwa, mwene we wakexile kyá ku mwenyu, o ima yoso ya mukwa a ibhange bhukaxi ka mwene.
18 Mwéne o mútwe wa mukutu, o mukutu yú o kilunga. Mwéne o dimatekenu, o muthu adyangela ku mu fukununa mwaxaxi ka madifundu, phala kukituka o muthu wadyanga ku ibhangelu yoso,
19 mukonda Nzambi mu vondadi yê, wabhangesa o ima yoso kutenena mwa mwene.
20 Bhukaxi ka mwene Nzambi wabhangesa kwila o ibhangelu yoso ikala ni favolo yê, kikale o ibhangelu mu ngongo ni ibhangelu ku dyulu, mu kubhanga paze bhukaxi ka manyinga a Jezú, wa a zunzumwina ku taka.*
21 Kuma enu mwa disandulwile kwa Nzambi ni kwila mwexile mu jinguma mukonda mwa kexile muxinganeka o ima yayibha,
22 kindala Nzambi wa milondekesa dingi o favolo yê bhukaxi ka mukutu wa yó wafu, phala muzele, mukale sé dixaka,* sé kikuma bhu pholo yê mwene.
23 Maji kikale-phe mu kolokota mu kixikanu, mu difikidile mu kaboko, mu swine, phala ka mikatule o kidyelelu kya njimbu yambote imwevu. O njimbu yiyi a itudila ku athu oso mu ngongo. Eme Phawulu ngakituka ngi mukunji wa njimbu yiyi yambote.
24 Kindala nga sanguluka mukonda nga mutala hadi phala o mbote yenu. Nga fika kwila o hadi i nga mutala kala ngi kidyandu kya mukutu wa Kidistu yatokala kusuluka. O hadi yiyi phala o mbote ya mukutu wa Kidistu, o mukutu yú, o kilunga.
25 Eme nga musidivila kala ngi mukunji wa kilunga, mukonda Nzambi wa ngisolo phala kubhanga o kikalakalu kiki, o kikalakalu kiki phala o mbote yenu. Mukonda dya kiki, ngiboka ku athu oso o mak’â Nzambi,
26 ni ikutu yê ikôla. M’ukulu o athu kejidile o ikutu yiyi, maji kindala Nzambi wa ijingununa ku athu’ê o’sole.
27 Nzambi wa sangulukile mu kwa ejidisa o jimbote ja kikutu kikôla. O kikutu kiki kikôla, Kidistu kumoxi ni enu. Kiki kilombolola kwila ene anda tambula o fuma kumoxi ni mwene.
28 Etu twa mutula o njimbu yalungu ni mwene, mu kutangela o athu oso ni kwalonga ni unjimu woso, phala tubhakule athu oso n’a kale athu atenena kumoxi ni Kidistu.
29 Kyene ki nga mu kalakala kyavulu ni kubhanga yoso ni kutena kwa Nzambi kwa mu kalakala ku mukutu wami.
