ហេតុអ្វីសាក្សីព្រះយេហូវ៉ាមិនធ្វើបុណ្យណូអែល?
អ្វីដែលមនុស្សជាច្រើនយល់ច្រឡំ
រឿងមិនពិត: មូលហេតុដែលសាក្សីព្រះយេហូវ៉ាមិនធ្វើបុណ្យណូអែល ដោយសារពួកគេមិនជឿទៅលើលោកយេស៊ូ។
រឿងពិត: យើងជាគ្រិស្តសាសនិក។ យើងជឿថាសេចក្ដីសង្គ្រោះ គឺមកតាមរយៈលោកយេស៊ូគ្រិស្តតែប៉ុណ្ណោះ។—សកម្មភាព ៤:១២
រឿងមិនពិត: សាក្សីព្រះយេហូវ៉ាធ្វើឲ្យក្រុមគ្រួសារគេបែកបាក់គ្នា ដោយបង្រៀនសមាជិកក្រុមគ្រួសារគេមិនឲ្យធ្វើបុណ្យណូអែល។
រឿងពិត: យើងយកចិត្តទុកដាក់យ៉ាងខ្លាំងចំពោះក្រុមគ្រួសារ ហើយយើងប្រើគម្ពីរបរិសុទ្ធដើម្បីជួយក្រុមគ្រួសារឲ្យមានចំណងមិត្តភាពកាន់តែរឹងមាំ។
រឿងមិនពិត: សាក្សីព្រះយេហូវ៉ាបាត់បង់ឱកាសសប្បាយនិងមិនបានទទួលប្រយោជន៍ពី«ថ្ងៃបុណ្យណូអែល» ដោយសារពេលនោះជាឱកាសដែលមនុស្សបង្ហាញចិត្តទូលាយ មានសន្តិភាពនៅផែនដី និងមនុស្សបង្ហាញសន្ដានចិត្តចំពោះគ្នាទៅវិញទៅមក។
រឿងពិត: រៀងរាល់ថ្ងៃ យើងព្យាយាមបង្ហាញចិត្តទូលាយ និងធ្វើឲ្យមានសេចក្ដីសុខសាន្ត។ (សុភាសិត ១១:២៥; រ៉ូម ១២:១៨) ជាឧទាហរណ៍ របៀបដែលយើងដឹកនាំកិច្ចប្រជុំ និងផ្សព្វផ្សាយគឺស្របតាមការណែនាំរបស់លោកយេស៊ូដែលថា៖«អ្នករាល់គ្នាបានទទួលដោយឥតបង់ថ្លៃ ចូរឲ្យដោយឥតគិតថ្លៃដែរ»។ (ម៉ាថាយ ១០:៨) បន្ថែមទៅទៀត យើងផ្សព្វផ្សាយដោយលើកបញ្ជាក់អំពីរាជាណាចក្ររបស់ព្រះដែលជាសេចក្ដីសង្ឃឹមពិតដើម្បីឲ្យមានសេចក្ដីសុខសាន្តនៅផែនដី។—ម៉ាថាយ ១០:៧
ហេតុអ្វីសាក្សីព្រះយេហូវ៉ាមិនធ្វើបុណ្យណូអែល?
លោកយេស៊ូបង្គាប់យើងឲ្យធ្វើពិធីរំលឹកមរណភាពរបស់លោក មិនមែនធ្វើពិធីនៅថ្ងៃដែលលោកកើតទេ។—លូកា ២២:១៩, ២០
សាវ័ករបស់លោកយេស៊ូនិងអ្នកកាន់តាមលោកនៅសម័យមុន មិនធ្វើបុណ្យណូអែលទេ។ យោងទៅតាមឯកសារមួយថា៖«ពិធីបុណ្យខួបកំណើតលោកយេស៊ូបានត្រូវធ្វើឡើងនៅក្រោយឆ្នាំ២៤៣ គ.ស.» (New Catholic Encyclopedia)។ ដូច្នេះ ជាង១០០ឆ្នាំបន្ទាប់ពីពួកសាវ័កចុងក្រោយរបស់លោកយេស៊ូស្លាប់ នោះបុណ្យខួបកំណើតរបស់លោកយេស៊ូបានត្រូវគេធ្វើឡើង។
គ្មានទីសំអាងដែលបញ្ជាក់ថាលោកយេស៊ូបានកើតនៅថ្ងៃទី២៥ ខែធ្នូទេ ហើយក្នុងគម្ពីរក៏មិនបានកត់ទុកថ្ងៃកំណើតរបស់លោកយេស៊ូដែរ។
យើងជឿថា ព្រះមិនពេញចិត្តនឹងបុណ្យណូអែលទេ ពីព្រោះបុណ្យនេះមានដើមកំណើតមកពីទំនៀមទម្លាប់សាសនាមិនពិត។—កូរិនថូសទី២ ៦:១៧
ហេតុអ្វីសាក្សីព្រះយេហូវ៉ាមិនព្រមធ្វើបុណ្យណូអែលដូចអ្នកឯទៀត?
មនុស្សជាច្រើនធ្វើបុណ្យណូអែល ទោះជាពួកគេដឹងថាបុណ្យនោះមានដើមកំណើតមកពីសាសនាមិនពិត និងគ្មានមូលដ្ឋានពីគម្ពីរក្ដី។ ដូច្នេះហើយ ពួកគេឆ្ងល់ថា ហេតុអ្វីគ្រិស្តសាសនិកចាំបាច់ធ្វើអ្វីដែលអ្នកឯទៀតមិនចូលចិត្ត? ហេតុអ្វីក៏មិនធ្វើដូចគេឯងទៅ?
គម្ពីរលើកទឹកចិត្តយើងឲ្យពិចារណាដោយខ្លួនឯង និងប្រើ«សមត្ថភាពរិះគិត»។ (រ៉ូម ១២:១, ២) គម្ពីរបង្រៀនយើងឲ្យស្គាល់តម្លៃនៃសេចក្ដីពិត។ (យ៉ូហាន ៤:២៣, ២៤) ពិតមែនតែយើងយកចិត្តទុកដាក់ចំពោះទស្សនៈរបស់អ្នកឯទៀត តែយើងធ្វើតាមគោលការណ៍ក្នុងគម្ពីរ ទោះបីជាការធ្វើដូច្នោះនាំឲ្យអ្នកទៀតមិនពេញចិត្តនឹងយើងក្ដី។
ទោះជាយើងមិនធ្វើបុណ្យណូអែលក៏ដោយ តែយើងគោរពសិទ្ធិរបស់មនុស្សម្នាក់ៗក្នុងការសម្រេចចិត្តអំពីរឿងនេះ។ យើងមិនរំខានអ្នកឯទៀតធ្វើបុណ្យណូអែលទេ។