Biibilimi grækerit oqaasiat anastasis ‘toqusunit makititaanermik’ nutserneqartartoq nutsiin­navillugu isumaqarpoq ‘nikuippoq’ imaluunniit ‘makippoq’. Toqusunit makittoq uummaqqittarpoq toqunngik­kallarami inuunerisimasamisut inuuneqaleq­qilluni. – Korintimiunut 1. 15:12, 13.

 Aamma Hebræerisut Allakkani Illernartuni, Testamentitoqqamik taaneqar­tartumi, toqusunit makititaaneq ilinniar­titsissutigineqarpoq. Assersuutigalugu pruffiiti Iisaaja aqqutigalugu Guuti ima neriorsuivoq: “Toqusortatit uummassapput, timaat makissapput.” – Esaja 26:19; Danieli 12:2, 13.

 Toqusunit makititaasut sumiissappat? Makititaasut ilaat qilammiissapput, tassanilu Kristusi kunngioqatigissavaat. (Korintimiunut 2. 5:1; Saqqummersitat 5:9, 10) Makititaasullu taakku “siulliullutik” makititaasunik Biibilimi taaneqarput, aamma allassimavoq taakku “toqusunik makititsinermi siullermi” makititaasut. Taamatut allaatigineqar­nerannit erserpoq kingusin­nerusukkut allanik makititaasoqarumaartoq. (Filippimiut 3:11; Saqqummersitat 20:6) Inuit toqusimasut amerlanerpaartaat kingusin­nerusukkut makititaallutik nunarsuarmi inuussapput. – Tussiaat 37:29.

 Inuit makititaasut qanoq ittuussappat? Guutip Jiisusi toqusimasunik makititsisin­naatippaa. (Johannesi 11:25) Jiisusip ‘ilivermiittut tamaasa’ toqusunit makitissavai. Inuk kinaluunniit makititaasoq toqunngik­kallarnermisulli kinaassuseqarlunilu pissuseqarlunilu eqqaamasaqassaaq. (Johannesi 5:28, 29) Qilammut makititaasut anersaajussapput. Nunarsuarmullu makititaasut peqqilluin­narlutik inuttut timeqassapput. – Esaja 33:24; 35:5, 6; Korintimiunut 1. 15:42-44, 50.

 Kikkut makititaassappat? Biibilimi allassimavoq “toqusunik naapertuil­luartunik naapertuil­luanngitsunillu” makititaasoqassasoq. (Apustilit Suliaat 24:15) Naapertuil­luartut tassaapput Guutimut aalajaas­simasut, ilaatigut Nooa, Saara aamma Aaperaat. (Mosesimik 1. 6:9; Hebræerit 11:11; Jaaku 2:21) Naapertuil­luanngitsut ilaatigut tassaapput Guutip najoqqutas­siaanik ilinniar­nissaminnut maleruaaler­nissaminnullu periarfis­saqarsiman­ngitsut.

 Inuilli ajortuliungaarsimasut ilaat makititaanissamik neriuuteqar­tinneqan­ngillat. Taakku toqugunik suujunnaarsin­neqarluin­nassapput. – Matiusi 23:33; Hebræerit 10:26, 27.

 Qaqugu makititaasoqassava? Biibilimi siulittuutigineqarpoq Kristusip najuunnerani, 1914-imi aallartittumi, toqusimasunik qilammut makititaanerit pissasut. (Korintimiunut 1. 15:21-23) Toqusimasunik nunarsuarmut makititaanerit pissapput Jiisusip Kristusip ukiuni 1.000-ni naalakkersuinerani nunarsuup paratiisin­ngortin­neqarnerani. – Lukkarsi 23:43; Saqqummersitat 20:6, 12, 13.

 Sooq toqusunit makititaasoqarnissaa upperisin­naavarput? Toqusunit makititaasimasut qulingiluat, tamarmik isiginnit­tuusimasunit uppernarsar­neqarsimasut, Biibilimi oqaluttuarineqarput. (Kunnginik 1. 17:17-24; Kunnginik 2. 4:32-37; 13:20, 21; Lukkarsi 7:11-17; 8:40-56; Johannesi 11:38-44; Apustilit Suliaat 9:36-42; 20:7-12; Korintimiunut 1. 15:3-6) Ingammik Jiisusip Laazarusimik makititsinera maluginiar­nartuuvoq. Laazarusimi ulluni sisamani toqungareersimasoq inuppassuit isigitillugit Jiisusip tupinnar­tuliornikkut makitippaa. (Johannesi 11:39, 42) Jiisusimillu akerlilersuisut tamanna miserratigisin­naanngin­namikku Jiisusip Laazarusillu toqutaatin­nissaat pilersaarutigilerpaat. – Johannesi 11:47, 53; 12:9-11.

 Biibilimi ersersin­neqarpoq Guuti toqusimasunik makititsinis­saminut pissaaneqartoq. Inuit toqusimasut ataasiakkaat makitik­kumasami sukutsitamininngui tamaasa eqqaamaq­qissaarpai, (Jobi 37:23; Matiusi 10:30; Lukkarsi 20:37, 38) Aamma ersersin­neqarpoq Guutip makititsinis­saminik kissaateqartoq. Guutip toqusimasunik makititsinissaa pillugu Biibilimi ima allassimavoq: “Assavit piliaat kipitsavigiumaarpat.” – Jobi 14:15, New World Translation.

Makititaaneq pillugu kukkusumik isummernerit

 Kukkusoq: Makititaaneq tassaavoq tarnip timiullu ataqatigiileq­qinnerat.

 Eqqortoq: Biibilimi ilinniar­titsissutigineqanngilaq inuup ilaa toqup kingorna arlaannut ingerlaq­qittartoq, tassami inuk toquguni tamarmi piujunnaavissaaq. (Oqaluus­sisartup oqaasii 9:5, 10) Inuk makititaasoq tamarmi tassaavoq tarneq uumassuseqartoq.

 Kukkusoq: Inuit ilaat makititaariarlutik ingerlaannaq suujunnaarsin­neqassapput.

 Eqqortoq: Biibilimi allassimavoq ‘ajortuliorsimasut eqqartuun­neqassasut’. (Johannesi 5:29) Ajortulialli matumani pineqartut tassaapput inuup pineqartup makititaanermi kingorna ajortuliarisimasai, tassaanatik toqunngik­kallarami ajortuliarisimasai. Jiisusi oqarpoq ‘toqusut Guutip ernerata nipaanik tusartut naalattullu inuulissasut’. (Johannesi 5:25) ‘Naalattut’ toqusunit makititaanermik kingorna ilikkakkatik naapertorlugit iliuuseqarnertik pissutigalugu ‘inuunerup mappersagaani’ allanneqassapput. – Saqqummersitat 20:12, 13.

 Kukkusoq: Inuup makititaasup toqunnginnermi timigisimasani timigileq­qissavaa.

 Eqqortoq: Inuup toqunerata kingorna timaa asiujar­tortarpoq suujunnaavillunilu. – Oqaluus­sisartup oqaasii 3:19, 20.