Innuttaaqatigiinni peqquserluttuliortoqartarpat taava naalakkersuisut innuttaaqatigiinneersut peqquserluttuliortuunerat pinngitsoorneqarsinnaanngilaq, ilaa? Taamaappat naalakkersuisut peqquserluttuliunngisaannartut innuttaaqatigiit avataaneersuusariaqarput. Biibilimi naalakkersueriaaseq taamaattorpiaq, tassa Guutip naalagaaffia Jiisusip ajoqersukkaminut qinnutigisaqqullugu ilinniartitsissutigisaa, allaatigineqarpoq. — Matthæusi 6:9, 10.

Guutip naalagaaffia tassaavoq naalakkersuisuiit qilammiittut. Nunami naalakkersuisut tamaasa taarsissavai. (Tussiaat 2:8, 9; Saqqummersitat 16:14; 19:19-21) Peqquserluttuliortuerutititsissaaq. Guutip naalagaaffianut tunngasut arfinillit uku tamatumunnga qularnaveeqqutaapput:

AJORNARTORSIUT: Nunami naalakkersuisut innuttaminnit, amerlanertigut akileraarutinit, aningaasalersorneqartarput. Aningaasat kaaviaartuartut pissutigalugit atorfillit ilaat tillinnissamut ussernartorsiortarput, allallu inunnit oqartussaasunut akileraarutiminnik allatulluunniit akiitsuminnik annikillisitserusuttunit akilersinnerluutinik akilersittarput. Tamannalu kingunerlutsitsisarpoq — naalakkersuisut annaasatik matussuserniarlugit peqquserluttuliortoqarnerulerneranik kinguneqartumik akileraarutit qaffattarpaat. Taamaattoqartillugu inuit unneqqarissut eqqugaanerpaasarput.

AAQQIISSUT: Guutip naalagaaffia Guutimit Ajugaqanngitsumit, Jehovamit, pissaaneqartitaavoq. *  (Saqqummersitat 11:15) Akileraarutinik aningaasalersorneqartariaqanngilaq. Guutip ‘pissaanera angeqisoq’ namminissarsiunngitsumillu tunisiumatunera qulakkeerutaapput Naalagaaffiup innuttami pisariaqartitaannik tamanik naammangaartunik pilersuiumaarneranut. — Esaja 40:26; Tussiaat 145:16.

AJORNARTORSIUT: Peqquserluttuliortuerutitsiniaaneq ‘nuimanerpaaniit aallartittariaqarpoq’, Susan Rose-Ackerman, allaaserisap matuma siuliani issuarneqartoq, oqarpoq. Naalakkersuisut tatigineeruttarput politiit akitsuuserisullu peqquserluttuliortuerutitsiniaatigalutik pisortani qaffasissumik atorfillit peqquserluttuliortarnerannik isiginninngitsuusaarigaangamik. Allaallu naalakkersuisup ileqqorissaarnerpaap naammalluinnanngissuseq kingornuppaa. Biibilimi allassimaneratut “nunami ima iluassuseqartigisumik inoqanngilaq ajunngitsuliuinnavilluni ... inuusumik”. — Oqaluussisartup oqaasii 7:20.

AAQQIISSUT: Inuttut naammalluinnanngitsutut innani Jiisusi Kristusi, Guutip naalagaaffimmini naalakkersuisunngortitaa, eqqunngitsuliortinneqarsinnaanngilaq. Tamanna uppernarsarpaa akilersinnerluutiginiarneqarsimasut annerpaartaat — tassa “silarsuarmi naalagaaffiit tamaasa taakkualu alutornassusiat” — itigartikkamigit. Silarsuup naalagaanerata, Diaavulup, Jiisusi neriorsorpaa tamakku pisinnaagai ataasiarluni pallorfigippani. (Matthæusi 4:8-10; Johannesi 14:30) Allaat Jiisusi anniartitaalluni toqutaalerluni assuarnaattuarnissani aalajangiusimallugu anniarunnaamissutigisinnaasaminik aammali misigisimalluarunnaassutigisinnaasaminik piumanngilaq. (Matthæusi 27:34) Jiisusip maanna Guutimit qilammut makititaasimasup Guutip naalagaaffiani naalakkersuisussatut piukkunnarluinnarluni uppernarsarsimavaa. — Filippimiut 2:8-11.

AJORNARTORSIUT: Nunarpassuarni qinersisoqartarmat oqartussaasut peqquserluttuliortartut qinigaaqqinngitsoortinneqarsinnaagaluarput. Qineqqusaarnermili qinersinermilu, allaat nunani siuarsimanerarneqartuni, peqquserluttuliortarneq nalinginnaavoq. Inuit pisuut qineqqusaartunut tunissuteqarnikkut allatigulluunniit iliuuseqarnikkut pisortani atorfillit atorfeqalerumaartullu sunniuteqarfigisinnaavaat.

USA-mi eqqartuussiviit qullersaanni eqqartuussisoq John Paul Stevens allappoq taamatut sunniuteqarneq “naalakkersuisut ilumut naalakkersuisinnaatitaanerannik naalakkersuilluarsinnaanerannillu apeqqusiiginnarani aamma innuttaasut naalakkersuisunik tatiginnikkunnaassutigisaraat”. Tupinnanngilaq inuppassuit isumaqarmata politikkikkut partiit allanit tamanit peqquserluttuliornerpaajusut.

AAQQIISSUT: Guutip naalagaaffiata qineqqusaarnermi qinersinermilu peqquserluttuliornerit  atorunnaarsissavai nammineq aalaakkaasumik ataavartumillu naalakkersuinermigut. (Danieli 7:13, 14) Naalakkersuisoq Guutimit toqqarneqarami Guutip naalagaaffia qinersinermit innuttaminilluunniit taarserneqarsinnaanngilaq. Aalaakkaanera qulakkeerutaavoq suliniutaasa siunissaq eqqarsaatigalugu innuttaasunut pitsaanerpaajuaannarnerannut.

AJORNARTORSIUT: Immaqa eqqarsarputit allanik inatsisiliorneq aaqqiissutaasinnaasoq. Immikkulli ilisimasallit paasisimavaat inatsisit amerliartortillugit amerlanertigut peqquserluttuliornissamut periarfissat amerlisartut. Aammami peqquserluttuliornernik annikillisaaniarluni inatsisilianik atuutitsiniarneq akisoorujussuusarpoq allannguutaavallaartaranilu.

AAQQIISSUT: Guutip naalagaaffiani inatsisit nunami naalakkersuisut inatsisaannit pitsaanerungaarput. Assersuutigalugu inatsiserpassualiornani Jiisusip ima peqquaatigut: “Inunnut qanorluunniit iliorfigeqqugussi ilississaaq taamatut iliorfigisigit.” (Matthæusi 7:12) Immaqalu suli pingaaruteqarnerusutut, Guutip naalagaaffiata inatsisaani pissutigisat iliuutsillu pingaarnerutinneqarput. Jiisusi ima oqarpoq: “Tullit ilittut asassavat.” (Matthæusi 22:39) Soorunami Guutip uummammiugisatsinnik isiginnissinnaasup inassutit taamaattut malinneqartissinnaavai. — 1 Samueli 16:7.

AJORNARTORSIUT: Piumatussuseq namminissarsiornerlu peqquserluttuliortitsisarput. Pisortanilu atorfillit innuttaasullu taamatut pissusipalaaqarajupput. Seoulimi niuertarfissualiortinneqalersut illoqarfimmi atorfillit peqquserluutinik akilerpaat nalunnginnamikku tamanna sanaartornermi atortussanik pitsaasunik atuinermit isumannaallisaatinillu maleruaanermit akikinnerusoq, tamatumalu kingunipilua allaaserisap matuma siuliani eqqaaneqarpoq.

Peqquserlunneq atuukkunnaarsinneqassappat inuit sungiutipilussimasatik, soorlu piumatussuseq namminissarsiornerlu, qanoq ileqqoriunnaarsinnaanerlugit ilinniartinneqartariaqarput. Nunamili  naalakkersuisut taamatut ilinniartitsisinnaanatillu taamaaliornissaminnut piumassuseqanngillat.

AAQQIISSUT: Guutip naalagaaffiata peqquserlunneq ajornartorsiutaajunnaarsissavaa isumapiluit peqquserluttuliornermut pissutaasut qanoq qaangerneqarsinnaanerannik inuit ilinniartinnerisigut. * Taamatut ilinniartitaanikkut inuit ‘isumamikkut nutaanngortinneqartarput’. (Efesosimiut 4:23) Piumatuujunnaarlutik namminissarsiortuujunnaarlutillu naammagittarneq inunnillu allanik soqutiginninneq ilikkartarpaat. — Filippimiut 2:4; 1 Timotheusi 6:6.

AJORNARTORSIUT: Inuit avatangiiserissaaraluartut ileqqorissaarnissamillu ilinniartitaalluarsimagaluartut ilaat unneqqaserlullutillu peqquserluttuliortarput. Immikkut ilisimasallit oqarput tamanna pissutaalluni nunami naalakkersuisut peqquserluttuliornermik atuukkunnaarsitsisinnaanngitsut, tamatumalu siaruaannerunnginnissaa kingunipiluisalu killilersimaarneqarnissaat neriuutigiinnaraat.

AAQQIISSUT: Naalagaaffiit Peqatigiit peqquserluttuliortarneq akiorniarlugu isumaqatigiissutaat naapertorlugu naalakkersuisut taamaaliorniarlutik “eqqortuliorusussuseq, unneqqarinneq akisussaassuseqarnerlu” siuarsartariaqarpaat. Guutip naalagaaffiata taamatut pissuserissaartitsiniaannarani innuttaminut pissuserissaarneq piumasaqaatigaa. Biibilimi allassimavoq ‘piumatuut’ aamma ‘sallutuut’ Guutip naalagaaffianik kingornussinissamut piukkunnanngitsut. — 1 Korinthimiut 6:9-11; Saqqummersitat 21:8.

Kristumiut siulliit ersersippaat najoqqutassianik qutsissunik maleruaanissaq ilikkarneqarsinnaasoq. Assersuutigalugu ajoqersukkap Siimuumik atillip anersaaq illernartoq akiliilluni piumagaluarmagu apustilit itigartippaat ima oqarlutik: “Ajussutsit tunullugu allamik isumataarit.” Siimuup kissaatipilumi navianartuunera paasigamiuk tamanna ajugaaffigiumallugu apustilit peqquai Guutimut qinnuteqqulluni. — Apustilit Suliaat 8:18-24.

Inuiannut sorlernulluunniit ilaagaluaruit Guutip naalagaaffiani innuttaalersinnaavutit. (Apustilit Suliaat 10:34, 35) Qanoq? Guutip naalagaaffiata silarsuarmi sumiluunniit ilinniartitsineranit tamanna paasisinnaavat. Akeqanngitsumik, soorlu sapaatip-akunneranut minutsini quliinnarni, qanoq Biibilimik atuaqqissaartoqarsinnaanersoq Jehovap Nalunaajaasuisa takutikkusuppaat. “Guutip naalagaaffianik iivangkiiliu”, ilaatigut nunami naalakkersuisut peqquserluttuliortarnerat qanoq atorunnaarsinneqassasoq, pillugu paasisaqarnerusinnaavutit. (Lukasi 4:43) Jehovap Nalunaajaasui saaffigikkit, nittartagarpulluunniit jw.org alakkaruk.