Неліктен Ехоба куәгерлері бұрын қызығушылық танытпаған адамдарға қайта барады?
Құдайды және адамдарды жақсы көргендіктен, Ехоба куәгерлері барлық адамға, тіпті бұрын қызығушылық білдірмегендерге де Киелі кітаптағы хабарды айтуға тырысады (Матай 22:37—39). Құдайға деген сүйіспеншілік бізді Иса пайғамбардың “түбегейлі куәлік беріңдер” деген тапсырмасын орындауға талпындырады (Елшілердің істері 10:42; Жоханның 1-хаты 5:3). Сондықтан біз Құдайдың ертедегі пайғамбарлары сияқты Құдай хабарын бір емес, бірнеше рет жеткізуге күш саламыз (Еремия 25:4). Адамдарды жақсы көргендіктен, өмір сақтайтын “Патшалық жайлы ізгі хабарды” баршаға, оның ішінде алғашында қызығушылық білдірмегендерге де айтамыз (Матай 24:14).
Қызығушылық білдірген адам табылмаған үйлерге қайта барғанда, жиі қызығып жатқан адамдарды кездестіреміз. Мұның келесідей үш себебі бар:
Жаңа тұрғындар көшіп келуі мүмкін;
Үй ішіндегі басқа адам қызығуы мүмкін;
Адамның ойы өзгереді. Дүниедегі я өмірдегі жағдайлардан адам “Құдайды танып-білгісі келіп”, Киелі кітап хабарына құлақ түре бастауы мүмкін (Матай 5:3). Тіпті қарсы болған адамдардың өзгеруі әбден мүмкін. Кезінде елші Пауылдың жағдайында солай болған (Тімөтеге 1-хат 1:13).
Алайда біз хабарымызды қабылдауға ешкімді мәжбүрлемейміз (Петірдің 1-хаты 3:15). Өйткені Құдайға ғибадат ету — әркім өзі қабылдайтын жеке шешім (Мұсаның 5-жазбасы 30:19, 20).