سترەستى جەڭە ٴبىلىڭىز
سترەسپەن كۇرەس
سترەسپەن كۇرەسە ٴبىلۋ ٷشىن سىزگە الدىمەن ٶز دەنساۋلىعىڭىزعا، وزگەلەرمەن قارىم-قاتىناسىڭىزعا جانە ومىردەگى ماقساتتارىڭىز بەن نەنى باستى ورىنعا قوياتىنىڭىزعا ٴمان بەرۋ قاجەت. وسى ماقالادا سترەسپەن كۇرەسۋگە، ٴتىپتى ونى ازايتۋعا قاتىستى ٴتيىمدى كەڭەستەر تالقىلاناتىن بولادى.
بۇگىننىڭ ۋايىمىمەن شەكتەلىڭىز
«ەشقاشان ەرتەڭگى كۇندى ويلاپ ۋايىمداماڭدار، ويتكەنى ەرتەڭگى كۇننىڭ ٶز ۋايىمى بار» (ماتاي 6:34).
ٴسوز ٴمانى: كۇندەلىكتى ۋايىم — ٶمىردىڭ بولىنبەس بولشەگى. ٴبىراق ەرتەڭگى كۇندى ويلاپ، بۇگىنگى ۋايىمعا ۋايىم قوسۋدىڭ قاجەتى بار ما؟ تەك ٴبىر كۇننىڭ ۋايىمىمەن كۇرەسىڭىز.
-
سترەستەن ۋايىم پايدا بولادى. ەندەشە بىلاي ىستەپ كورىڭىز: بىرىنشىدەن، كەيبىر سترەستەردەن قاشىپ قۇتىلا المايتىنىمىزدى مويىنداڭىز. ٴسىز وزگەرتە المايتىن جايتتاردى ويلاي بەرسەڭىز، سترەسىڭىز كۇشەيە بەرەدى. ەكىنشىدەن، ٴبىزدىڭ سونشا ۋايىمداعانىمىز كوپ جاعدايدا بولماي جاتاتىنىن ٴتۇسىنىڭىز.
شەكتەن تىس تالاپتار قويماڭىز
«سەندەردىڭ ەستى ەكەندەرىڭدى جۇرتتىڭ ٴبارى كورەتىن بولسىن» (فىلىپىلىكتەرگە 4:5).
ٴسوز ٴمانى: ٴمىنسىز بولۋعا ۇمتىلماڭىز. وزىڭىزدەن دە، وزگەلەردەن دە كوپ نارسە كۇتپەڭىز.
-
قاراپايىم بولىپ، ٶزىڭىزدىڭ جانە وزگەلەردىڭ مۇمكىندىكتەرىن ەسكەرىڭىز، اقىلعا قونىمسىز تالاپتار قويماڭىز. سوندا ٴبارىنىڭ سترەسى ازايىپ، جاقسى ناتيجەگە قول جەتكىزۋ وڭايعا تۇسەدى. ازىلدەۋدى دە ۇمىتپاڭىز. ٴبىر نارسە ويداعىداي بولماي قالعاندا دا، كۇلە بىلسەڭىز، جەڭىلدەپ قالاسىز، كوڭىل-كۇيىڭىز دە كوتەرىلەدى.
سترەستىڭ سەبەپشىلەرىن انىقتاڭىز
«پارىقتى سابىر ساقتار» (ناقىل سوزدەر 17:27).
ٴسوز ٴمانى: جاعىمسىز سەزىمدەردىڭ كەسىرىنەن ادام دۇرىس ويلانا الماي قالادى. سوندىقتان سابىر ساقتاۋعا تىرىسىڭىز.
-
نەدەن سترەسكە تۇسەتىنىڭىزدى انىقتاپ، سول كەزدە قالاي ارەكەت ەتەتىنىڭىزدى بايقاپ كورىڭىز. مىسالى، سترەسكە ۇشىراعاندا نە ويلاپ، نە سەزىنەتىنىڭىزگە، ٶزىڭىزدى قالاي ۇستايتىنىڭىزعا نازار اۋدارىڭىز، ٴتىپتى جازىپ الساڭىز بولادى. سترەستى قالاي قابىلدايتىنىڭىزدى ٴبىلىپ الساڭىز، ونىمەن جاقسىراق كۇرەسە الاسىز. سونداي-اق سترەسس تۋدىراتىن نارسەلەردەن ارىلۋدىڭ جولدارىن ويلاستىرىڭىز. ەگەر بۇل مۇمكىن بولماسا، ولاردىڭ ىقپالىن ازايتۋعا تىرىسىڭىز. بالكىم، بۇل ٷشىن سىزگە تاپسىرىلعان ٸستى ورىنداۋدىڭ باسقا جولىن تابۋ كەرەك شىعار نەمەسە ۋاقىتتى دۇرىس جوسپارلاۋ كەرەك بولار.
-
ماسەلەگە باسقا قىرىنان قاراپ كورىڭىز. ٴسىزدى سترەسكە سالعان جايت بىرەۋ ٷشىن مۇلدە سترەسس تۋدىرماۋى مۇمكىن. بۇل اركىمنىڭ كوزقاراسىنا بايلانىستى. مىنا ٷش كەڭەستىڭ سىزگە كومەگى تيەدى:
-
بىردەن جامان ويلاۋعا اسىقپاڭىز. كەزەكتە تۇرعاندا ٴبىر ادام الدىڭىزعا شىعىپ كەتتى دەلىك. مۇنىسى ادەپسىزدىك قوي دەسەڭىز، كوڭىلىڭىز ٴتۇسىپ كەتۋى مۇمكىن. ونىڭ كەلەلى سەبەبى بولعان شىعار دەپ نەگە پايىمداماسقا؟ سولاي بولۋى دا مۇمكىن عوي.
-
جاعدايدىڭ جاقسى جاعىن كورىڭىز. اۋرۋحانادا يا اۋەجايدا ۇزاق كۇتىپ وتىرعاندا، ۋاقىتتى قىسقارتۋ ٷشىن كىتاپ وقۋعا نەمەسە ەلەكتروندى حاتتاردى وقىپ، جاۋاپ بەرۋگە يا قانداي دا ٴبىر جۇمىسىڭىزدى بىتىرۋگە بولادى.
-
جاعدايدى تولىقتاي كورە ٴبىلىڭىز. «بۇل ماسەلە ەرتەڭ يا ٴبىر اپتادان سوڭ سونشالىقتى قيىن بولا ما؟» دەپ ويلانىپ كورىڭىز. نەنىڭ بولماشى ٵرى ۋاقىتشا ماسەلە ەكەنىن، ال نەنىڭ ماڭىزدى ماسەلە ەكەنىن اجىراتا ٴبىلىڭىز.
-
ٴبارىن تارتىپپەن ىستەۋگە تىرىسىڭىز
«بارلىعى لايىقتى ٵرى تارتىپپەن بولسىن!» (قورىنتتىقتارعا 1-حات 14:40).
ٴسوز ٴمانى: ومىرىڭىزدە ٴبارىن ٶز رەتىمەن ىستەۋگە تىرىسىڭىز.
-
ومىرىندە بەلگىلى ٴبىر شامادا ٴتارتىپتىڭ بولعانىن كىم-كىم دە قالايدى. ٴتارتىپتىڭ بۇزىلۋىنا، ال تۇبىندە سترەسكە اكەلەتىن بىردەن ٴبىر نارسە — ىستەردى ىلعي كەيىنگە ىسىرا بەرۋ. وسىنىڭ كەسىرىنەن اياقسىز قالعان ىستەردىڭ قاتارى كوبەيمەسە، ازايمايدى. مۇنى بولدىرماۋ ٷشىن مىنا ەكى امالدى ىستەپ كورسەڭىز بولادى.
-
اقىلعا قونىمدى جوسپار قۇرىپ، سونى ۇستانىڭىز.
-
ىستەردى ۋاقىتىندا ىستەمەۋىڭىزگە قانداي بۇرىس كوزقاراس تۇرتكى بولاتىنىن انىقتاپ، ونى تۇزەڭىز.
-
بايسالدى ٶمىر سالتىن ۇستانىڭىز
«تىنىمسىز ەڭبەكتەنىپ، جەلدىڭ سوڭىنان قۋعانشا، ازىراق تىنىعىپ العان ارتىق» (ۋاعىزداۋشى 4:6).
ٴسوز ٴمانى: جۇمىسباستى بولىپ كەتكەن ادام «تىنىمسىز ەڭبەگىنىڭ» راقاتىن كورە الماي قالادى. ويتكەنى ەڭبەگىنىڭ جەمىسىن كورىپ، ماساتتانۋعا ۋاقىتى دا، كۇشى دە قالماي جاتادى.
-
جۇمىس پەن اقشانىڭ ورنىن دۇرىس باعالاي ٴبىلىڭىز. اقشامىز كوبەيگەننەن ٴبىز باقىتتىراق بولىپ كەتپەيمىز، سترەسىمىز دە ازايىپ قالمايدى. شىنتۋايتىندا، ٴبارى كەرىسىنشە بولىپ شىعادى. ۋاعىزداۋشى 5:12 دە ايتىلعانداي، «بايدىڭ مول داۋلەتى وعان ۇيقى بەرمەيدى». سوندىقتان قالتاڭىزعا قاراي كوسىلۋگە تىرىسىڭىز.
-
تىنىعىپ، بوساڭسۋعا ۋاقىت ٴبولىڭىز. سۇيىكتى ىسىڭىزبەن اينالىسقاندا، سترەستى سەيىلتە الاسىز. ٴبىراق تەلەديدار قاراۋ سياقتى قيمىلسىز دەمالىس تۇرلەرى كومەكتەسپەۋى مۇمكىن.
-
ەلەكتروندى قۇرىلعىنى ٶز ورنىمەن پايدالانىڭىز. الەۋمەتتىك جەلىنى نە ەلەكتروندى حاتتار مەن حابارلامالاردى قايتا-قايتا تەكسەرە بەرمەڭىز. قاجەت بولماسا، جۇمىستان تىس كەزدە جۇمىسقا بايلانىستى حاتتاردى قاراماڭىز.
دەنساۋلىعىڭىزدى كۇتىڭىز
«دەنەنى جاتتىقتىرۋدىڭ پايداسى» (تىموتەگە 1-حات 4:8).
ٴسوز ٴمانى: جۇيەلى تۇردە دەنەنى شىنىقتىرعاندا، دەنساۋلىعىمىز جاقسارا تۇسەدى.
-
دەنساۋلىققا پايدالى ادەتتەرگە داعدىلانىڭىز. دەنەنى جاتتىقتىرعاندا كوڭىل كۇيىڭىز كوتەرىلىپ، اعزاڭىز سترەسپەن جاقسىراق كۇرەسەتىن بولادى. ٴنارلى تاعامدار جەڭىز، ۋاقىتىلى تاماقتانىپ ٴجۇرىڭىز. جەتكىلىكتى مولشەردە تىنىعىڭىز.
-
سترەستەن «قۇتىلۋدىڭ» زياندى جولدارىن ىزدەمەڭىز. مىسالى، بۇعان شىلىم شەگۋ، ەسىرتكى قابىلداۋ نە ٴدارى-دارمەكتەردى تەرىس پايدالانۋ جانە ىشىمدىككە سالىنۋ جاتادى. تۇبىندە بۇلاردىڭ دەنساۋلىعىڭىزعا كەسىرى تيەدى ٵرى ماڭداي تەرىڭىزبەن تاپقان اقشادان قاعىلاسىز، وسىلايشا سترەسىڭىزگە سترەسس قوساسىز.
-
سترەستەن باس كوتەرە الماي قالساڭىز، دارىگەرگە كورىنىڭىز. مامانداردىڭ كومەگىنە جۇگىنۋدىڭ ەش ۇياتتىعى جوق.
ماڭىزدى ىستەردى انىقتاڭىز
«نەنىڭ ماڭىزدىراق ەكەنىنە كوز جەتكىزىڭدەر» (فىلىپىلىكتەرگە 1:10).
ٴسوز ٴمانى: قانداي ىستەردىڭ ٴسىز ٷشىن باستى ورىندا ەكەنىن سارالاپ-سالماقتاڭىز.
-
ٴبىتىرۋ كەرەك ىستەرىڭىزدى ماڭىزدىلىعىنا قاراي جازىپ شىعىڭىز. بۇل سىزگە قانداي جۇمىستىڭ ماڭىزدىراق ەكەنىن، ال قانداي ىستەردى كەيىنگە شەگەرۋگە بولاتىنىن، قايسىسىن باسقا بىرەۋگە تاپسىرۋعا نە ٴتىپتى ىستەمەي-اق قويۋعا بولاتىنىن انىقتاۋعا كومەكتەسەدى.
-
ٴبىر اپتا بويى ۋاقىتىڭىزدىڭ قايدا كەتىپ جاتقانىن جازىپ وتىرىڭىز. سوسىن ۋاقىتتى تيىمدىرەك جۇمساۋدىڭ جولدارىن ويلاستىرىپ كورىڭىز. ۋاقىتىڭىزدى قالاي جۇمساپ جاتقانىڭىزدى قاداعالاپ وتىرساڭىز، ۋايىمىڭىز ازايادى.
-
تىنىعۋعا ۋاقىت ٴبولىڭىز. قىسقا ۋاقىت دەمالىپ العانىڭىزدىڭ ٶزى بويىڭىزعا قۋات ٴبىتىرىپ، سترەسىڭىزدى ازايتادى.
كومەككە جۇگىنىڭىز
«سارىۋايىم جۇرەكتى كۇيزەلتەدى، جاقسى ٴسوز ونى شاتتىققا تولتىرادى» (ناقىل سوزدەر 12:25).
ٴسوز ٴمانى: وزگەلەردىڭ جىلى دا جۇمساق سوزدەرى ەڭسەڭىزدى كوتەرەدى.
-
جاعدايىڭىز تۋرالى تۇسىنىگى مول اداممەن سويلەسسەڭىز بولادى. سىرلاس ادامىڭىز سىزگە جاعدايىڭىزعا باسقاشا قاراۋعا نەمەسە ماسەلەنىڭ ٴسىز بايقاماعان شەشىمىن تابۋعا كومەكتەسە الادى. جاي عانا ىشىڭىزدەگىنى ايتىپ شىعارىپ العاننىڭ وزىنەن جەڭىلدەپ قالاسىز.
-
كومەك سۇراڭىز. قانداي دا ٴبىر ٸستى بىرەۋگە تاپسىرۋعا نە بىرەۋمەن ٴبولىسىپ ىستەۋگە بولاتىن شىعار.
-
ەگەر ارىپتەسىڭىز سترەسكە تۇسۋىڭىزگە سەبەپ بولىپ جاتسا، جاعدايدى جاقسارتۋدىڭ جولدارىن ىزدەڭىز. ماسەلەن، ونىڭ ٸس-ارەكەتى سىزگە قالاي اسەر ەتەتىنىن ىلتيپاتپەن ٵرى جۇمساق تۇردە ايتىپ كورە الاسىز با؟ (ناقىل سوزدەر 17:27). ەگەر بۇدان تۇك شىقپاسا، سول اداممەن وتكىزەتىن ۋاقىتتى قىسقارتا الار ما ەدىڭىز؟
قۇدايدان كومەك ىزدەڭىز
«قۇدايدى تانىپ-بىلگىسى كەلەتىندەر باقىتتى» (ماتاي 5:3).
ٴسوز ٴمانى: ادام بالاسىنىڭ تەك تاماق، باسپانا مەن كيىمنەن باسقا دا مۇقتاجدىعى بار. ول — قۇدايدى تانۋ. وسى مۇقتاجدىعىمىزدى مويىنداپ، قاناعاتتاندىرساق قانا شىن باقىتتى بولا الامىز.
-
قۇدايعا دۇعا ەتۋدىڭ كومەگى كوپ. قۇداي سوزىندە: «بار ۋايىمدارىڭدى وعان ارتىڭدار، سەبەبى ول قامدارىڭدى ويلايدى»،— دەلىنگەن (پەتىردىڭ 1-حاتى 5:7). دۇعا ايتىپ، ەڭسەنى كوتەرەتىن ويلار جايلى تولعانعاندا، تەرەڭ جانتىنىشتىعىن سەزىنەسىز (فىلىپىلىكتەرگە 4:6، 7).
-
قۇدايعا جاقىنداتاتىن مالىمەتتەردى وقىڭىز. وسى جۋرنالدا تىلگە تيەك ەتىلگەن اقىل-كەڭەستەر كيەلى جازبالاردان الىنعان. ول ٴبىزدىڭ قۇدايدى تانۋعا دەگەن مۇقتاجدىعىمىزدى قاناعاتتاندىرۋ ٷشىن جازىلعان. سونداي-اق بۇل اقىل-كەڭەستەر «دانالىق پەن سانالىلىققا» باۋليدى (ناقىل سوزدەر 3:21). نەگە كيەلى كىتاپتى وقىپ شىعۋدى a ماقسات ەتپەسكە؟ الدىمەن، «ناقىل سوزدەر» كىتابىنان باستاساڭىز بولادى.
a كيەلى كىتاپتى www.pr418.com تور بەكەتىنەن وقي الاسىز.