مارقا 12:1—44
-
زۇلىم جۇزىمشىلەر تۋرالى مىسال (1—12)
-
«قۇدايدىكىن قۇدايعا، پاتشانىكىن پاتشاعا» (13—17)
-
قايتا تىرىلۋگە قاتىستى سۇراق (18—27)
-
ەڭ باستى ەكى زاڭ (28—34)
-
ٴماسىح ٴداۋىتتىڭ ۇلى ما؟ (35—37ا)
-
ٴدىن مۇعالىمدەرىنەن ساقتاندىرۋ (37ا—40)
-
كەدەي جەسىر ايەلدىڭ ەكى تيىنى (41—44)
12 كەيىن يسا مىناداي مىسال كەلتىردى: «ٴبىر كىسى ٴجۇزىم باعىن وتىرعىزىپ+، ونى اينالدىرا قورشاۋ ورناتادى. سوسىن ٴجۇزىم سىعاتىن ورىن جاساپ، مۇنارا تۇرعىزادى+. بۇدان سوڭ باعىن جۇزىمشىلەرگە جالعا بەرىپ، ٶزى باسقا ەلگە ساپارعا اتتانادى+.
2 مەرزىمى جەتكەندە ول ونىمنەن ٶز ۇلەسىن الۋ ٷشىن جۇزىمشىلەرگە ٴبىر قۇلىن جۇمسايدى.
3 ٴبىراق ولار ونى ۇستاپ الىپ، ۇرىپ-سوعىپ، قۇرالاقان قايتارادى.
4 ول تاعى ٴبىر قۇلىن جىبەرگەندە، ونىڭ باسىن جارىپ، قورلىق كورسەتەدى+.
5 وزگە بىرەۋىن جۇمساعاندا، ونى ٶلتىرىپ تاستايدى. ول باسقا دا كوپتەگەن ادام جىبەرەدى، ٴبىراق ولار ٴبىرىن سوققىعا جىعىپ، ٴبىرىن ولتىرەدى.
6 ونىڭ جۇمسايتىن تاعى ٴبىر ادامى، ٶزىنىڭ سۇيىكتى ۇلى+، قالادى. ول: —مەنىڭ ۇلىمدى سيلار،— دەپ ويلاپ، اقىرىندا ۇلىن جىبەرەدى.
7 ٴبىراق جۇزىمشىلەر ٶزارا: —بۇل — مۇراگەر عوي+! جۇرىڭدەر، ونى ولتىرەيىك، سوندا مۇراسى بىزدىكى بولادى،— دەسىپ،
8 ونى ۇستاپ الىپ، ٶلتىرىپ، جۇزىمدىكتىڭ سىرتىنا سۇيرەپ شىعارىپ تاستايدى+.
9 ەندى جۇزىمدىكتىڭ يەسى نە ىستەيدى؟ ول كەلىپ، جۇزىمشىلەردىڭ كوزىن قۇرتادى دا، جۇزىمدىگىن باسقالارعا بەرەدى+.
10 جازباداعى كەلەسى سوزدەردى ەشقاشان وقىماپ پا ەدىڭدەر؟ وندا: —قۇرىلىسشىلار باس تارتقان تاس نەگىزگى بۇرىشتىق تاسقا* اينالدى+.
11 ٴبىزدىڭ كوز الدىمىزداعى بۇل كەرەمەت ٸستى جاساعان — ەحوبا،— دەلىنگەن عوي+».
12 ولار بۇل مىسالدىڭ وزدەرىنە قاتىستى ايتىلعانىن ٴتۇسىنىپ، يسانى ۇستاپ العىسى كەلدى. ٴبىراق حالىقتان قورىققاندىقتان ونى تاستاپ، جوندەرىنە كەتتى+.
13 بۇدان كەيىن ولار يسانى سوزدەن ۇستاۋ ٷشىن بىرنەشە پارىزشىلدار مەن يرودتىڭ جاقتاستارىن جىبەردى+.
14 ولار كەلىپ، وعان بىلاي دەدى: «ۇستاز، ٴبىز ٴسىزدىڭ شىنشىل ەكەنىڭىزدى ٵرى وزگەگە جاعىنۋدان اۋلاق ەكەنىڭىزدى بىلەمىز، ويتكەنى ٴسىز ەشكىمنىڭ بەت-جۇزىنە قاراماي، شىنىمەن قۇداي جولىنا ۇيرەتەسىز. ايتىڭىزشى، پاتشاعا* الىم-سالىق تولەۋ زاڭدى ما، جوق پا؟
15 ونى تولەۋىمىز كەرەك پە، جوق پا؟» يسا ولاردىڭ ەكىجۇزدىلىگىن بىلە قويىپ: «مەنى نەگە سىنايسىڭدار؟ ماعان ديناردى* اكەلىپ كورسەتىڭدەرشى»،— دەدى.
16 ولار بىرەۋىن اكەلىپ بەردى. سوندا ول: «مىنا سۋرەت پەن جازۋ كىمدىكى؟»— دەپ سۇرادى. ولار: «پاتشانىكى»،— دەگەندە،
17 يسا: «پاتشانىكىن پاتشاعا+، ال قۇدايدىكىن قۇدايعا بەرىڭدەر»+،— دەدى. ولار يساعا قايران قالدى.
18 سودان كەيىن وعان قايتا تىرىلۋگە سەنبەيتىن ساددۋكەيلەر*+ كەلىپ، مىناداي سۇراق قويدى+:
19 «ۇستاز، مۇسا بىزگە ەگەر بىرەۋ ارتىندا بالا قالدىرماي ولسە، وندا باۋىرى ونىڭ جەسىرىنە ۇيلەنىپ، مارقۇمنىڭ ۇرپاعىن جالعاستىرۋى كەرەكتىگىن جازعان بولاتىن+.
20 جەتى اعايىندى بار ەدى. سولاردىڭ ۇلكەنى ۇيلەنىپ، ارتىندا ۇرپاق قالدىرماي ٶلدى.
21 جەسىرىنە ەكىنشىسى ۇيلەنىپ، ول دا ارتىنان بالا قالدىرماي كوز جۇمدى. ۇشىنشىسىمەن دە سولاي بولدى.
22 وسىلاي جەتەۋى دە سول ايەلگە ۇيلەنىپ، ۇرپاق قالدىرماي ٶلدى. سوڭىندا ايەلدىڭ ٶزى دە دۇنيە سالدى.
23 ولگەندەر قايتا تىرىلگەندە، ول كىمنىڭ ايەلى بولادى؟ وعان جەتەۋى دە ۇيلەنگەن ەدى عوي».
24 يسا ولارعا مىنانى ايتتى: «سەندەر جازبالاردى دا، قۇدايدىڭ قۇدىرەتىن دە بىلمەگەندىكتەن قاتەلەسىپ تۇرسىڭدار، سولاي ەمەس پە+؟
25 ويتكەنى ولار قايتا تىرىلگەندە، ۇيلەنبەيدى دە، كۇيەۋگە دە شىقپايدى. ولار كوكتەگى پەرىشتەلەر ىسپەتتى بولادى+.
26 ال ولگەندەردىڭ قايتا تىرىلەتىنى جونىندە مۇسانىڭ كىتابىنداعى تىكەندى بۇتا تۋرالى اڭگىمەدەن قۇدايدىڭ وعان «مەن ىبىرايىم، ىسقاق جانە جاقىپتىڭ قۇدايىمىن» دەگەن سوزدەرىن وقىماپ پا ەدىڭدەر+؟
27 ول — ولگەندەردىڭ ەمەس، تىرىلەردىڭ قۇدايى. سەندەر قاتتى قاتەلەسەسىڭدەر+!»
28 ٴبىر ٴدىن ٴمۇعالىمى كەلىپ، ولاردىڭ ايتىسىپ جاتقانىن تىڭداپ تۇرعان ەدى. ول يسانىڭ جاقسى جاۋاپ بەرگەنىن كورىپ، ودان: «ەڭ باستى زاڭ قانداي؟»— دەپ سۇرادى+.
29 يسا بىلاي دەدى: «ەڭ باستى زاڭ مىناۋ: «تىڭدا، ۋا، يسرايل، ٴبىزدىڭ قۇدايىمىز ەحوبا — جالعىز ەحوبا.
30 قۇدايىڭ ەحوبانى بار جۇرەگىڭمەن، بۇكىل جان-تانىڭمەن، بارلىق اقىل-ويىڭمەن جانە بار كۇش-قۋاتىڭمەن ٴسۇي+».
31 ال ەكىنشىسى مىناداي: «وزگە ادامدى ٶزىڭدى سۇيگەندەي ٴسۇي»+. بۇلاردان ماڭىزدى زاڭ جوق».
32 سوندا ٴدىن ٴمۇعالىمى: «ۇستاز، شىندىعىن ايتتىڭىز. «قۇداي جالعىز، ٵرى ودان باسقا شىنايى قۇداي جوق»+.
33 ونى بار جۇرەگىڭمەن، بار تۇسىنىگىڭمەن جانە بار كۇش-قۋاتىڭمەن ٴسۇيۋ ٵرى وزگە ادامدى ٶزىڭدى سۇيگەندەي ٴسۇيۋ تۇگەلدەي ورتەلەتىن قۇرباندىقتار مەن باسقا قۇرباندىقتاردىڭ بارىنەن دە ارتىق+»،— دەدى.
34 يسا ونىڭ اقىلمەن جاۋاپ بەرگەنىن كورىپ: «قۇداي پاتشالىعىنان الىس ەمەس ەكەنسىڭ»،— دەدى. بۇدان كەيىن وعان سۇراق قويۋعا ەشكىمنىڭ باتىلى بارمادى+.
35 عيباداتحانادا ٴتالىم بەرىپ جاتىپ، يسا ولارعا بىلاي دەدى: «نەگە ٴدىن مۇعالىمدەرى ٴماسىحتى ٴداۋىتتىڭ ۇلى دەيدى+؟
36 كيەلى رۋحتىڭ جەتەلەۋىمەن+ ٴداۋىتتىڭ ٶزى: —ەحوبا مەنىڭ يەمە بىلاي دەدى: «جاۋلارىڭدى اياعىڭنىڭ استىنا سالىپ بەرگەنىمشە، وڭ جاعىمدا وتىر»،— دەگەن عوي+.
37 ٴداۋىتتىڭ ٶزى ونى يەم دەپ اتاسا، قالايشا ول ونىڭ ۇلى بولادى+؟»
جينالعان قالىڭ جۇرت ونىڭ ايتقاندارىن سۇيسىنە تىڭدادى.
38 ول ٵرى قاراي بىلاي دەپ ٴتالىم بەردى: «ٴدىن مۇعالىمدەرىنەن ساقتانىڭدار! ولار ۇزىن شاپان كيىپ جۇرگەندى، بازار الاڭدارىندا جۇرتتىڭ وزدەرىنە سالەم بەرگەنىن+،
39 ٴماجىلىسحانالاردا الدىڭعى ورىنداردا وتىرىپ، ال قوناقاسىلاردا توردە جانتايعاندى ۇناتادى+؛
40 ولار جەسىرلەردىڭ ٷي-جايىن جالمايدى؛ ادەيى جۇرت كوزىنە ٴتۇسۋ ٷشىن ۇزاق دۇعا ەتەدى. ولارعا الدەقايدا قاتاڭ ۇكىم شىعارىلادى».
41 يسا ساداقا سالاتىن ىدىستار كورىنەتىن جەرگە وتىرىپ+، جۇرتتىڭ قالاي اقشا سالىپ جاتقانىن باقىلاي باستادى. كوپتەگەن بايلار اقشانى مولىنان سالىپ جاتتى+.
42 سول كەزدە ٴبىر كەدەي جەسىر ايەل كەلىپ، قۇنى وتە تومەن ۇساق ەكى تيىن* سالدى+.
43 يسا شاكىرتتەرىن قاسىنا شاقىرىپ الىپ: «سەندەرگە شىندىعىن ايتامىن، مىنا كەدەي جەسىر ايەل اقشا سالىپ جاتقانداردىڭ بارىنەن دە كوپ سالدى+.
44 ويتكەنى بارلىعى وزدەرىنەن ارتىلعانىن سالسا، بۇل ايەل كەدەي بولا تۇرا، بار اقشاسىن، كۇنەلتەتىن نارسەسىنىڭ ٴبارىن سالدى+»،— دەدى.
سىلتەمەلەر
^ تۇسىندىرمەنى قاراڭىز.
^ سوزبە-ٴسوز «سەزارعا».
^ B14 قوسىمشاسىن قاراڭىز.
^ تۇسىندىرمەنى قاراڭىز.
^ سوزبە-ٴسوز «ەكى لەپتا (1 كودرانت)». B14 قوسىمشاسىن قاراڭىز.
