Wahota kwĩyũria ũũ: ‘Angĩkorũo Ngai ndarĩ ũndũ atoĩ-rĩ, nginya mwĩcirĩrie na mabataro makwa-rĩ, njagĩrĩirũo kũhoya nĩkĩ?’ Kĩũria kĩu nĩ kĩa bata. Na githĩ Jesu ndoigire atĩ Ngai ‘nĩoĩ maũndũ marĩa matũbatairie tũtanahoya’? (Mathayo 6:8) Mũthamaki wa tene wa Isiraeli wetagwo Daudi nĩ aamenyaga ũguo, na nĩkĩo aandĩkire ũũ: “Amu gũtirĩ kiugo kĩngĩkinya rũrĩmĩ-inĩ rũakwa, gĩtamenyekete nĩwe kĩrĩ gĩothe, wee Jehova.” (Thaburi 139:4) Kĩũria nĩ rĩrĩ, twagĩrĩirũo kũhoya nĩkĩ? Nĩguo tuone macokio, reke twarĩrĩrie ũrĩa Bibilia yugĩte ũhoro-inĩ wĩgiĩ mahoya ma ndungata cia Ngai. *

O na gũtuĩka Bibilia yugaga atĩ Jehova * Ngai ndarĩ ũndũ atoĩ, nĩ yonanagia atĩ to kwenda endaga tu kũmenya ũhoro wa ndungata ciake. (Thaburi 139:6; Aroma 11:33) Jehova ndaigaga ũhoro wĩgiĩ ndungata ciake ta ũrĩa kompiuta ĩigaga ũhoro wa mũndũ, ĩtekũmwĩciria. Ma nĩ atĩ, Ngai nĩ endaga mũno kũmenya ũrĩa tũraigua ngoro-inĩ ciitũ, tondũ nĩ endaga tũmũkuhĩrĩrie. (Thaburi 139:23, 24; Jakubu 4:8) Nĩkĩo Jesu eekĩrire arutwo ake ngoro mathiĩ na mbere kũhoya, o na gũtuĩka Ithe witũ wa igũrũ nĩ amenyaga mabataro maitũ. (Mathayo 6:6-8) O ũrĩa tũreera Mũũmbi witũ ũrĩa tũraigua, noguo tũrĩgĩaga ũrata wa hakuhĩ nake.

Rĩmwe na rĩmwe rĩrĩa tũrahoya, no twage ciugo cia kwĩra Ngai ũrĩa tũraigua. Hĩndĩ ta ĩyo, Ngai no amenye ũrĩa tũraigua akĩhũthĩra ũmenyo wake ũtangĩmenyeka ũrĩa ũtariĩ, na atũhingĩrie mabataro maitũ. (Aroma 8:26, 27; Aefeso 3:20) Tũngĩmenya atĩ Ngai nĩ acokia mahoya maitũ nginya na njĩra ĩtarĩ ya ĩmwe kwa ĩmwe, no tũigue tũmũkuhĩrĩirie.

Bibilia nĩ ĩtũũmagĩrĩa atĩ, Ngai Mwene-Hinya-Wothe nĩ acokagia mahoya ma ndungata ciake njĩhokeku, na ĩgatwĩra kĩrĩa gĩtũmaga aage gũthikĩrĩria mahoya mamwe. Kwa mũhiano, rĩrĩa Isiraeli kwaiyũire ciĩko cia ũhinya, Ngai nĩ aatũmire mũnabii wake Isaia ameere ũũ: “Hĩndĩ ĩrĩa mũrĩhoyaga mahoya maingĩ, ndirĩmũiguaga; amu moko manyu maiyũrĩtwo nĩ thakame.” (Isaia 1:15) Kwoguo, Ngai ndathikagĩrĩria mahoya ma andũ arĩa matathĩkagĩra watho wake, kana arĩa mahoyaga marĩ na mwerekera mũũru.—Thimo 28:9; Jakubu 4:3.

O na kũrĩ ũguo, Bibilia yugaga ũũ: “Twahoya ũndũ waganĩrĩire na kwenda gwake, nĩatũiguaga.” (1 Johana 5:14) Hihi ũguo nĩ kuuga atĩ, hingo ciothe Ngai nĩ arĩhingagĩria ndungata ciake ũndũ o wothe ũrĩa ciahoya? Aca. Ta wĩcirie ũhoro wa mũtũmwo Paulo. Aahoire Ngai maita matatũ amwehererie ‘mũigua mũnene wamũthecete mwĩrĩ.’ (2 Akorintho 12:7, 8) No kũhoteke Paulo aarĩ na thĩna wa maitho na no mũhaka akorũo ũndũ ũcio nĩ wamũgiaga mũno! Paulo nĩ aahetwo hinya wa kũhonania, o na akahota kũriũkia mũndũ wakuĩte, ĩndĩ we nĩ atũũrire arĩ na thĩna ũcio wa maitho. (Atũmwo 19:11, 12; 20:9, 10) O na gũtuĩka Paulo ndaacokeirio mahoya make ta ũrĩa eendaga, nĩ aaiganĩire nĩ ũrĩa Ngai aamũcokeirie.—2 Akorintho 12:9, 10.

Ũhoro wa ma nĩ atĩ, Ngai nĩ aacokirie mahoya ma ndungata imwe ciake na njĩra ya ciama. (2 Athamaki 20:1-7) No ti kaingĩ eekaga ũguo. Ndungata imwe cia Ngai nĩ ciagiĩkaga mũno ciona Ngai ta ataracokia mahoya ma cio. Mũthamaki Daudi oririe Ngai ũũ: “Ĩ Jehova, nĩ nginya rĩ ũgũtũũra ũriganĩirũo nĩ niĩ ta ndiganĩire o nginya tene?” (Thaburi 13:1) No hĩndĩ ĩrĩa Daudi aaririkanire ũrĩa Jehova aanamũhonokia maita maingĩ, nĩ aagĩire na mwĩhoko rĩngĩ harĩ Ngai. Ihoya-inĩ o rĩu, Daudi ongereire akiuga ũũ: “No niĩ-rĩ, ũtugi waku nĩguo ndĩĩhokete.” (Thaburi 13:5) Rĩmwe ndungata cia Ngai no ibatare gũthiĩ na mbere kũhoya ikirĩrĩirie, o ta ũrĩa Daudi eekire, nginya rĩrĩa Jehova agaacokia mahoya ma cio.—Aroma 12:12.

Ngai atũhingagĩria maũndũ marĩa tũrabatara.

O na aciari makĩrũmbũyagia ciana ciao, rĩmwe marĩ na gĩtũmi kĩega, nĩ magaaga gũcihe kĩrĩa cietia na hĩndĩ ĩrĩa cietia. Na njĩra o ta ĩyo, Ngai no aage gũcokia mahoya maitũ ũrĩa tũngĩenda kana rĩrĩa tũngĩrĩgĩrĩra. Ĩndĩ no tũkorũo na ma atĩ Mũũmbi witũ, o ta mũciari ũrĩ wendo, nĩ arĩtũhingagĩria maũndũ marĩa tũrabatara ihinda rĩrĩa rĩagĩrĩire, na njĩra ĩrĩa yagĩrĩire.—Luka 11:11-13.

Rĩmwe Ngai acokagia mahoya na njĩra ĩtarĩ ya ĩmwe kwa ĩmwe.

Ĩ angĩkorũo nĩ tũhoyaga twehererio thĩna mũna ũkoretwo ũgĩtũthumbũra kwa ihinda iraya? Hihi no tuuge atĩ Jehova ndacoketie mahoya maitũ, tondũ ũmũthĩ ndekaga ũguo na njĩra ya kĩama? Handũ ha gũtua ũguo, twagĩrĩirũo gwĩciria kana hihi nĩ acoketie na njĩra ĩtarĩ ya ĩmwe kwa ĩmwe. Kwa mũhiano, no gũkorũo harĩ mũrata ũtwendete wekire ũrĩa wothe angĩahotire na agĩtũhe ũteithio ihinda rĩrĩa rĩagĩrĩire. (Thimo 17:17) Githĩ to kũhoteke Jehova nĩwe watũmĩte mũrata ta ũcio oke atũteithie? Makĩria ma ũguo, Ngai nĩ acokagia mahoya maitũ kũgerera Kiugo gĩake Bibilia. Twamĩthoma, no tuone ũndũ ũngĩtũteithia kũhiũrania na thĩna ũrĩa tũracemania naguo.—2 Timotheo 3:16, 17.

Handũ ha Ngai kwehereria ndungata ciake mathĩna marĩa iracemania namo, kaingĩ aciheaga hinya wa kũhiũrania na mathĩna macio. (2 Akorintho 4:7) Kwa mũhiano, rĩrĩa Jesu aathaithire Ngai amwehererie ruo rũrĩa aarĩ naruo, eciria ũrĩa rĩĩtwa rĩa Ithe rĩngĩahakirũo gĩko, Jehova nĩ aatũmire mũraika amwongerere hinya. (Luka 22:42, 43) Na njĩra o ta ĩyo, Ngai no ahũthĩre mũrata witũ wa hakuhĩ gũtũũmĩrĩria hĩndĩ ĩrĩa tũrĩ na mathĩna. (Thimo 12:25) Nĩ ũndũ rĩmwe Ngai nĩ ahũthagĩra njĩra ĩtarĩ ya ĩmwe kwa ĩmwe gũcokia mahoya maitũ, nĩ twagĩrĩirũo gwĩciragia njĩra ingĩ iria ahũthagĩra.

Ngai no eterere nginya hingo ĩrĩa yagĩrĩire ĩkinye.

Bibilia yugaga atĩ, Ngai Mwene-Hinya-Wothe nĩ atũũgagĩria arĩa ahoreri “hĩndĩ ĩrĩa njagĩrĩru yakinya.” (1 Petero 5:6) Kwoguo rĩrĩa tuona Jehova ategũcokia mahoya maitũ hĩndĩ ĩrĩa tũrerĩgĩrĩra, ũguo ti kuuga atĩ ndaratwĩciria. Ithenya rĩa ũguo, tondũ Mũũmbi witũ nĩ atũũĩ wega makĩria, nĩ amenyaga hĩndĩ ĩrĩa njagĩrĩru ya gũcokia mahoya maitũ.

Kwa ngerekano: Ta wĩcirie ũrĩ na kahĩĩ kanini na karenda ũkagũrĩre mũithikiri. Hihi ũngĩthiĩ gũkagũrĩra o rĩo? Ũngĩona atĩ gatikinyĩte ga gũtwarithia mũithikiri, ũndũ ũrĩa hihi ũngĩka nĩ gweterera. Thutha-inĩ, no ũkagũrĩre ũngĩona no kahote gũtwarithia. O ũndũ ũmwe na ũguo, Ngai nĩ arĩtũheaga ‘maũndũ marĩa marĩ ngoro ciitũ’ hĩndĩ ĩrĩa yagĩrĩire, twathiĩ na mbere kũmũhoya.—Thaburi 37:4.

Bibilia nĩ ĩhatagĩrĩria Akristiano othe a ma matigatirike kũhoya. Andũ amwe no moige atĩ, ‘Kũhoya mũndũ ategũtigithĩria ti ũndũ mũhũthũ.’ Angĩkorũo nĩ tũthumbũrĩtwo nĩ thĩna mũna kwa ihinda iraya, no ũkorũo ũrĩ ũndũ mũritũ gũthiĩ na mbere kũhoya o tũkĩonaga Ngai ta ataracokia mahoya maitũ. Twagĩrĩirũo kũririkana ũrĩa Jesu aarutanire, atĩ nĩ wega tũhoyage tũtegũtigithĩria.

Jesu nĩ aaheanire ngerekano ya mũtumia ũmwe wa ndigwa, watũũraga athiaga kũrĩ mũtuanĩri  cira ũtaarĩ na kĩhooto agĩetha ũteithio. (Luka 18:1-3) O na gũtuĩka mũtuanĩri cira ũcio nĩ aaregete kũmũteithia, thutha-inĩ nĩ eĩrire ũũ na ngoro: “O na itetigagĩra Ngai, na ndiconokagĩra mũndũ, ĩndĩ tondũ mũtumia ũyũ wa ndigwa nĩandangaga-rĩ, nĩngũmũrĩhĩria, nĩ getha atige kũ’nogagia nĩ gũũkaga haha hingo ciothe.” (Luka 18:4, 5) Kũringana na maandĩko ma tene ma Kĩngiriki ciugo icio ciugĩte atĩ, mũtuanĩri cira ũcio, aateithirie mũtumia ũcio wa ndigwa nĩguo “ndakamũturume ritho,” kana na ciugo ingĩ, “ndakamũthũkĩrie rĩĩtwa.” * Angĩkorũo mũtuanĩri cira ũtarĩ na kĩhooto, no ateithie mũtumia ta ũcio mũthĩni nĩguo ndagathũkĩrio rĩĩtwa-rĩ, na githĩ Ngai witũ ũrĩa ũtũrũmbũyagia to ateithie “arĩa mamũkayagĩra mũthenya o na ũtukũ”? O ta ũrĩa Jesu aacokire akiuga, Ngai “nĩarĩmarĩhĩria narua.”—Luka 18:6-8.

O na gũtuĩka rĩmwe no tũigue tũkĩnoga kũhoya Ngai atũteithie, tũtiagĩrĩire gũkua ngoro. Nĩ tũrĩonanagia atĩ, nĩ tũrehoka Ngai biũ atũteithagie angĩkorũo tũtirĩtigithagĩria kũhoya. Ningĩ nĩ wega kũmenyaga njĩra iria Ngai arahũthĩra gũcokia mahoya maitũ, na ũndũ ũcio nĩ ũrĩtũteithagia kũmũkuhĩrĩria makĩria. Twĩ na ma atĩ, twathiĩ na mbere kũhoya Jehova tũrĩ na wĩtĩkio na twahoya kũringana na wendi wake, nĩ arĩcokagia mahoya maitũ.—Luka 11:9.