Kũrĩ Aroma 12:1-21
12 Nĩ ũndũ ũcio ariũ a Ithe witũ, ndamũthaitha kũgerera ũcayanĩri wa Ngai, mũrute mĩĩrĩ yanyu+ ĩrĩ igongona rĩrĩ muoyo, itheru+ na rĩretĩkĩrĩka nĩ Ngai, ũtungata mũtheru mũkĩhũthĩra ũhoti wanyu wa gwĩciria.+
2 Na mũtige kwĩgerekanagia na mũtabarĩre ũyũ wa maũndũ,* ĩndĩ mũgarũrũke na njĩra ya kũgarũrĩra meciria manyu,+ nĩgetha mwĩmenyagĩre+ wendi wa Ngai ũrĩa mwega, wa gwĩtĩkĩrĩka na mũkinyanĩru.
3 Tondũ kũgerera ũtugi mũnene ũrĩa niĩ heetwo, ngwĩra mũndũ o wothe gatagatĩ-inĩ kanyu ndageciragie ũhoro wake mwene gũkĩra ũrĩa kwagĩrĩire gwĩciria,+ no eciragie nĩguo agĩe na meciria mega, kũringana na gĩthimi kĩa wĩtĩkio kĩrĩa Ngai aheete* o mũndũ.+
4 Nĩ gũkorũo o ta ũrĩa mwĩrĩ ũmwe ũkoragwo na ciĩga nyingĩ,+ no ciĩga icio ciothe itirutaga wĩra ũhaanaine-rĩ,
5 no taguo harĩ ithuĩ, o na gũtuĩka tũrĩ aingĩ, tũrĩ mwĩrĩ ũmwe thĩinĩ wa Kristo, no tũrĩ mũndũ ũmwe ũmwe-rĩ, tũrĩ kĩĩga kĩa mũndũ na ũrĩa ũngĩ.+
6 Nĩ ũndũ ũcio, tondũ tũrĩ na iheo mwanya mwanya kũringana na ũtugi mũnene ũrĩa tũheetwo-rĩ,+ angĩkorũo nĩ kĩa ũrathi, nĩ tũrathage kũringana na wĩtĩkio ũrĩa tũheetwo;
7 kana angĩkorũo nĩ ũtungata, nĩ tũrutagei ũtungata ũcio; kana mũndũ ũrĩa ũrutanaga, nĩ arutanage;+
8 kana ũrĩa wĩkĩranaga ngoro,* nĩ ekĩranage ngoro;*+ ũrĩa ũheanaga, nĩ aheanage eyendeire;+ ũrĩa ũrũgamagĩrĩra maũndũ,* nĩ ekage ũguo na kĩyo;+ ũrĩa ũiguanagĩra tha, nĩ ekage ũguo akenete.+
9 Rekei wendo wanyu ũkorũo ũtarĩ na ũhinga.+ Thũũragai ũndũ ũrĩa mũũru;+ rũmagiai ũndũ ũrĩa mwega.
10 Ũhoro-inĩ wĩgiĩ wendo ta wa andũ a nyina ũmwe, koragwoi na wendo muororo harĩ mũndũ na ũrĩa ũngĩ. Harĩ kũheana gĩtĩo, koragwoi mũrĩ a mbere.*+
11 Koragwoi na kĩyo, mũtigatuĩke igũũta.*+ Hĩahĩagai nĩ ũndũ wa roho.+ Tuĩkai ngombo cia Jehova.*+
12 Kenagai nĩ ũndũ wa kĩĩrĩgĩrĩro. Kiragĩrĩriai rĩrĩa mũrĩ na mathĩna.+ Hoyagai mũtegũtigithĩria.+
13 Heagai arĩa aamũre kũringana na mabataro mao.+ Nyitagai andũ ũgeni hingo ciothe.+
14 Rathimagai arĩa mamũnyariraga;+ rathimagai andũ na mũtikamarumage.+
15 Kenagai hamwe na arĩa marakena; rĩragai hamwe na arĩa mararĩra.
16 Onagai arĩa angĩ ta ũrĩa mwĩyonaga; mũtikaigage meciria manyu harĩ maũndũ manene,* ĩndĩ mũtongoragio nĩ maũndũ matarĩ manene.+ Mũtigakoragwo mũrĩ ogĩ maitho-inĩ manyu ene.+
17 Mũtikanarĩhe ũũru na ũũru harĩ mũndũ o na ũrĩkũ.+ Mwĩciragie ũhoro wa maũndũ marĩa mangĩoneka marĩ mega harĩ* andũ othe.
18 Kũngĩhoteka, ĩkagai o ũrĩa wothe mũngĩhota mũkoragwo na thayũ hamwe na andũ othe.+
19 Endwa akwa, mũtikanerĩhĩrie, no tigagĩriai mang’ũrĩ* mweke;+ tondũ nĩ kwandĩke ũũ: “‘Kũrĩhanĩria nĩ gwakwa; nĩ niĩ ngaarĩhanĩria,’ ũguo nĩguo Jehova* ekuuga.”+
20 No “thũ yaku ĩngĩkorũo ĩhũtiĩ, mĩhe gĩa kũrĩa; ĩngĩkorũo ĩnyotiĩ, mĩhe gĩa kũnyua; nĩ gũkorũo gwĩka ũguo nĩ kũmĩigĩrĩra makara marĩ na mwaki mũtwe.”*+
21 Ndũkanareke ũũru ũgũtoorie, ĩndĩ tooragia ũũru na njĩra ya gwĩkaga wega.+
Tũũhoro twa magũrũ-inĩ
^ Kana “mahinda maya.” Rora Ũthathaũri wa Ciugo.
^ Kana “agaĩire.”
^ Kana “ũtaaranaga.”
^ Kana “ataaranage.”
^ Kana “ũtongoragia.”
^ Kana “oyagai ikinya rĩa mbere.”
^ Kana “Mũtikagũtare mawĩra-inĩ manyu.”
^ Rora Ũhoro Muongerere A5.
^ Kana “mũtigeciragie maũndũ manene.”
^ Kana “maitho-inĩ ma.”
^ Nĩ mang’ũrĩ ma Ngai.
^ Rora Ũhoro Muongerere A5.
^ Ũguo nĩ kuuga, gũtũma mũndũ ũcio ororoe na atige kũũmia ngoro.
