Tũrabatara Ũthamaki wa Ngai Nĩkĩ?
Rĩrĩa andũ a mbere moombirũo, Mũũmbi witũ ũrĩa wĩtagwo Jehova nowe tu warĩ Mwathani. Aathanaga na njĩra ya wendo. Aathondekire mũciĩ mũthaka, nĩguo mũgũnda wa Edeni, wa gũikaragwo nĩ andũ, na akĩmahe irio nyingĩ. Ningĩ nĩ aaheire andũ wĩra mwega wa kũruta. (Kĩambĩrĩria 1:28, 29; 2:8, 15) Andũ nĩ mangĩakeneire gũtũũra na thayũ, mangĩaikarire rungu rwa wathani wa Ngai wa wendo.
Andũ a mbere nĩ maaregire Ngai akorũo arĩ Mwathani wao
Bibilia yonanagia atĩ mũraika ũmwe mũremi, ũrĩa wacokire gwĩtwo Shaitani ũrĩa Mũcukani, nĩ ookĩrĩire kĩhooto kĩa Ngai gĩa gwathana. Ooigire atĩ andũ no makorũo na gĩkeno mangĩaga gũkorũo rungu rwa wathani na ũtongoria wa Ngai. Ũndũ wa kĩeha nĩ atĩ, Adamu na Hawa, aciari aitũ a mbere, maarũmĩrĩire njĩra njũru ya Shaitani na makĩremera Ngai.—Kĩambĩrĩria 3:1-6; Kũguũrĩrio 12:9.
Tondũ Adamu na Hawa nĩ maaregire Ngai akorũo arĩ Mwathani wao, nĩ moorirũo nĩ mũciĩ wao ũrĩa warĩ Paradiso, na magĩte kĩĩrĩgĩrĩro gĩa gũtũũra tene na tene marĩ na ũgima mũkinyanĩru wa mwĩrĩ. (Kĩambĩrĩria 3:17-19) Ningĩ itua rĩao nĩ rĩahutirie ciana iria maacokire kũgĩa. Bibilia yugaga atĩ, tondũ wa Adamu kwĩhia, “mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia.” (Aroma 5:12) Mehia nĩ maarehire moimĩrĩro mangĩ moru. Bibilia yugaga: “Mũndũ akoretwo agĩatha mũndũ agatũmaga one o maũndũ moru.” (Kohelethu 8:9) Ũguo nĩ kuuga, rĩrĩa andũ mareyatha, hĩndĩ ciothe gũkoragwo na mathĩna.
WATHANI WA ANDŨ KWAMBĨRĨRIA
Nimurodi nĩ aareganire na wathani wa Jehova
Mũndũ wa mbere gwatha andũ ũrĩa ũgwetetwo thĩinĩ wa Bibilia nĩ Nimurodi. Na nĩ aareganire na wathani wa Jehova. Kuuma hĩndĩ ĩyo ya Nimurodi, andũ marĩ hinya manahũthĩra hinya wao na njĩra njũru. Mĩaka ta 3,000 mĩhĩtũku, Mũthamaki Suleimani aandĩkire ũũ: “Ngĩona maithori ma arĩa maahinyagĩrĩrio, na gũtiarĩ na mũndũ wa kũmomĩrĩria. Nao andũ arĩa maamahinyagĩrĩria maarĩ na hinya.”—Kohelethu 4:1.
Ũguo noguo maũndũ mahaana ũmũthĩ. Mwaka-inĩ wa 2009, ibuku rĩmwe rĩa Ũrũmwe wa Mabũrũri rĩoigire atĩ wathani mũũru nĩ wonekete biũ atĩ nĩguo “kĩhumo kĩrĩa kĩnene kĩa maũndũ moru marĩa marekĩka thĩinĩ wa thĩ.”
IHINDA RĨA KUOYA IKINYA!
Nĩ kũrabatarania athani ega na thirikari njega thĩinĩ wa thĩ. Na ũguo nĩguo Mũũmbi witũ eranĩire!
O na thirikari iria njega biũ cia andũ nĩ iremetwo kũniinĩra andũ mathĩna mao
Ngai nĩ ahandĩte thirikari, kana Ũthamaki ũrĩa ũgaacoka ithenya rĩa wathani wothe wa andũ na “noguo wiki ũgaatũũra wĩhandĩte tene na tene.” (Danieli 2:44) Ũthamaki ũcio nĩguo andũ milioni nyingĩ makoretwo makĩhoya ũũke. (Mathayo 6:9, 10) No Ngai tiwe mwene ũgaakorũo agĩathana Ũthamaki-inĩ ũcio. Ithenya rĩa ũguo, nĩ athuurĩte mũndũ ũngĩ wanatũũra gũkũ thĩ akorũo arĩ Mwathani. Hihi Ngai athuurĩte ũũ?
Icunjĩ Ingĩ Hihi Ũngĩenda Gũthoma
MACOKIO MA CIŨRIA CIA BIBILIA
Hihi Ũthamaki wa Ngai Ũrĩ Ngoro-inĩ ya Mũndũ?
Bibilia yonanagia atĩa rĩrĩa yoiga atĩ “ũthamaki wa Ngai wĩ thĩinĩ wanyu”?
