Isaia 11:1-16
11 Na rĩrĩ, rũhonge+ nĩ rũgaakũra kuuma gĩthukĩ-inĩ kĩa Jesii,+Na thuuna+ kuuma mĩri-inĩ yake ĩrute maciaro.
2 Naguo roho wa Jehova nĩ ũgaaikara igũrũ rĩake,+Roho wa ũũgĩ+ na wa ũtaũku,Roho wa ũtaarani na wa ũhoti,+Roho wa ũmenyo na wa gwĩtigĩra Jehova.
3 Na nĩ agaakenagĩra gwĩtigĩra Jehova.+
Ndagaatuanĩra ciira kũgerera maũndũ marĩa arona na maitho make,Kana arũnge andũ kũringana na maũndũ marĩa matũ make maigua.+
4 Agaatuĩra andũ arĩa matarĩ hinya na njĩra ya kĩhooto,*Na agakaanania arĩ na ũrũngĩrĩru nĩ ũndũ wa andũ arĩa ahooreri a thĩ.
Nĩ akaahũũra thĩ na rũthanju rwa kanua gake+Na orage arĩa aganu akĩhũthĩra mĩhũmũ ya* mĩromo yake.+
5 Ũthingu nĩguo ũgaatuĩka mũcibi wa njohero yake,Na wĩhokeku ũtuĩke mũcibi wake wa kwĩhotora.+
6 Njũi nĩ ĩgaaikaranagia kwa ihinda na kagondu,+Nayo ngarĩ na kabũri igakoma hamwe,Na njaũ na mũrũthi* na nyamũ ĩrĩa norie igaakoragwo hamwe ciothe;*+Na igaatongoragio nĩ kahĩĩ kanini.
7 Ng’ombe na nduba ikaarĩaga hamwe,Na twana twacio tũgakoma hamwe.
Naguo mũrũthi ũkaarĩaga nyeki o ta ndegwa.+
8 Kaana ga kuonga gagaathaakagĩra igũrũ rĩa irima rĩa nduĩra,Na kaana gatigĩte kuonga gakaaiga guoko gwako kĩmamo-inĩ kĩa nyoka ĩrĩ thumu.
9 Itikaagerana ngero o na hanini,+Kana irehe mwanangĩko o wothe kĩrĩma-inĩ gĩakwa gĩothe kĩrĩa kĩamũre,+Tondũ hatarĩ nganja thĩ nĩ ĩkaaiyũrũo nĩ ũmenyo wĩgiĩ Jehova
O ta ũrĩa maĩ mahumbagĩra iria.+
10 Mũthenya ũcio mũri wa Jesii+ nĩ ũkaarũgama ũtuĩke kĩmenyithia* harĩ ikundi cia andũ.+
Ndũrĩrĩ nĩ igaacaria ũtongoria harĩ we,*+Na kĩhurũko gĩake nĩ gĩkaagĩa na riri.
11 Na rĩrĩ, mũthenya ũcio Jehova nĩ agaatambũrũkia guoko gwake riita rĩa kerĩ, nĩguo acokie matigari ma andũ ake arĩa matigarĩte kuuma Ashuri,+ kuuma Misiri,+ kuuma Patherosi,+ kuuma Kushi,+ kuuma Elamu,+ kuuma Shinaru,* kuuma Hamathu, na kuuma icigĩrĩra-inĩ cia iria.+
12 Nĩ akaahanda kĩmenyithia* nĩ ũndũ wa ndũrĩrĩ na acokanĩrĩrie andũ a Isiraeli arĩa mahurunjũkĩte,+ ningĩ acokanĩrĩrie andũ a Juda arĩa mahurunjũkĩte kuuma kona-inĩ iria inya cia thĩ.+
13 Ũiru wa Efiraimu nĩ ũgaakorũo ũthirĩte,+Na arĩa mokagĩrĩra Juda nĩ makaaniinwo.
Efiraimu ndakaiguĩra Juda ũiru,Kana Juda okĩrĩre Efiraimu.+
14 Nao nĩ makaaharũrũka hũgũrũrũ-inĩ cia* Afilisti mwena wa ithũĩro;Marĩ hamwe nĩ magaataha andũ a mwena wa Irathĩro.
Nĩ magaatambũrũkia guoko kwao mokĩrĩre* Edomu+ na Moabi,+Nao Aamoni magaatuĩka a gwathagwo nĩo.+
15 Jehova nĩ akaagayania* iria rĩa Misiri harĩa rĩcomokete*+Na acũgie guoko gwake igũrũ rĩa Rũũĩ.*+
Nĩ akaahũthĩra mĩhũmũ yake mĩhiũ* arũgũthe tũrũũĩ-inĩ twaruo mũgwanja,*Na atũme andũ makĩranĩrie kuo mekĩrĩte iratũ.
16 Na nĩ gũgaakorũo na barabara nene+ kuuma Ashuri nĩ ũndũ wa matigari ma andũ ake arĩa matigarĩte,+Ta ĩrĩa yarĩ kuo nĩ ũndũ wa Isiraeli mũthenya ũrĩa ooimire bũrũri wa Misiri.
Tũũhoro twa magũrũ-inĩ
^ Kana “roho wa.”
^ Kana “ũthingu.”
^ Kana “mũrũthi mwĩthĩ wa njamba.”
^ Kana hihi, “Na njaũ na mũrũthi ikaarĩaga hamwe.”
^ Kana “Ndũrĩrĩ nĩ ikaamũcaria.”
^ Kana “mũtĩ wa kũmenyithania.”
^ Ũguo nĩ kuuga, Babulonia.
^ Kana “mũtĩ wa kũmenyithania.”
^ Ũkk., “kĩande-inĩ kĩa.”
^ Kana “monanie hinya wao igũrũ rĩa.”
^ Kana hihi, “akoomithia.”
^ Ũkk., “rũrĩmĩ-inĩ rwarĩo.”
^ Nĩ Rũũĩ rwa Farati.
^ Kana “roho wake mũhiũ.”
^ Kana hihi, “arũgũthe rũtuĩke tũrũũĩ mũgwanja.”
