Ũhoro Mwega Ũrĩa Waandĩkirũo nĩ Mathayo 24:1-51
24 Rĩrĩa Jesu ooimaga hekarũ-inĩ, arutwo ake magĩthiĩ kũrĩ we kũmuonia mĩako ya hekarũ.
2 Nake akĩmeera atĩrĩ: “Nĩ mũrona indo ici ciothe? Ngũmwĩra atĩrĩ na ma, gũtirĩ ihiga haha rĩgaatigwo rĩikarĩire rĩrĩa rĩngĩ, rĩtamomoretwo.”+
3 Na rĩrĩa aaikarĩte thĩ Kĩrĩma-inĩ kĩa Mĩtamaiyũ, arutwo ake magĩũka kũrĩ we hatarĩ andũ angĩ, makĩmũũria atĩrĩ: “Ta twĩre atĩrĩ, maũndũ macio mageekĩka rĩ, na nĩ kĩĩ gĩgaakorũo kĩrĩ kĩmenyithia kĩa ihinda rĩaku rĩa gũkorũo kuo*+ na kĩa ithirĩro rĩa mũtabarĩre wa maũndũ?”*+
4 Jesu akĩmacokeria ũũ: “Mwĩmenyererei mũtikanahĩtithio nĩ mũndũ o na ũrĩkũ,+
5 tondũ andũ aingĩ nĩ magooka na rĩĩtwa rĩakwa, makiugaga atĩrĩ, ‘Niĩ nĩ niĩ Kristo,’ na nĩ makaahĩtithia andũ aingĩ.+
6 Nĩ mũkaaigua ũhoro wa mbaara na riboti ciĩgiĩ mbaara. Mũtikanetigĩre, tondũ no mũhaka maũndũ macio mekĩke, no mũico ndũgaakorũo ũkinyĩte.+
7 “Nĩ gũkorũo rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ,+ na nĩ gũkaagĩa ng’aragu+ na ithingithia kũndũ na kũndũ.+
8 Maũndũ macio mothe nĩ kĩambĩrĩria kĩa ruo ta rwa mũtumia arĩ hakuhĩ kũgĩa mwana.
9 “Ningĩ andũ nĩ makaamũneana mũnyarirũo+ na mamũũrage,+ na nĩ mũgaathũũrũo nĩ ndũrĩrĩ ciothe nĩ ũndũ wa rĩĩtwa rĩakwa.+
10 Na andũ aingĩ nĩ makaahĩngĩka na nĩ magaakunyananĩra na mathũũrane mũndũ na ũrĩa ũngĩ.
11 Nĩ gũgooka anabii aingĩ a maheeni na mahĩtithie andũ aingĩ;+
12 na tondũ wa uuni-watho kũingĩha-rĩ, wendo wa andũ aingĩ nĩ ũkaanyiha.
13 No ũrĩa ũgaakirĩrĩria* o nginya mũico nĩwe ũkaahonokio.+
14 Naguo ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe,+ na hĩndĩ ĩyo nĩrĩo mũico ũgaakinya.
15 “Nĩ ũndũ ũcio, rĩrĩa mũkoona kĩndũ kĩrĩa kĩrĩ thahu kĩrehaga mwanangĩko, kĩrĩa mũnabii Danieli arĩtie ũhoro wakĩo, kĩrũgamĩte harĩa hatheru+ (ũrĩa ũrathoma nĩ ahũthĩre ũtaũku),
16 hĩndĩ ĩyo arĩa magaakorũo Judea nĩ mambĩrĩrie kũũrĩra irĩma-inĩ.+
17 Mũndũ ũrĩa ũgaakorũo nyũmba igũrũ ndakanaikũrũke kuoya indo iria irĩ thĩinĩ wa nyũmba yake,
18 na mũndũ ũrĩa ũgaakorũo mũgũnda ndakanacoke kuoya nguo yake ya igũrũ.
19 Kaĩ atumia arĩa magaakorũo marĩ na nda na arĩa magaakorũo makĩongithia ciana matukũ macio nĩ magaakorũo na haaro-ĩ!
20 Hoyagai atĩ hĩndĩ yanyu ya kũũra ndĩkanakinye hĩndĩ ya heho kana mũthenya wa Thabatũ;
21 tondũ nĩ gũkaagĩa na thĩna mũnene+ ũtarĩ woneka kuuma kĩambĩrĩria gĩa thĩ nginyagia rĩu, na ndũkoneka rĩngĩ.+
22 Ma nĩ atĩ, matukũ macio matangĩnyihio, gũtirĩ mũndũ ũngĩkaahonoka; no nĩ ũndũ wa arĩa athuure matukũ macio nĩ makaanyihio.+
23 “Na rĩrĩ, mũndũ o na ũrĩkũ angĩkamwĩra atĩrĩ, ‘Kristo arĩ haha,’+ kana, ‘Arĩ haarĩa!’ mũtikanetĩkie.+
24 Nĩ gũkorũo nĩ gũgooka Kristo a maheeni na anabii+ a maheeni na maringe ciama nene na meke maũndũ ma magegania nĩguo mahĩtithie+ nginya arĩa athuure kũngĩhoteka.
25 Ririkanai atĩ nĩ ndamũmenyithia o mbere.
26 Nĩ ũndũ ũcio-rĩ, andũ mangĩkamwĩra atĩrĩ, ‘Arĩ werũ-inĩ,’ mũtikanathiĩ; kana mamwĩre, ‘Arĩ rumu cia thĩinĩ,’ mũtikanetĩkie.+
27 Tondũ o ta ũrĩa rũheni ruumaga mwena wa irathĩro na rũkoneka nginya mwena wa ithũĩro, noguo gũkorũo kuo* kwa Mũrũ wa mũndũ gũkaahaana.+
28 Harĩa kĩimba gĩgaakorũo, nĩho nderi ikaagomana.+
29 “Thutha wa thĩna wa matukũ macio, o rĩo riũa nĩ rĩkaagĩa nduma,+ naguo mweri ndũkaaruta ũtheri waguo, nacio njata nĩ ikaagwa kuuma igũrũ, namo mahinya ma igũrũ nĩ magaathingithio.+
30 Thutha ũcio kĩmenyithia kĩa Mũrũ wa mũndũ nĩ gĩkooneka igũrũ, nayo mĩhĩrĩga yothe ya thĩ nĩ ĩkeehũũra gĩthũri ĩrĩ na kĩeha,+ na nĩ ĩkoona Mũrũ wa mũndũ+ agĩũka arĩ thĩinĩ wa matu ma igũrũ arĩ na hinya na riri mũnene.+
31 Nake nĩ agaatũma araika ake na mũgambo mũnene wa karumbeta, nao nĩ magaacokanĩrĩria andũ ake arĩa athuure kuuma harĩ huho iria inya, kuuma gĩturi kĩmwe kĩa igũrũ nginya gĩturi kĩrĩa kĩngĩ.+
32 “Na rĩrĩ, mwĩrutei na ngerekano ĩno ya mũkũyũ: Rĩrĩa tũhonge twaguo tuororoa na twagĩa mathangũ, nĩ mũmenyaga atĩ hĩndĩ ya ũrugarĩ nĩ ĩkuhĩrĩirie.+
33 O ũndũ ũmwe na ũcio, rĩrĩa mũkoona maũndũ macio mothe, menyai atĩ arĩ hakuhĩ mĩrango-inĩ.+
34 Ngũmwĩra atĩrĩ na ma, rũciaro rũrũ rũtirĩ hĩndĩ rũgaathira nginya maũndũ macio mothe mekĩke.
35 Igũrũ na thĩ nĩ igaathira, no ciugo ciakwa gũtirĩ hĩndĩ igaathira.+
36 “Ũhoro wĩgiĩ mũthenya ũcio kana thaa, gũtirĩ mũndũ ũĩ,+ o na araika arĩa marĩ igũrũ kana Mũriũ, no Awa ũĩ.+
37 Nĩ gũkorũo o ta ũrĩa matukũ ma Nuhu maatariĩ,+ noguo gũkaahaana hĩndĩ ya gũkorũo kuo* kwa Mũrũ wa mũndũ.+
38 Nĩ ũndũ o ta ũrĩa matukũ ma mbere ya Mũiyũro maatariĩ, andũ maarĩaga na makanyua, makahikania na makahika, nginya mũthenya ũrĩa Nuhu aaingĩrire thabina,+
39 na matiatindanĩire nginya rĩrĩa Mũiyũro wokire na ũkĩmaniina othe,+ ũguo noguo gũkorũo kuo kwa Mũrũ wa mũndũ gũkaahaana.
40 Arũme erĩ nĩ magaakorũo mũgũnda; ũmwe wao oywo nake ũcio ũngĩ atigwo.
41 Atumia erĩ nĩ magaakorũo magĩthĩa; ũmwe wao oywo nake ũcio ũngĩ atigwo.+
42 Nĩ ũndũ ũcio, ikaragai mwĩhũgĩte, tondũ mũtiũĩ mũthenya ũrĩa Mwathani wanyu agooka.+
43 “No menyai ũndũ ũyũ: Korũo mwene nyũmba nĩ aamenyete ituanĩra* rĩrĩa mũici egũka,+ nĩ angĩaikarire eiguĩte na ndangĩetĩkĩririe nyũmba yake ĩbunjwo.+
44 Nĩ ũndũ ũcio o na inyuĩ ikaragai mwĩhaarĩirie,+ tondũ Mũrũ wa mũndũ agooka ithaa rĩrĩa mũtarecirĩria.
45 “Nũũ kũna ngombo ĩrĩa njĩhokeku na njũgĩ, ĩrĩa mwathi wayo aamũrire igũrũ rĩa andũ a nyũmba yake, nĩguo ĩmaheage irio ihinda rĩrĩa rĩagĩrĩire?+
46 Gũkena nĩ ngombo ĩyo mwathi wayo angĩgooka amĩkore ĩgĩka ũguo!+
47 Ngũmwĩra atĩrĩ o ma, nĩ akaamĩamũra ĩrũgamĩrĩre indo ciake ciothe.
48 “No ngombo ĩyo njũru ĩngĩkeĩra na ngoro atĩrĩ, ‘Mwathi wakwa nĩ aracererũo,’+
49 na yambĩrĩrie kũhũũra ngombo iria ingĩ ĩkĩrĩanagĩra na kũnyuanĩra na arĩĩu,
50 mwathi wa ngombo ĩyo agooka mũthenya ũrĩa ĩterĩgĩrĩire na ithaa rĩrĩa ĩtaramenya,+
51 na nĩ akaamĩherithia mũno na amĩtuĩre hamwe na hinga. Kũu nĩkuo ĩkaarĩragĩra na ĩkahagarania magego.+
Tũũhoro twa magũrũ-inĩ
^ Rora Ũthathaũri wa Ciugo.
^ Kana “mahinda.” Rora Ũthathaũri wa Ciugo.
^ Kana “ũgũkirĩrĩria.”
^ Rora Ũthathaũri wa Ciugo.
^ Rora Ũthathaũri wa Ciugo.
^ Kana “thaa cia ũtukũ.”
