Isaia 43:1-28
43 Na rĩrĩ, ũũ nĩguo Jehova ekuuga,O we Mũũmbi waku, wee Jakubu, Ũrĩa wakũũmbire, wee Isiraeli:+
“Ndũgetigĩre, nĩ gũkorũo nĩ ngũkũũrĩte.+
Nĩ ngwĩtĩte na rĩĩtwa rĩaku.
Wee ũrĩ wakwa.
2 Rĩrĩa ũkaagerera maĩ-inĩ, nĩ ngaakorũo hamwe nawe,+O na wagerera njũũĩ-inĩ, itigagũthereria.+
Na rĩrĩa ũkaagerera mwaki-inĩ, ndũgaacinwo nĩguo,O na kana ũrĩrĩmbũkĩrũo nĩ rũrĩrĩmbĩ rwaguo.
3 Nĩ gũkorũo niĩ nĩ niĩ Jehova Ngai waku,O we Ũrĩa Mũtheru wa Isiraeli, Mũhonokia waku.
Nĩ neanĩte Misiri ĩrĩ ũkũũri nĩ ũndũ waku,Nganeana Ethiopia na Seba ithenya rĩaku.
4 Tondũ nĩ watuĩkire kĩndũ kĩa goro maitho-inĩ makwa,+Nĩ ũtĩĩkĩte, na nĩ ngwendete.+
Nĩ ũndũ ũcio nĩ ngũneana andũ ithenya rĩakuNa neane ndũrĩrĩ ithenya rĩa muoyo waku.
5 Ndũgetigĩre, nĩ gũkorũo niĩ ndĩ hamwe nawe.+
Nĩ ngaarehe mbeũ yaku* kuuma irathĩroNa ngũcokanĩrĩrie hamwe kuuma ithũĩro.+
6 Nĩ ngeera mwena wa rũgongo atĩrĩ, ‘Marekererie!’+
Na njĩre mwena wa mũhuro ũũ, ‘Ndũkamagirĩrĩrie.
Rehe ariũ akwa kuuma kũndũ kũraya, na airĩtu akwa kuuma ituri cia thĩ,+
7 Arĩa othe metanĩtio na rĩĩtwa rĩakwa+O acio ndombire nĩgetha riri wakwa mwene wonekage,Arĩa ndombire na ngĩtũma makorũo kuo.’+
8 Rutai nja andũ arĩa atumumu o na gũtuĩka marĩ na maitho,Na arĩa mataiguaga o na gũtuĩka marĩ na matũ.+
9 Ndũrĩrĩ ciothe nĩ igomane handũ hamwe,Ikundi cia andũ nĩ icokanĩrĩre hamwe.+
Nũũ gatagatĩ-inĩ kao ũngĩheana ũhoro ũyũ?
Kana no mahote gũtwĩra ũhoro wa maũndũ marĩa ma mbere?*+
Nĩ marehe aira ao monanie atĩ nĩ a ma,Kana marekwo maigue na moige atĩrĩ, ‘Nĩ ũhoro wa ma!’”+
10 “Inyuĩ nĩ inyuĩ aira akwa,”+ ũguo nĩguo Jehova ekuuga,“Ĩni, ndungata yakwa ĩrĩa thuurĩte,+Nĩgetha mũũmenye na mũgĩe na wĩtĩkio harĩ niĩ*Na mũtaũkĩrũo atĩ niĩ no niĩ Ũrĩa ũmwe.+
Mbere yakwa gũtirĩ Ngai ũngĩ wombĩtwo,Na thutha wakwa gũtirĩ ũngĩ ũrĩ wakorũo kuo.+
11 Niĩ nĩ niĩ Jehova,+ na gũtirĩ mũhonokia ũngĩ tiga niĩ.”+
12 “Nĩ niĩ Ũrĩa waheanaga ũhoro na akahonokania na akamenyithania maũndũRĩrĩa gũtaarĩ ngai ng’eni gatagatĩ-inĩ kanyu.+
Nĩ ũndũ ũcio inyuĩ nĩ inyuĩ aira akwa,” ũguo nĩguo Jehova ekuuga, “na niĩ nĩ niĩ Ngai.+
13 Ningĩ, niĩ ndũũrĩte ndĩ o Ũrĩa ũmwe;+Na gũtirĩ mũndũ ũngĩgutha kĩndũ o na kĩmwe guoko-inĩ gwakwa.+
Rĩrĩa ndĩreka ũndũ-rĩ, nũũ ũngĩhota kũũgirĩrĩria?”+
14 Ũũ nĩguo Jehova Mũkũũri wanyu ekuuga,+ o we Ũrĩa Mũtheru wa Isiraeli:+
“Nĩ ngaatũmana Babuloni nĩ ũndũ wanyu nĩguo mĩgamba ya ihingo ĩtharũrio,+Na Akalidei, marĩ meri-inĩ ciao nĩ makaarĩra na mĩtangĩko.+
15 Niĩ nĩ niĩ Jehova, Ũrĩa Mũtheru wanyu,+ Mũũmbi wa Isiraeli,+ o we Mũthamaki wanyu.”+
16 Ũũ nĩguo Jehova oigĩte,O ũcio ũthondekaga njĩra ĩgatuĩkanĩria iria-inĩNa njĩra ĩgatuĩkanĩria nginya maĩ-inĩ marĩ na hinya mũingĩ,+
17 O we Ũrĩa ũgucagĩrĩria ngaari ya mbaara na mbarathi,+Na mbũtũ hamwe na njamba cia ita irĩ hinya:
“Magaakoma na matigokĩra.+
Nĩ makaaniinwo, mahorio o ta rũtambĩ rũrakana.”
18 “Mũtikaririkane maũndũ marĩa mahĩtũkĩte,Na mũtigecirie ũhoro wa maũndũ mahĩtũku.
19 Atĩrĩrĩ, nĩ ngwĩka ũndũ mwerũ;+Na o na rĩu nĩ wĩyumĩrĩtie.
Hihi nĩ kũwona mũtarawona?
Nĩ ngũthondeka njĩra ĩtuĩkanĩirie werũ-inĩ+Na njũũĩ ituĩkanĩirie werũ-inĩ.+
20 Nyamũ cia gĩthaka nĩ ikaahe gĩtĩo,Ngui cia gĩthaka o hamwe na nyaga,Nĩ gũkorũo nĩ ndũmaga kũgĩe maĩ werũ-inĩ,Na gũkagĩa njũũĩ werũ-inĩ,+Nĩguo andũ akwa, o acio athuure,+ manyuage,
21 Andũ arĩa ndeyũmbĩireNĩguo mahunjagie ũhoro wa rũgooco rwakwa.+
22 No ndũigana kũngaĩra, wee Jakubu,+Tondũ nĩ wanogirio nĩ niĩ, wee Isiraeli.+
23 Ndũigana kũndehera ng’ondu cia magongona maku magima ma njinoKana ũkĩngoocithia na magongona maku.
Ndirĩ ndagũtindĩkĩrĩria ũndehere kĩheo,O na kana ngĩkũnogia ngĩgwĩtia ũbani.+
24 Ndwangũrĩire karamathi* ĩrĩa ĩrĩ cama na mbeca ciaku,O na kana ũkĩndutĩra maguta ma kũigana ma magongona maku.+
Ithenya rĩa ũguo, nĩ ũũnogetie nĩ ũndũ wa mehia makuNa nĩ ũũnogetie nĩ ũndũ wa mahĩtia maku.+
25 Niĩ nĩ niĩ Ũrĩa ũrahuura mahĩtia maku*+ nĩ ũndũ wakwa mwene,+Na ndikaaririkana mehia maku.+
26 Ta ndirikania; ta reke tũciire tũrĩ hamwe;Heana ũhoro waku nĩguo wonanie ndũrĩ na mahĩtia.
27 Ithe wanyu wa mbere nĩ eehirie,Nao arĩa maragia ithenya rĩaku* nĩ manemeire.+
28 Nĩ ũndũ ũcio nĩ ngaaconorithia anene a handũ harĩa hatheru,Na nĩ ngaaneana Jakubu nĩguo anangwoNa neane Isiraeli nĩguo arumwo.+
Tũũhoro twa magũrũ-inĩ
^ Kana “rũciaro rwaku.”
^ Hihi ĩkĩonania maũndũ ma mbere gwĩkĩka mahinda mokĩte.
^ Kana “mũnjĩhoke.”
^ Nĩ mũthemba wa ithanjĩ rĩnungaga wega.
^ Kana “ciĩko ciaku cia ũremi.”
^ Hihi ĩkĩaria ũhoro wa arutani a Watho.
