Ingĩka Atĩa Nĩguo Nduĩke Mũira wa Jehova?

THAAKA

Thĩinĩ wa Mathayo 28:19, 20 Jesu nĩ aatarĩirie makinya marĩa mũndũ agĩrĩire kuoya nĩguo atuĩke Mũira wa Jehova. Mĩhari ĩyo yonanagia ũrĩa mũndũ abataraga gwĩka nĩguo atuĩke mũrutwo wa Kristo, marĩa nĩ hamwe na kwaria kana kũhunjia ũhoro wĩgiĩ Jehova.

Ikinya rĩa 1: Wĩrute ũrĩa Bibilia ĩrutanaga. Jesu eerire arũmĩrĩri ake ‘magatue andũ arutwo makĩmarutaga.’ (Mathayo 28:19, 20) Kiugo kĩrĩa gĩtaũrĩtwo “mũrutwo” kiugĩte “mũndũ ũrathomithio.” Bibilia, na makĩria morutani ma Jesu Kristo, nĩ ĩkoragwo na ũhoro ũrĩa ũrabatara nĩguo ũkorũo na gĩkeno na ũtũũro ũrĩ na muoroto. (2 Timotheo 3:16, 17) No tũgũteithie wĩrute ũrĩa Bibilia ĩrutanaga kũgerera mũbango witũ wa kũrutana Bibilia hatarĩ marĩhi.—Mathayo 10:7, 8; 1 Athesalonike 2:13.

Ikinya rĩa 2: Ĩka maũndũ marĩa weruta. Jesu aaugire atĩ arĩa merutaga no mũhaka ‘marũmie maũndũ marĩa mothe aathanire.’ (Mathayo 28:20) Ũguo nĩ kuuga atĩ kwĩruta Bibilia nĩ makĩria ma o kũmĩthoma tu, tondũ ũndũ ũcio nĩ ũrabatara wĩke ũgarũrũku wa kĩĩmĩtugo na kĩĩmeciria. (Atũmwo 10:42; Aefeso 4:22-29; Ahibirania 10:24, 25) Andũ arĩa mathĩkagĩra mawatho ma Jesu nĩ matindĩkagwo gũtua itua rĩa kũmũrũmĩrĩra na njĩra ya kwĩyamũrĩra Jehova Ngai.—Mathayo 16:24.

Ikinya rĩa 3: Kũbatithio. (Mathayo 28:19) Thĩinĩ wa Bibilia, kũbatithio kũringithanĩtio na mũndũ gũthikwo. (Ringithania Aroma 6:2-4.) Kuonanagia atĩ mũndũ nĩ atigana na ũtũũro ũrĩa aratũũraga hau kabere, na atĩ nĩ ambĩrĩria ũngĩ mwerũ. Kwoguo kũbatithio kuonanagia mbere ya andũ atĩ nĩ ũrĩkĩtie kuoya makinya ma mbere merĩ marĩa Jesu aagwetire, na atĩ nĩ ũrenda Ngai akũhe thamiri theru.—Ahibirania 9:14; 1 Petero 3:21.

Ingĩmenya atĩa atĩ nĩ njagĩrĩire kũbatithio?

Aria na athuri a kĩũngano. Nĩ mekwaria nawe nĩguo matigĩrĩre atĩ nĩ ũrataũkĩrũo kũbatithio kũhutĩtie maũndũ marĩkũ, kana nĩ ũrahũthĩra maũndũ marĩa wĩrutĩte, na kana nĩ wĩyamũrĩire Ngai na kwĩyendera.—Atũmwo 20:28; 1 Petero 5:1-3.

Hihi makinya maya nĩ mahutĩtie ciana cia Aira a Jehova?

Ĩĩ. Tũreraga ciana citũ kũringana na ũrĩa Bibilia ĩtwĩraga atĩ ‘tũcirũngage na tũcitaarage na njĩra cia Jehova.’ (Aefeso 6:4) O na kũrĩ ũguo, o ũrĩa irakũra nĩ ciagĩrĩirũo gwĩtuĩra itua rĩa kwĩruta, gwĩtĩkĩra, na kũhũthĩra maũndũ marĩa Bibilia ĩrutanaga mbere ya ciagĩrĩre kũbatithio. (Aroma 12:2) Hatarĩ nganja o mũndũ nĩwe wagĩrĩirũo gwĩtuĩra itua rĩake rĩgiĩ gũtungatĩra Ngai.—Aroma 14:12; Agalatia 6:5.