Ejipiti Lɩʋ 32:1-35
32 Alɩwaatʋ ndʋ tɩ-taa lɛ, samaɣ na se Moyizi eetiki lɔŋ nɛ pʋʋ yɔɔ.+ Nɛ samaɣ wolo nɛ kekpeɣli Aarɔɔnɩ cɔlɔ nɛ keheyi-i se: «Kʋyɩ, labɩ-ɖʋ ɛsɔ nɔɔyʋ, weyi ɛkaɣ ɖɛʋ ɖɔ-nɔɔ yɔ,+ mbʋ pʋyɔɔ yɔ ɖɩɩsɩŋ mbʋ pɩtalɩ Moyizi ɛnʋ yɔ, abalʋ weyi ɛlɩzɩ-ɖʋ Ejipiti ɛjaɖɛ taa yɔ.»
2 Peeɖe Aarɔɔnɩ heyi-wɛ se: «Ɩlɩzɩ sika naŋgbacaɣlanaa+ mɩ-halaa, mɩ-pɩyalaa, nɛ mɩ-pɛlaa nɩŋgbaaŋ yɔɔ nɛ ɩkɔnɩ-m wɛ.»
3 Nɛ samaɣ kpeekpe paɣzɩ lɩzʋʋ sika naŋgbacaɣlanaa mba paawɛ pa-nɩŋgbaaŋ yɔɔ yɔ nɛ pɔkɔŋnɩ-wɛ Aarɔɔnɩ.
4 Nɛ ɛmʋ sika pɔ-cɔlɔ nɛ ɛkpaɣ wonuu ŋgʋ pasakɩnɩ wondu yɔ nɛ ɛñɔɔzɩnɩ-kɛ nɛ ɛpɩsɩ-kɛ neɣye sɩʋ kpeliɣa.*+ Nɛ papaɣzɩ yɔɔdʋʋ se: «Ñɛ-Ɛsɔ yɔ, Oo Izrayɛɛlɩ, weyi ɛlɩzɩ-ŋ Ejipiti ɛjaɖɛ taa yɔ.»+
5 Aarɔɔnɩ na mbʋ lɛ, ɛma altaaru sɩʋ kpeliɣa ŋga kɛ-ɛsɩndaa. Nɛ Aarɔɔnɩ ma kubuka sɔsɔɔ se: «Cee kɛ Yehowa kazandʋ.»
6 Pʋyɔɔ tɛʋ fema lɛ, pakʋyɩ tanaŋ tɛɛ cu nɛ papaɣzɩ laʋ miŋ kɩñaɣzɩŋ kɩlaŋ nɛ laŋhɛzɩyɛ kɩlaŋ. Pʋwayɩ lɛ, samaɣ caɣ nɛ kɔtɔɔ nɛ kɔñɔɔ. Nɛ kakʋyɩ se kɛmɛyɩ amɛya.+
7 Nɛ Yehowa heyi Moyizi se: «Wolo, tii, mbʋ pʋyɔɔ yɔ ña-samaɣ, ŋga ŋlɩzɩ-kɛ Ejipiti ɛjaɖɛ taa yɔ, kalabɩ mbʋ pɩfɛyɩ ɖeu yɔ.+
8 Palɩ nʋmɔʋ ŋgʋ mawɩlɩ-wɛ se pɔɖɔ kɩ-taa yɔ lɛɛ lɛɛ.+ Palabɩ pa-tɩ neɣye sɩʋ kpeliɣa,* nɛ pɛwɛɛ nɛ poluŋuu kɛ-tɛɛ nɛ palaɣ-kɛ kɩlaŋ nɛ pɔtɔŋ se: “Ñɛ-Ɛsɔ yɔ, Oo Izrayɛɛlɩ, weyi ɛlɩzɩ-ŋ Ejipiti ɛjaɖɛ taa yɔ.”»
9 Yehowa wolo pɩ-yɔɔ nɛ eheyi Moyizi se: «Manawa se samaɣ kanɛ ka-ñʋʋ taa wɛ ɖoŋ.*+
10 Pʋyɔɔ lɛ, lɛɛlɛɛyɔ yebi-m, nɛ mankaɣ-wɛ ɖɩzʋʋ man-pana sɔsɔna taa, nɛ manpɩsɩ-ŋ ɛjaɖɛ sɔsɔɖɛ po-lone taa.»+
11 Nɛ Moyizi tendi ɛ-Ɛsɔ Yehowa*+ nɛ ɛtɔ se: «Oo Yehowa, ɛbɛ yɔɔ pɩwɛɛ se ŋkɔ pana siŋŋ nɛ ña-samaɣ alɩwaatʋ ndʋ ŋtɛm-kɛ lɩzʋʋ Ejipiti ɛjaɖɛ taa nɛ ño-ɖoŋ sɔsɔŋ nɛ ñe-nesi ɖoŋ ñɩnzɩ yɔ?+
12 Taayele nɛ Ejipiti mba tɔ se: “Ɛɛwɛnɩ lɩmaɣza kɩdɛkɛda alɩwaatʋ ndʋ ɛlɩzɩ-wɛ yɔ. Ɛɛsɔɔlaa se ɛkʋ-wɛ pʋŋ taa nɛ ɛhɩzɩ-wɛ tɛtʋ yɔɔ.”+ Ña-pana sɔsɔna ɛhɛɛ nɛ ŋlɛɣzɩ* lɩmaɣza wena ŋkpaɣaa se ŋkɔŋnɩ asɛyʋʋ kʋnɛ ña-samaɣ yɔɔ yɔ.
13 Tɔzɩ ña-lɩmɖʋyaa Abraham, Izaakɩ, nɛ Izrayɛɛlɩ pɔ-yɔɔ, mba ŋŋɖuuni ña-maɣmaɣ ña-tɩ nɛ ŋtɔ se: “Mankaɣ yebu nɛ mɩ-lʋlʋʋ taa mba* huu ɛzɩ ɛsɔdaa tɩɩnzɩ yɔ,+ nɛ mankaɣ cɛlʋʋ mɩ-lʋlʋʋ taa mba* ɛjaɖɛ ɖɩnɛ ɖɩ-tɩŋa, nɖɩ manɖʋwa se mɛncɛlɩɣ-wɛ yɔ, se pɩsa nɛ pamʋ-ɖɩ nɛ ɖɩpɩsɩ pa-pʋyʋ tam.”»+
14 Nɛ Yehowa paɣzɩ lɛɣzʋʋ* lɩmaɣza wena ɛɛkpaɣaa se ɛkɔŋnɩ asɛyʋʋ ɛ-samaɣ yɔɔ yɔ.+
15 Nɛ Moyizi kʋyɩnɩ pʋʋ yɔɔ nɛ etii, ɛɖɔkɩ e-nesi tɛɛ+ Aseɣɖe Lɩzʋʋ pɩtaahalanzɩ 2.+ Pama tɔm pɩtaahalanzɩ nzɩ sɩ-yɔɔ ceemenje. Pama tɔm sɩ-taa nɛ sɩ-wayɩ.
16 Ɛsɔ saɣnɩ pɩtaahalanzɩ nzɩ, nɛ Ɛsɔ kaamanɩ tɔm ndʋ tɩwɛ sɩ-yɔɔ yɔ.+
17 Alɩwaatʋ ndʋ Yozuwee paɣzɩ nɩʋ samaɣ kɔkɔɖɛ, mbʋ pʋyɔɔ yɔ kaawɛɛ nɛ kamakɩ kubusi lɛ, eheyi Moyizi se: «You kubusi wɛ ɖigbeɣliye* taa.»
18 Ɛlɛ Moyizi yɔɔdɩ se:
«Pɩtɩkɛ wabɩtʋ* hendu taŋ,Nɛ pɩtɩkɛ mba pawabɩ-wɛ yɔ po-kubusi taŋ;Hendu lɛɛtʋ taŋ manɩɣ.»
19 Moyizi tɩɩñɔtɩnɩ ɖigbeɣliye* nɛ ɛna neɣye+ nɛ payɛ lɛ, ɛ-pana paɣzɩ miŋ mʋʋ, nɛ ɛpɛɖɩ pɩtaahalanzɩ nzɩ ɛɛɖɔkɩ e-nesi taa yɔ pʋʋ liu tɛɛ nɛ ɛyɔkɩ-sɩ.+
20 Ɛkpaɣ neɣye nɖɩ paaluba yɔ nɛ ɛñaɣzɩ-ɖɩ miŋ nɛ ɛnaŋ-ɖɩ nɛ ɖɩkpɩzɩ;+ pʋwayɩ lɛ ɛmɩzɩ-ɖɩ lɩm taa nɛ ɛla nɛ Izrayɛɛlɩ mba ñɔɔ-pʋ.+
21 Nɛ Moyizi pɔzɩ Aarɔɔnɩ se: «Ɛbɛ samaɣ kanɛ kalabɩ-ŋ nɛ ŋkɔnɩ kɔ-yɔɔ kɩwɛɛkɩm sɔsɔm pʋnɛ?»
22 Aarɔɔnɩ cosi se: «Pɩtaawɩzɩ-ŋ, man-kɩbaɣlʋ. Ŋsɩm camɩyɛ se samaɣ kanɛ kɔsɔɔlɩ kɩdɛkɛdɩm labʋ.+
23 Pʋyɔɔ keheyi-m se: “Labɩ-ɖʋ ɛsɔ nɔɔyʋ, weyi ɛkaɣ ɖɛʋ ɖɔ-nɔɔ yɔ, mbʋ pʋyɔɔ yɔ ɖɩɩsɩŋ mbʋ pɩtalɩ Moyizi ɛnʋ yɔ, abalʋ weyi ɛlɩzɩ-ɖʋ Ejipiti ɛjaɖɛ taa yɔ.”+
24 Peeɖe meheyi-wɛ se: “Weyi ɛwɛnɩ sika yɔ, pɩwɛɛ se ɛlɩzɩ-kɛ nɛ ɛkɔnɩ-m.” Nɛ mɛnpɛɖɩ-kɛ miŋ taa nɛ pɩla neɣye ɖɩnɛ.»
25 Moyizi na se samaɣ lakɩ lakasɩ nzɩ yɔ, pɩɩsaŋ se pakpa-kɛ, mbʋ pʋyɔɔ yɔ Aarɔɔnɩ kaayeba nɛ pɩwɛɛ-kɛ kaɖɛ se kakpa ka-tɩ, piyeba nɛ kaɖʋ ka-tɩ fɛyɛ ko-koyindinaa ɛsɩndaa.
26 Peeɖe Moyizi sɩŋ ɖigbeɣliye* nɔnɔɔ taa nɛ ɛtɔ se: «Awɛ Yehowa hɔɔlʋʋ yɔɔ? Ɛkɔɔ mɔn-cɔlɔ!»+ Nɛ Leevi mba tɩŋa kpeɣli Moyizi cɔlɔ.
27 Nɛ eheyi-wɛ se: «Tɔm tʋnɛ Izrayɛɛlɩ tɛ Ɛsɔ Yehowa yɔɔdaa: “Pɩwɛɛ se mɩ-taa paa weyi lɛ ɛkpaɣ ɛ-laɣɖɛ nɛ ɛcɔɔ ɖigbeɣliye* kpeekpe taa, kpaɣ nɔnɔɔ nɛ ŋwolo nɔnɔɔ nɛ ɛkʋ e-koobu, ɛ-cɔlɔ tʋ, nɛ ɛ-taabalʋ kɩbanʋ.”»+
28 Leevi mba la ɛzɩ Moyizi yɔɔdʋʋ yɔ. Piyeba nɛ pakʋ abalaa ɛzɩ 3 000 mbʋ yɔ kɩyakʋ ŋgʋ ki-wiye.
29 Pʋwayɩ lɛ Moyizi yɔɔdɩ se: «Ɩlɩzɩ mɩ-tɩ nɛ hɔɔlʋʋ* sɔnɔ nɛ ɩla Yehowa tʋmɩyɛ, mbʋ pʋyɔɔ yɔ mɩ-taa paa weyi lɛ ɛkʋyɩ ɛ-maɣmaɣ ɛ-pɩyalʋ yɔɔ nɛ ɛ-maɣmaɣ e-koobu yɔɔ;+ sɔnɔ ɛkaɣ-mɩ haʋ wazaɣ nakɛyɛ.»+
30 Tɛʋ fem kpaagbaa lɛ, Moyizi heyi samaɣ se: «Ɩlabɩ kɩwɛɛkɩm sɔsɔm kpem; nɛ lɛɛlɛɛyɔ lɛ mankpaɣ Yehowa cɔlɔ nɛ mana se manpɩzɩɣ nɛ mala nabʋyʋ nɛ ekpeɣ-mɩ mɩ-kɩwɛɛkɩm mbʋ.»+
31 Peeɖe Moyizi pɩsɩ Yehowa cɔlɔ nɛ eheyi-i se: «Kɩwɛɛkɩm sɔsɔm kpem samaɣ kanɛ kalaba! Kakpaɣ sika nɛ kolu ka-tɩ ɛsɔ!+
32 Ɛlɛ lɛɛlɛɛyɔ ye ŋsɔɔlaa yɔ, kpeɣ pa-kɩwɛɛkɩm;+ pɩtɩkɛ mbʋ yɔ, mentendi-ŋ hɩzɩ-m ña-takayaɣ ŋga ŋmawa yɔ ka-taa.»+
33 Ɛlɛ Yehowa kitini Moyizi se: «Weyi ɛyʋsɩnɩ-m yɔ, ɛnʋ mankaɣ hɩzʋʋ man-takayaɣ taa.
34 Lɛɛlɛɛyɔ lɛ, wolo nɛ ŋɖiyi samaɣ nɛ ŋwoni-kɛ lone nɖɩ ɖɩ-tɔm meheyi-ŋ yɔ ɖɩ-taa. Na! Men-tiyiyu kaɣ ɖɛʋ ñɔ-nɔɔ,+ nɛ kɩyakʋ ŋgʋ mɔnpɔzʋʋ akɔnta yɔ, puwiye mankaɣ pɔ-yɔɔ kɔnʋʋ nɩŋgbaŋʋʋ hɔm pa-kɩwɛɛkɩm yɔɔ.»
35 Nɛ Yehowa paɣzɩ kɔnʋʋ asɛyʋʋ samaɣ yɔɔ mbʋ pʋyɔɔ yɔ kaalabɩ neɣye, nɖɩ Aarɔɔnɩ kaalaba yɔ.
Pɩ-tɛɛ tɔm
^ Yaa «sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «sɩʋ kpeliɣa ŋga poyolisi ñɩɣtʋ nɛ polubina yɔ.»
^ Piye piye, «ke-liu wɛ canjanaa.»
^ Yaa «Moyizi hɛzɩ ɛ-Ɛsɔ Yehowa laŋɩyɛ.»
^ Yaa «ŋkpiɖi.»
^ Piye piye, «ño-ɖomaɣ.»
^ Piye piye, «ño-ɖomaɣ.»
^ Yaa «kpiɖuu.»
^ Yaa «maalika.»
^ Yaa «ɖoŋ lakasɩ.»
^ Yaa «maalika.»
^ Yaa «maalika.»
^ Yaa «maalika.»
^ Yaa «Ɩɖʋ mi-nesi tɛɛ ɖoŋ nɛ pisu.»
