Nèk ana sing nulungi wong liya, kuwi biasané disebut kaya ”Wong Samaria sing Apikan”. Istilah ”Wong Samaria sing Apikan” kuwi saka critané Yésus. Yésus péngin ngajari nèk wong apikan kuwi ora pilih-pilih wektu nulungi wong liya.

Ing artikel iki bakal dibahas:

•  Piyé critané ”Wong Samaria sing Apikan”?

•  Kenapa Yésus nyritakké perumpamaan iki?

•  Apa pelajarané?

•  Wong Samaria kuwi sapa?

•  Crita soal wong Samaria kuwi ana tenan apa ora?

Critané ngéné: Ana wong Yahudi saka Yérusalèm sing arep lunga ing Yérikho. Ing perjalanan, dhèwèké dirampok lan digebugi nganti mèh mati.

Ana imam sing léwat, terus bar kuwi ana wong Lèwi sing liwat. Tapi wong loro kuwi ora gelem nulungi, padahal padha-padha wong Yahudi.

Bar kuwi, ana wong Samaria sing liwat. (Lukas 10:33; 17:16-18) Wong Samaria kuwi mesakké karo wong Yahudi mau. Terus, wong Samaria kuwi gelem ngobati lan nggawa ing penginepan. Sésuké, wong Samaria kuwi mènèhi dhuwit karo sing nduwé penginepan bèn ngrawat wong Yahudi mau. Terus nèk dhuwité kurang, wong Samaria mau gelem nambahi.​—Lukas 10:30-35.

Dadi pas kaé, ana sing nganggep nèk mung kudu sayang karo sing suku lan agamané padha. Dadi, Yésus nyritakké perumpamaan iki bèn wong kuwi sayang karo kabèh wong, ora mung sing padha-padha Yahudi. (Lukas 10:36, 37) Perumpamaan iki dicritakké ing Alkitab bèn kabèh wong ngerti carané nyenengké Gusti Allah.—2 Timotius 3:16, 17.

Wong sing apikan kuwi seneng nulungi kabèh wong, ora soal suku lan bangsané. Dadi, nèk péngin disayang kudu sayang karo wong liya.​—Matius 7:12.

Wong Samaria kuwi keturunan campuran wong Yahudi lan dudu Yahudi. Wong-wong kuwi manggoné ana ing loré Yudéa.

Pas Yésus ana ing bumi, wong Samaria wis nduwé agama dhéwé. Wong Samaria gelem maca Kitab Taurat, tapi wegah maca Kitab-Kitab Ibrani liyané.

Akèh wong Yahudi pas jamané Yésus ora gelem bergaul karo wong Samaria. (Yohanes 4:9) Ana sing nganggo istilah ”wong Samaria” kanggo ngécé.​—Yohanes 8:48.

Ing Alkitab mémang ora disebutké crita iki tenanan apa ora. Tapi nèk mènèhi perumpamaan, biasané Yésus mènèhi keterangan sing isa dingertèni wong akèh, bèn sing ngrungokké isa paham.

Akèh keterangan sing disebutké ing perumpamaan kuwi ana tenan. Misalé:

• Dalan saka Yérusalèm ing Yérikho kuwi adohé luwih saka 20 kilomèter. Tapi, posisiné Yérusalèm luwih dhuwur sak kilomèter timbang Yérikho. Makané, ing perumpamaané Yésus disebutké nèk wong Yahudi ”mudhun saka Yérusalèm menyang Yérikho”.​—Lukas 10:30.

• Imam lan wong Lèwi sing manggon ing Yérikho biasané lunga menyang Yérusalèm liwat dalan iki.

• Iki dalan sing berbahaya, biasané sepi lan akèh rampok.