Saan nga espesipiko nga ilawlawag ti Biblia ti maipapan iti euthanasia. a Ngem mangted iti balanse a panangmatmat maipapan iti biag ken ipapatay. Saan nga umiso ti panangpapatay, ngem saan met nga iparegta ti Biblia a kasapulan nga aramidentayo ti uray ania tapno mapaatiddog ti biag ti dandanin matay a tao.

 Tukoyen ti Biblia ti Dios kas Namarsua—“ti ubbog ti biag.” (Salmo 36:9; Aramid 17:28) Nakapatpateg ti biag iti Dios. Gapuna, kondenaren ti Dios ti panangpapatay ken panagpakamatay. (Exodo 20:13; 1 Juan 3:15) Ipakita met ti Biblia a masapul nga adda nainkalintegan nga aramidentayo tapno maprotektaran ti biagtayo ken ti biag ti sabsabali. (Deuteronomio 22:8) Nalawag a kayat ti Dios nga ipategtayo ti regalo a biag.

Kasano no dandanin matay ti maysa a tao?

 Saan nga anamongan ti Biblia ti panagpakamatay uray no dandanin matay ti maysa a tao wenno saanen a maliklikan ti ipapatayna. Suportaran dayta ti napasamak ken Ari Saul ti Israel. Idi nasugatan iti nakaro iti gubat, indawatna iti agaw-awit iti armasna a tulonganna a matay. (1 Samuel 31:3, 4) Saan a kinayat dayta ti agaw-awit iti armas ni Saul. Ngem idi agangay, nagulbod ti maysa a lalaki ket imbagana nga inaramidna ti kiddaw ni Saul. Imbilang ni David dayta a lalaki kas mammapatay. Impakita ni David ti kapanunotan ti Dios iti dayta a banag.—2 Samuel 1:6-16.

Masapul kadi nga aramidentayo ti amin tapno laeng mapaatiddog ti biag?

 No nalawag nga awanen ti namnama a malasatan ti maysa ti ipapatay, saan nga iparegta ti Biblia a kasapulan a paatiddogen pay ti biagna. Mangipaay ketdi ti Biblia iti balanse a panangmatmat. Nabileg a kabusortayo ti ipapatay, a resulta ti panagbalintayo a managbasol. (Roma 5:12; 1 Corinto 15:26) Saantayo a kayat ti matay, ngem saantayo met a pagbutngan dayta ta ikarkari ti Dios a pagungarenna dagiti natay. (Juan 6:39, 40) Ti tao a mangipatpateg iti biag kayatna ti kasayaatan a pamay-an ti pannakaagas. Ngem saan a masapul a pilienna ti pannakaagas a mangpaatiddog laeng iti biag ti dandanin matay a tao.

Ti kadi panagpakamatay ket saan a mapakawan a basol?

 Saan. Saan nga inraman ti Biblia ti panagpakamatay kadagiti saan a mapakawan a basol. Uray no nadagsen a basol ti panagpakamatay, b naan-anay a maawatan ti Dios dagiti mabalin a makagapu iti dayta kas iti sakit iti isip, nakaro nga stress, wenno uray ti natawid a kababalin. (Salmo 103:13, 14) Mangipapaay ti Dios iti liwliwa kadagiti maladladingitan babaen ti Biblia. Ibagbaga pay ti Biblia nga “addanto panagungar agpadpada dagiti nalinteg ken dagiti nakillo.” (Aramid 24:15) Ipakita daytoy nga adda namnama nga agungar dagiti tattao a nakaaramid iti nadagsen a basol, kas iti panagpakamatay.