Wen, gapu ta ti kasayaatan a tulong ket aggapu iti “Dios, a mangliwliwa ken mangparegta ken mangbang-ar ken mangparagsak kadagiti malmaldaang.”​—2 Corinto 7:6, The Amplified Bible.

•   Bileg. ‘Bang-aran ken paragsakennaka’ ti Dios saan a babaen ti panangikkatna kadagiti amin a problemam, no di ket babaen ti panangsungbatna kadagiti kararagmo no dumawatka iti bileg. (Filipos 4:13) Sigurado nga ipangagnaka ti Dios ta kastoy ti kuna ti Biblia: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” (Salmo 34:18) Kinapudnona, mangngeg ti Dios ti panagpatulongmo uray no saanmo a mayebkas ti kaririknam.​—Roma 8:26, 27.

•   Nasayaat nga ulidan. Kastoy ti inkararag ti maysa a mannurat iti Biblia: “Manipud kaunggan ti panagtuokko, umawagak kenka.” Linabanan ti salmista ti pannakariknana iti leddaang, wenno depresion, babaen ti pananglaglagipna a ti Dios saanna a tutuoken ti konsiensiatayo. Imbes ketdi, kinunana iti Dios: “No tutopam dagiti basbasolmi, siasino ti makalisi iti pannusam? Ngem pakawanennakami, tapno agbutengkami ken agdayawkam kenka.”​—Salmo 130:1, 3, 4, Ti Baro a Naimbag a Damag Biblia.

•   Namnama. Malaksid ti panangipaayna iti liwliwa itan, inkari pay ti Dios nga ikkatennanto amin a problema a pakaigapuan ti depresion. Inton tungpalenna dayta a kari, “dagiti immun-una a banag [a pakairamanan ti depresion] saandanto a maipalagip, saandanto met a tumpuar iti puso.”​—Isaias 65:17.

 Palagip: Nupay bigbigbigenmi ti tulong nga ipaay ti Dios, dakami a Saksi ni Jehova ket agpapaagas met no addaankami kadagiti sakit a kas iti clinical depression. (Marcos 2:17) Nupay kasta, saankami a mangyen-endorso iti partikular a kita ti panangagas ta dagiti tattao a mismo ti mangaramid iti bukodda a desision.