Ti basol a di mapakawan ket tumukoy kadagiti aramid a nabuyogan iti kababalin, a pakaigapuan a saanen a manamnama ti nagbasol ti pammakawan ti Dios. Kasano a tumanor ti kasta a kababalin?

 Pakawanen ti Dios dagidiay agbabbabawi kadagiti basolda, agbiag maitunos kadagiti pagalagadanna, ken mangipakita iti pammatida ken Jesu-Kristo. (Aramid 3:​19, 20) Nupay kasta, mabalin nga ikeddengen ti maysa a tao nga itultuloyna ti managbasol a kabibiagna a dinan pulos balbaliwan ti kababalin wenno konduktana. Deskribiren ti Biblia ti kasta a tao kas addaan iti “nadangkes a puso” a ‘napatangken babaen ti makaallilaw a pannakabalin ti basol.’ (Hebreo 3:12, 13) Kas iti pila a nailuto iti pugon a saanen a mabalin a sukogen, ti puso dayta a tao ket permanenten a bumusor iti Dios. (Isaias 45:9) Awanen a pulos ti pakaibatayan a mapakawan pay ti kasta a tao. Gapuna, isu ket nakaaramid iti di mapakawan a basol.​—Hebreo 10:26, 27.

 Sumagmamano kadagiti Judio a lider ti relihion idi kaaldawan ni Jesus ti nakaaramid iti di mapakawan a basol. Ammoda a ti nasantuan nga espiritu ti Dios ti adda iti likudan dagiti milagro ni Jesus, ngem inakusaranda a naggapu ti pannakabalinna ken Satanas a Diablo.—Marcos 3:​22, 28-​30.

Dagiti basol a mapakawan

•  Panagtabbaaw gapu iti kinaignorante wenno kinaawan pannakaammo. Ni apostol Pablo ket maysa idi a managtabbaaw, ngem kinunana idi agangay: “Naipakitaanak ti asi, agsipud ta ignoranteak idi ken nagtignayak a buyogen ti kaawan ti pammati.”—1 Timoteo 1:13.

•  Pannakikamalala. Adda dagiti nadakamat iti Biblia a nakikamalala ngem binalbaliwanda ti konduktada ket pinakawan ida ti Dios.​—1 Corinto 6:​9-​11.

“Nakaaramidak kadi iti di mapakawan a basol?”

 No pudpudno a kaguram ti naaramidam idi a basol ken talaga a kayatmo ti agbalbaliw, saanka a nakaaramid iti di mapakawan a basol. Mabalin a pakawanen ti Dios uray dagiti maulit-ulit a pannakaaramid iti isu met laeng a basol no la ket ta ti pusom ket saan a permanente a timmangken maibusor kenkuana.—Isaias 1:18.

 Ti panagrikna ti dadduma a tattao ket nakaaramidda iti di mapakawan a basol gapu ta sidsidiren ida ti konsiensiada. Ngem isursuro ti Biblia a saantay a kanayon a makapagtalek iti riknatayo. (Jeremias 17:9) Saannatayo nga inikkan ti Dios iti autoridad a mangukom iti asinoman—uray iti bagitayo. (Roma 14:​4, 12) Mabalin a pakawanennatayo uray no konkondenarennatayo pay laeng ti pusotayo.—1 Juan 3:​19, 20.

Nakaaramid kadi ni Judas Iscariote iti di mapakawan a basol?

 Wen. Ti kinaagumna ti nangtignay kenkuana a nangtakaw iti kuarta a naidonar para iti sagrado a panggep. Nagpammarang pay a maseknan kadagiti napanglaw ngem ti talaga a naginteresanna ket tapno ad-adu a kuarta ti matakawna. (Juan 12:​4-8) Idi talaga nga agduyosen ti puso ni Judas nga agaramid iti dakes, liniputanna ni Jesus babaen iti 30 a kapisi a pirak. Ammo idi ni Jesus a pulos a saan a pudpudno nga agbabawi ni Judas iti inaramidna, isu nga inawaganna iti “anak ti pannakadadael.” (Juan 17:12) Kayatna a sawen nga idi natay ni Judas, isu ket madadael iti agnanayon, nga awan namnamana nga agungar.—Marcos 14:21.

 Saan nga impakita ni Judas ti pudpudno a panagbabawi iti inaramidna a basol. Saan a ti Dios ti nangipudnuanna iti basolna no di ket kadagiti lider ti relihion a nakikumplotanna.—Mateo 27:​3-5; 2 Corinto 7:​10.