Natay ni Jesus tapno mapakawan dagiti tattao ken mabalinda ti agbiag nga agnanayon. (Roma 6:​23; Efeso 1:7) Napaneknekan met iti ipapatay ni Jesus a kabaelan ti tao ti agmatalek iti Dios uray no maipasango kadagiti karirigatan a pannubok.​—Hebreo 4:​15.

 Kitaentayo no kasano a nakaad-adu ti naaramidan ti ipapatay ti maysa a tao.

1.   Natay ni Jesus tapno ‘mapakawan dagiti basoltayo.’​—Colosas 1:​14.

    Naparsua a perpekto wenno awanan basol ti immuna a tao a ni Adan. Ngem pinilina ti agsukir iti Dios. Gapu iti panagsukir wenno panagbasol ni Adan, nagdakkel ti epekto dayta iti amin nga annakna. Kuna ti Biblia: “Babaen ti kinasukir ti maysa a tao adu ti naibilang a managbasol.”​—Roma 5:​19.

    Perpekto met ni Jesus, ngem saan a pulos nagbasol. Maikari ngarud ni Jesus a “pangikappia a sakripisio maipaay kadagiti basoltayo.” (1 Juan 2:2) No kasano a narugitan ti pamilia ti tao gapu iti panagsukir ni Adan, dinalusan met ti ipapatay ni Jesus ti basol dagidiay mangitrabtrabaho iti pammatida kenkuana.

    Makuna nga inlako ti Adan ti tao iti basol. Situtulok met a ginatang ni Jesus ti tao babaen ti ipapatayna para kadatayo. Kas resultana, “no ti asinoman makaaramid iti basol, addaantayo iti katulongan iti Ama, ni Jesu-Kristo, daydiay nalinteg.”​—1 Juan 2:1.

2.   Natay ni Jesus tapno “tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:​16.

    Nupay naparsua ni Adan nga agbiag nga agnanayon, nasentensiaan iti ipapatay gapu iti basolna. Gapu ken Adan, “simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”​—Roma 5:​12.

    Ngem saan la a ti basol ti ikkaten ti ipapatay ni Jesus, ikkatenna pay ti sentensia nga ipapatay kadagiti amin a mangitrabaho iti pammatida kenkuana. Kastoy ti kuna ti Biblia: “No kasano a ti basol nagturay kas ari agraman iti ipapatay, kasta met a ti di kaikarian a kinamanangngaasi agturay koma kas ari babaen ti kinalinteg a maipaay iti agnanayon a biag baeten ken Jesu-Kristo nga Apotayo.”​—Roma 5:​21.

    Siempre, adda pagpatinggaan ti biag ti tao ita. Ngem ikarkari ti Dios nga ikkannanto dagiti nalinteg a tattao iti agnanayon a biag ken pagungarennanto dagiti natay tapno mabenepisiaranda met iti panagsakripisio ni Jesus babaen ti ipapatay.​—Salmo 37:29; 1 Corinto 15:22.

3.   “Nagtulnog [ni Jesus] agingga iti ipapatay.” Pinaneknekanna ngarud a kabaelan ti tao ti agmatalek iti Dios uray maipasango iti aniaman a pakasuotan wenno pannubok.​—Filipos 2:8.

    Perpekto ti panunot ken bagi ni Adan, ngem nagsukir iti Dios gapu ta kayatna a maadda kenkuana ti banag a saan a para kenkuana. (Genesis 2:​16, 17; 3:6) Idi agangay, imbaga ni Satanas, ti kangrunaan a kabusor ti Dios, nga awan ti tao a pudpudno nga agtulnog iti Dios, nangruna no agpegpeggaden ti biagna. (Job 2:4) Ngem nagtulnog iti Dios ti perpekto a tao a ni Jesus ken nagtalinaed a matalek kenkuana, uray no nakababain ken nakasasaem ti ipapatayna. (Hebreo 7:​26) Dayta ti naan-anay a nangsungbat iti isyu: Kabaelan ti tao ti agmatalek iti Dios uray maipasango iti aniaman a pannubok wenno pakasuotan.

Salsaludsod maipapan iti ipapatay ni Jesus

•   Apay a kasapulan nga agrigat ken matay ni Jesus para iti tao? Apay a di latta koman inikkat ti Dios ti ipapatay?

   Kuna ti linteg ti Dios a “dagiti isupapak ti basol isu ti ipapatay.” (Roma 6:​23) Imbes a saan nga ibaga ti Dios ken Adan daytoy a linteg, imbagana nga ipapatay ti dusa ti panagsukir. (Genesis 3:3) Idi nagbasol ni Adan, tinungpal ti Dios ti saona ta “saanna a mabalin ti agulbod.” (Tito 1:2) Saan la a ti basol ti impatawid ni Adan kadagiti annakna no di ket uray ti dusa ti basol—ipapatay.

   Nupay maikari a matay dagiti tattao, pinaraburan ida ti Dios iti “kinabaknang ti di kaikarian a kinamanangngaasina.” (Efeso 1:7) Ti paraburna a mangsubbot iti sangatauan, babaen ti panangibaonna ken Jesus kas perpekto a sakripisio, ket talaga a nakadakdakkel a panangipakita iti kinahustisia ken asi.

•   Kaano a natay ni Jesus?

   Natay ni Jesus iti “maikasiam nga oras” manipud iti panagsingising ti init, wenno agarup nga alas tres iti malem iti aldaw ti Paskua dagiti Judio. (Marcos 15:33-​37) Sigun iti kalendario ita, naitumpong dayta idi Biernes, Abril 1, 33 C.E.

•   Sadino a natay ni Jesus?

   Napapatay ni Jesus iti “maaw-awagan Disso ti Bangabanga, a maawagan Golgotha iti Hebreo.” (Juan 19:17, 18) Idi panawen ni Jesus, adda daytoy a lugar iti “ruar ti ruangan” ti Jerusalem. (Hebreo 13:12) Mabalin nga adda dayta iti maysa a turod, ta kuna ti Biblia a nakita ti dadduma ti pannakapapatay ni Jesus “iti adayo.” (Marcos 15:40) Ngem saan a masigurado ita ti eksakto nga ayan idi ti Golgotha.

•   Kasano a natay ni Jesus?

   Adu ti mamati a nailansa ni Jesus iti krus. Ngem kuna ti Biblia: “Inawitna dagiti basoltayo iti bukodna a bagi iti . . . kayo.” (1 Pedro 2:​24) Nagusar dagiti mannurat iti Biblia iti dua a Griego a sao a mangtukoy iti banag a nausar iti pannakapapatay ni Jesus—stau·rosʹ ken xyʹlon. Adu nga eksperto ti mangibagbaga a dagitoy a sao ket tumukoy iti maymaysa a kayo, naipaidda man dayta wenno naipatakder.

•   Kasano koma ti pananglaglagip iti ipapatay ni Jesus?

   Iti rabii ti pannakaselebrar ti tinawen a Paskua dagiti Judio, impakita ni Jesus kadagiti adalanna ti simple a pamay-an a surotenda, ket imbilinna: “Itultuloyyo nga aramiden daytoy kas panglaglagip kaniak.” (1 Corinto 11:24) Kalpasan ti mano la nga oras, napapatay ni Jesus.

   Inyarig dagiti mannurat ti Biblia ni Jesus iti karnero a maisakripisio iti Paskua. (1 Corinto 5:7) Ti Paskua idi ti agserbi a panglaglagip dagiti Israelita iti pannakawayawayada manipud iti pannakaadipen. Kasta met, ti Pananglaglagip iti ipapatay ni Jesu-Kristo ti mangipalagip kadagiti Kristiano a nawayawayaandan iti basol ken ipapatay. Tinawen idi a maselebraran ti Paskua, tunggal Nisan 14 iti lunar a kalendario; maminsan met iti makatawen a laglagipen dagiti nagkauna a Kristiano ti ipapatay ni Jesus.

   Iti petsa a kabatog ti Nisan 14, tinawen a minilion a tattao iti intero a lubong ti manglaglagip iti ipapatay ni Jesus.