Ti basol ket aniaman a tignay, rikna, wenno kapanunotan a maikontra kadagiti pagalagadan ti Dios. Karaman ditoy ti pananglabsing kadagiti linteg ti Dios babaen ti panagaramid iti dakes, wenno kinakillo, iti imatang ti Dios. (1 Juan 3:4; 5:​17) Dakamaten met ti Biblia ti basol gapu iti saan a panagtignay, wenno saan a panangaramid iti umiso.—Santiago 4:​17.

 Kadagiti orihinal a lengguahe ti Biblia, ti sasao para iti basol kaipapananna a “saan a mapuntaan ti marka,” wenno ti puntiria. Kas pagarigan, nakalalaing nga agpallatibong ti maysa a grupo dagiti soldado iti nagkauna nga Israel ta ‘saanda nga agmintis.’ No literal a maipatarus dagita a sasao, ‘saan nga agbasol’ ti kaibatoganna. (Uk-ukom 20:16) Isu a ti panagbasol ket panagmintis wenno saan a mapuntaan ti perpekto a pagalagadan ti Dios.

 Kas Namarsua, adda kalintegan ti Dios a mangikeddeng kadagiti pagalagadan para kadagiti tattao. (Apocalipsis 4:11) Manungsungbattayo kenkuana kadagiti tigtignaytayo.—Roma 14:12.

Posible kadi a naan-anay a maliklikan ti agbasol?

 Saan. Kuna ti Biblia nga “amin nagbasol ken agkurang iti dayag ti Dios.” (Roma 3:23; 1 Ar-ari 8:46; Eclesiastes 7:20; 1 Juan 1:8) Kasano a kasta?

 Idi damo, awan ti basol dagiti immuna a tao a da Adan ken Eva ta naparsuada a perpekto, iti ladawan ti Dios. (Genesis 1:​27) Ngem napukawda ti perpekto a kasasaadda gapu ta nagsukirda iti Dios. (Genesis 3:​5, 6, 17-​19) Impatawidda dagiti depekto a basol ken kinaimperpekto kadagiti annakda. (Roma 5:​12) Kinuna ni David nga ari idi ti Israel: “Buyogen ti biddut naipasngayak.”—Salmo 51:5.

Adda kadi dagiti nadagdagsen a basol?

 Wen. Kas pagarigan, kuna ti Biblia a dagiti lallaki iti nagkauna a Sodoma “dakesda ken nakaroda a managbasol” ken ti basolda ket “nadagsen unay.” (Genesis 13:13; 18:20) Usigem ti tallo a mangdeterminar iti kakaro, wenno kadagsen, ti basol.

1.   Kinakaro. Pakdaarannatayo ti Biblia nga adaywantayo dagiti nakaro a basol kas iti seksual nga immoralidad, idolatria, panagtakaw, panagbartek, panagkikil, pammapatay, ken espiritismo. (1 Corinto 6:​9-​11; Apocalipsis 21:8) Iduma ti Biblia dagitoy nga aramid kadagiti basol a saan nga inggagara, kas koma iti sasao wenno tigtignay a makapasakit iti sabsabali. (Proverbio 12:18; Efeso 4:​31, 32) Nupay kasta, paregtaennatayo ti Biblia a ditay tagtagilag-anen ti aniaman a basol, ta mabalin nga agbanag dagitoy kadagiti mas serioso a pananglabsing kadagiti linteg ti Dios.—Mateo 5:​27, 28.

2.   Motibo. Makaaramid ti dadduma kadagiti basol gapu ta dida ammo ti pagayatan ti Dios. (Aramid 17:30; 1 Timoteo 1:​13) Nupay saan nga anamongan ti Dios dagita a basol, igidiat ti Biblia dagita kadagiti basol a sipapakinakem a pananglabsing kadagiti linteg ti Dios. (Numeros 15:30, 31) Dagiti sipapakinakem a panagbasol ket nagtaud iti ‘dakes a puso.’—Jeremias 16:12.

3.   Kasansan. Pagdumaen met ti Biblia ti maminsan a panagbasol ken ti panangyugali iti basol iti mabayag a tiempo. (1 Juan 3:​4-8) Dagidiay ‘sipapakinakem a nangyugali iti panagbasol’ kalpasan a naammuandan no ania ti umiso, awatenda ti nakabutbuteng a panangukom ti Dios.—Hebreo 10:26, 27.

 Dagidiay nakaaramid iti nadagsen a basol ket mabalin a maburiboran gapu iti kadagsen dagiti naaramidda a basol. Kas pagarigan, insurat ni Ari David: “Dagiti bukodko a biddut limmasatda iti ngatuen ti ulok; kas iti maysa a nadagsen nga awit nadagsenda unay maipaay kaniak.” (Salmo 38:4) Ngem mangipaay ti Biblia iti namnama: “Ti nadangkes a tao panawanna koma ti dalanna, ken ti makadangran a tao ti pampanunotna; ket agsubli koma ken Jehova, a mangngaasinto kenkuana, ken iti Diostayo, ta dakkelto ti pammakawanna.”—Isaias 55:7.