Ebanghelio ni Juan 19:1-42
19 Innala ni Pilato ni Jesus ket pinasaplitna.+
2 Nangaramid dagiti soldado iti korona a sisiit ket inkabilda iti ulona ken kinagayanda iti purpura.+
3 Immasidegda kenkuana sa kinunada: “Agbiagka,* Ari dagiti Judio!” Kalpasanna, tinungtungpada.+
4 Rimmuar manen ni Pilato ket kinunana kadagiti tattao: “Kitaenyo! Iruarko kadakayo daytoy a tao ta awan ti nakitak a basolna.”+
5 Gapuna, rimmuar ni Jesus, a nakakorona iti sisiit ken nakakagay iti purpura, ket kinuna kadakuada ni Pilato: “Kitaenyo daytoy a tao!”
6 Ngem idi nakita dagiti panguluen a papadi ken dagiti guardia, impukkawda: “Ibitaymo iti kayo! Ibitaymo iti kayo!”+ Kinuna ni Pilato: “Alaenyo ket dakayon ti mangibitay, ta awan ti nakitak a basolna.”+
7 Insungbat dagiti Judio: “Adda lintegmi, ket sigun iti linteg, rumbeng a matay+ ta ibagbagana nga anak ti Dios.”+
8 Ad-adda a nagbuteng ni Pilato idi nangngegna dayta.
9 Simrek manen iti pagtaenganna ket insaludsodna ken Jesus: “Tagaanoka?” Ngem saan a simmungbat ni Jesus.+
10 Gapuna, kinuna ni Pilato: “Saanka kadi a sumungbat? Saanmo aya nga ammo nga adda autoridadko a mangwayawaya ken mangpatay kenka?”*
11 Simmungbat ni Jesus: “Awan ti autoridadmo kaniak no saan nga inted ti Dios. Dayta ti makagapu a nadagdagsen ti basol ti tao a nangyawat kaniak kenka.”
12 Gapu iti daytoy, impamuspusan ni Pilato a wayawayaan ni Jesus, ngem impukkaw dagiti Judio: “No wayawayaam dayta a tao, saannaka a gayyem ni Cesar. Agsao maibusor* ken Cesar ti asinoman a mangibilang iti bagina nga ari.”+
13 Idi nangngeg daytoy ni Pilato, inruarna ni Jesus, ket nagtugaw iti pangukoman nga adda iti Plataporma a Bato, nga iti Hebreo, Gabʹba·tha.
14 Aldaw idin ti Panagsagana+ para iti Paskua; agarup alas dose ti aldaw.* Ket kinuna ni Pilato kadagiti Judio: “Kitaenyo! Ti ariyo!”
15 Ngem impukkawda: “Papatayem! Papatayem! Ibitaymo iti kayo!” Kinuna ni Pilato: “Papatayek kadi ti ariyo?” Insungbat dagiti panguluen a papadi: “Ni laeng Cesar ti arimi.”
16 Inyawatna ngarud kadakuada tapno maibitay iti kayo.+
Iti kasta, innalada ni Jesus.
17 Impabaklayda kenkuana ti kayo a pagtutuokan* sa impanda iti lugar a maawagan iti Hebreo a Golʹgo·tha,+ kayatna a sawen, Lugar ti Bangabanga.+
18 Sadiay nga inlansada+ ni Jesus iti kayo agraman ti dua a lallaki nga adda iti agsumbangir a sikiganna.+
19 Kastoy met ti insurat ni Pilato a maipaskil iti kayo a pagtutuokan:* “Ni Jesus a Nazareno nga Ari Dagiti Judio.”+
20 Adu a Judio ti nakabasa iti dayta, ta asideg iti siudad ti lugar a nakailansaan ni Jesus, ken naisurat dayta iti Hebreo, Latin, ken Griego.
21 Ngem kinuna dagiti panguluen a papadi dagiti Judio ken ni Pilato: “Saan nga ‘Ari Dagiti Judio’ ti isuratmo no di ket ti imbagana a ‘Siak ti Ari Dagiti Judio.’”
22 Kinuna ni Pilato: “Saanen a mabaliwan ti insuratko.”
23 Idi nailansadan ni Jesus iti kayo, innala dagiti soldado ti makinruar a badona ket pinagkapatda sa nagbibingayanda. Innalada pay ti makin-uneg a badona nga awan ti nagsaipanna ta naabel manipud ngato agingga iti gayadanna.
24 Imbagada: “Saantayo a pigisen, no di ket pagbibinnunotantayo no asino ti mangala.”+ Napasamak daytoy kas kaitungpalan ti kuna ti kasuratan: “Nagbibingayanda dagiti badok, ken nagbibinnunotanda ti kawesko.”+ Kasta ti inaramid dagiti soldado.
25 Iti asideg ti kayo a pagtutuokan* ni Jesus, nakatakder ni nanangna,+ ti kabsat a babai ni nanangna, ni Maria nga asawa ni Clopas, ken ni Maria Magdalena.+
26 Idi nakita ni Jesus ni nanangna ken ti adalan nga ipatpategna+ a nakatakder iti asideg, kinunana ken nanangna: “Babai, kitaem ti anakmo!”
27 Kalpasanna, kinunana iti adalan: “Kitaem ni nanangmo!” Manipud idin, nagyanen ni Maria iti balay dayta nga adalan.
28 Ammo ni Jesus a natungpalen ti amin. Kas kaitungpalan ti kasuratan, kinunana: “Makain-inumak.”+
29 Adda pagkargaan sadiay a napno iti naalsem nga arak. Gapuna, nangalada iti espongha a naisawsaw iti naalsem nga arak, inkabilda iti sanga ti hisopo,* ket impasepsepda kenkuana.+
30 Idi naramananen ni Jesus ti naalsem nga arak, kinunana: “Natungpalen!”+ Nagdumog ket nauyosen ti biagna.*+
31 Gapu ta aldaw idi ti Panagsagana,+ saan a kayat dagiti Judio nga adda bangkay a nakalansa iti kayo a pagtutuokan+ bayat ti Sabbath (ta naindaklan daydi a Sabbath),+ isu a kiniddawda ken Pilato a matukkol dagiti saka dagiti lallaki sa maibaba dagiti bangkayda.
32 Napan ngarud dagiti soldado ket tinukkolda dagiti saka ti dua a lallaki nga adda iti abay ni Jesus.
33 Ngem idi makadanonda ken Jesus, nakitada a natayen isu a saanda a tinukkol dagiti sakana.
34 Nupay kasta, induyok ti maysa kadagiti soldado ti pikana+ iti bakrang ni Jesus ket dagus a pimsuak ti dara ken danum.
35 Ti nakakita iti napasamak pinaneknekanna nga umiso daytoy, ken ammona a pudno ti ibagbagana, tapno mamatikayo met.+
36 Kinapudnona, napasamak daytoy kas kaitungpalan ti kasuratan: “Awan ti matukkol* a tulangna.”+
37 Kuna ti sabali pay a kasuratan: “Kitaendanto daydiay dinuyokda.”+
38 Kalpasanna, ni Jose a taga-Arimatea kiniddawna ken Pilato no mabalinna nga alaen ti bangkay ni Jesus. Isu ket adalan ni Jesus ngem inlimedna dayta ta mabuteng kadagiti Judio.+ Gapu ta pinalubosan ni Pilato, innalana ti bangkay.+
39 Napan met ni Nicodemo,+ ti lalaki a bimmisita idi ken Jesus iti rabii, ket nangitugot iti napaglaok* a mirra ken aloe nga agarup 100 a libra.*+
40 Innalada ti bangkay ni Jesus ket binalkutda iti lienso a lupot agraman dagiti nabanglo a yerba,+ kas iti kaugalian dagiti Judio a mangitabon kadagiti natay.
41 Adda met idi hardin iti lugar a nakatayanna* ken adda baro a tanem*+ sadiay a saan pay a nausar.
42 Impanda sadiay ni Jesus gapu ta aldaw idi ti Panagsagana+ dagiti Judio ken asideg laeng ti ayan ti tanem.
Footnotes
^ Wenno “Madaydayawka.”
^ Wenno “mangibitay kenka iti kayo?”
^ Wenno “Kumontra.”
^ Lit., “agarup maikanem nga oras.”
^ Wenno “natayen.”
^ Wenno “marumek.”
^ Wenno mabalin a, “sangalukot.”
^ Wenno “nakaibitayanna iti kayo.”
^ Wenno “pakalaglagipan a tanem.”
