“Adu a babbai ti maab-abuso iti intero a lubong. Daytoy a problema ket kasla epidemia a masapul a mapasardeng a dagus,” kuna ti World Health Organization. Iti panangtantia daytoy nga organisasion, dandani 30 a porsiento “iti amin a babbai nga adda asawa wenno karelasionna ti nakapadas iti pisikal ken/wenno seksual a panangabuso” ti kaparehada. Sigun iti report ti UN, iti maysa a napalabas a tawen, natantia a 137 a babbai iti intero a lubong ti inaldaw a matmatay gapu kadagiti karelasion wenno sabali pay a miembro ti pamiliada. a

 Ipakita dagiti estadistika ti kakaro ti pannakaabuso iti pagtaengan, ngem saanda a kabaelan nga ilawlawag ti emosional ken pisikal a panagsagaba dagiti biktima.

 Maysaka kadi a biktima ti pannakaabuso iti pagtaengan? Wenno adda am-ammom a biktima? No wen, kitaem dagiti sumaganad a punto iti Biblia a makatulong.

  Saanmo a basol ti pannakaabusom

  Adda makatulong

  Saanka nga agmaymaysa

  Agpatingga ti pannakaabuso iti pagtaengan

  No kasanom a matulongan ti biktima

 Ti kuna ti Biblia: “Tunggal maysa ngarud kadatayo ket manungsungbatto iti Dios.”—Roma 14:12.

 Laglagipem: Ti nangabuso kenka ti manungsungbat iti aramidna.

 No pabasolennaka ti karelasionmo iti panangabusona kenka, kamali isuna. Maikari dagiti assawa a babbai a maayat, saan a maabuso.—Colosas 3:19.

 No dadduma, mabalin nga ab-abusuennaka ti karelasionmo gapu iti sakit iti isip, dimmakkelanna a pamilia, wenno nalabes a panaginum iti arak. Ngem sungsungbatanna latta iti Dios ti panangtratona kenka. Ken isu ti masapul a mangikagumaan nga agbalbaliw.

 Ti kuna ti Biblia: “Adda maitungpal no adu ti mamalbalakad.”—Proverbio 15:22.

 Laglagipem: No mariknam a saanka a natalged wenno saanmo nga ammo ti aramidem, matulongandaka ti dadduma.

 Apay a kasapulam ti tulong? Ti pannakaabuso iti pagtaengan ket komplikado a situasion. Mabalin a marigatanka nga agdesision ta adu dagiti ikabilangam, kas iti:

•   Seguridadmo

•   Pagsayaatan dagiti annakmo

•   Pinansial a kasasaadmo

•   Ayatmo iti karelasionmo

•   Tarigagaymo a mangurnos iti relasionyo no agbalbaliw ti karelasionmo

 Mabalin a matikawka ken saanmo nga ammo ti aramidem. Siasino ti mabalinmo a pagpatulongan?

 Mapagtalkan a gayyem wenno miembro ti pamilia: Mabalin a maipaayandaka iti praktikal ken emosional a suporta. Dakkel ti maitulong ti pannakisaritam iti tao a mangipatpateg kenka.

 Hotline para kadagiti biktima ti pannakaabuso iti pagtaengan: Mabalin a makaipaayda a dagus iti tulong ken maibagada ti aramidem tapno maprotektaram ti bagim. No bigbigen ti karelasionmo nga adda problemana ken talaga a kayatna ti agbalbaliw, adda hotline a mabalin a tumulong kenkuana tapno ammona ti aramidenna.

 Dadduma pay a makatulong: No addaka iti peligro, adda dagiti makatulong kenka a dagus. Mabalin a karaman ditoy dagiti doktor, nars, wenno dadduma pay a nasanay iti daytoy a propesion.

 Ti kuna ti Biblia: “Asideg ni Jehova b kadagiti nasaktan ti pusoda; isalakanna dagidiay nadudog ti espirituda.”—Salmo 34:18.

 Laglagipem: Ikarkari ti Dios a tulongannaka.

 Maseknan unay ni Jehova kenka. (1 Pedro 5:7) Maawatanna ti pampanunot ken emosionmo. Liwliwaennaka babaen ti Saona, ti Biblia, ken kayatna nga agkararagka kenkuana. No agkararagka, dumawatka iti sirib ken bileg a kasapulam tapno mapagballigiam ti situasionmo.—Isaias 41:10.

 Ti kuna ti Biblia: “Agnaedto ti tunggal maysa iti sirok ti ubasna ken iti sirok ti kayona a higos, ken awanto ti pagbutnganda.”—Mikias 4:4, footnote.

 Laglagipem: Ikarkari ti Biblia nga iti asidegen a masanguanan, ti pagtaengan ket natalgedton a lugar para iti amin.

 Ni Jehova a Dios laeng ti makaited iti naan-anay ken permanente a solusion iti amin a problematayo. Ikarkari ti Biblia: “Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot.” (Apocalipsis 21:4) Iti dayta a tiempo, uray dagiti nasaem a kapadasan ket masuktanto iti nasayaat. (Isaias 65:17) Daytoy ti natalged a masanguanan nga ikarkari ti Biblia kenka.